Dik tak chuan amah tluk zetin ka bei hi a dawng ve a ni—amah avàng hian! Zilh ngaihna pawh ka hre tawh lo a, sawi leh chuan tùr pawh neiin ka inhre tawh  hek lo—nun leh dam peih tawh miau hek lo le!

Siamtu’n a pêk hlu tak, ama nunna pawh chhah hial duha rilru beidawng tawh kan pa (han ti ’ngawt ila, ka bialpa a la ni; mahse, pasal atána ka hual a ni tawh) hi ruihhloin a bawih mék a ni. Chu chu ka hriatna a rei tawh. Hre reng mah ila, amah chu ka hmangaih tlat si a; tin, hmangaih renga hmangaih hlen ka duh si a!
    
Ka tel loin

Pasal atána ka hual, mipa hmui ka fawh hmasak ber leh ka fawh hnuhnun ber; ka mipa star hmasak ber leh ka duh hmasak ber; ka hmangaih hmasak ber, ka hmangaih mék leh ka dam chhúnga ka hmangaih reng tawh tùr hi ruihhlo avàngin a chhúngten nimin khán—ka hriat ve miah lohin De-addiction centre-ah an lo dah a nih chu!

Chu chuan min tahtír a, ka mittui a ti tla nawn leh thìn. Ka tel loin—ka hmuh leh enkawl leh tanpuina tel loa a awm tùr chu ka ngaingam lo a, min ti lungngai a ni. Zawhnain zíng ka thangharh a; zawhna bawkin chhùn ní ka hmang ral a; chûng zawhna hmang vëk chuan zàn mu pawh chhíng loin ka tlaivár thìn. Mahni intih hlum pawh pawi sa tawh lo khawpa ruih­hloin a bâwih mék hi, mi dangin—ka tel loin—engtin tak lo enkawl ang maw?

Zah pawh dáwn loa ka enkawl thin ang leh ka lo buaipui thin ang khán tuin nge enkawl peih ang? Tuin nge a zun leh êk thiarsak ang a, tuin nge a mut theih lohin menpui ta ang le? Ka tel loin engtin nge a awm zêl ang a, a hring nun hi engtin nge a chhiar chhoh zêl ang? Drip te an khai ngei ang a, Dextros leh 'tros lo nèn … a ning thìn àwm si a. Tu nge a ning lutuk tùr, a rilru la péng zo thei tùr awm ang? 

Hmäna “kan pa”

BA IIIrd Semester kan zir kum a ni, ka la hre reng. Class kan tan atanga kár khat hnu … ni tain ka hria— “class” tâwka class a rawn zawm ve ní kha!

T-shirt vár, purple rawnga in-dot a rawn ha a. A jeans leh a Canvas loafers lah chu a inchaw-be khawpa maw . . . Thí—ngeiawm lo tâwk chauha locket nei a rawn awrh bawk. Amah hrim hrim chu a “class” tawp a. Kan major subject, History kha a rawn ta neih nghâl ngawt a—vawiin thlengin amah hi ka “history” a ni zui a; amah vëk hi aläwm vawiin thlenga ka thinlunga ka “major subject” ni zui ta reng bawka chu!

Tum khat chu, class kan off lai a ni a. Library kawta thiante nèn kan thut laiin keimah chauh min en reng chungin min rawn pan ding a nih chu—amah chuan! A hming pawh ka la hriat loh, kan class-a mi thar, “class” ber pa chuan.

‘Thiannu, lehkhabu i hawh dáwn em ni?’ min rawn ti ringawt. ‘Uhmhh!’ ka ti ve ringawt! Chutah, ‘Canteen-ah min chawlhpui duh em?’ min la ti ta deuh deuh! Ka thi … em le—khatih lai tak khán!?

Awi! Ka zak khat tawp! Ka thiante nèn canteen-a chàwl loa DinDin Restaurant-a kan chawlh zâwk thin thute ka hrilh bah nuai—a hming pawh ka la hriat loh thu pawh ka hrilh tawp maw le!

Ani chuan, ‘Hmingmawia ka nia. I duh leh “Mawite” tiin min ko dáwn nia,’ min ti a. Chhàn leh ngaihna tùr ka hre tawh lo—kei “lánu” zei lo hian!

Ka nui ve … in ka hria. ‘Lucy ka nia,’ ka ti ta em kha le? ’Tichuan, kan chhùn chawlh thinnaa chàwl tùr chuan min zui ve mai a. A bike-a chuang tùrin keimah, he keimah ngei mai chauh hi min sáwm a nih chu! Ka thiante mitmei pawh véngthäwng miah loin a bike-ah chuan ka chuang ve tawp a. A tawi záwngin: kan “ni” ta a; ka chunga a chuan ve hnu thleng pawh hian—kan “ni” ta zêl a nih hi!

“Hmangaihna mit a del” an ti!

Tum khat chu, college week lai a ni a, ka chau-in ka taksa a “weak” riau mai a. Outdoor games khelh ní a ni a, ka kal peih lo a. Inah phone kheuhin TV hmaah, TV en chuang loin thut­thlengseiah ka mu zuar a. Mawitea chuan min rawn text reng a. Ka kal loh chhan te, a khawhar thu te, a kim loh thute chu min rawn hrilh reng a; kei paw’n ka chháng ve zêl.

‘Min ngaih viau chuan in kawngkapui kha han hawng teh,’ a ti ta mai! Ka va phu chiang tak—thäwm awm lo mah se! A chhan chu, ih … a rawn kal tak tak vaih chuan … ka chhe vek a ni mai! Ka zak nasa dáwn “râpthlâk” lutuk! Ka inchei bawk si lo. Ka thawmhnaw inbel lah, a thing “turu-pro-max khat bon-tawp” bawk si!

Rang tâwkin kan kawngkapui chu ka va hawng. Páwnah chuan amah Mawitea chu a lo ding kur! Kawngka ka hawnna lamah kan kawngkapui chuan a hmai a la vaw têp zui!

Min kai lût a … ti ila, min kuah lût zâwk … pawh a ni mai lo, min fâwp lût a, min chúl lût bawk! Ka nu leh ka úte chu office kalin an bo diak si. Mahni chauha in nghâk kha, amah nèna “kan mahni” chauh hnu chuan kan ngampa sawt a!

Ka hmangaiha chuan ka pindan lamah min kai phei. Ka duh lo; mahse, ka hreh lo! Ka ngai êm a ni. Ka’n tang der ve dáwn a; mahse, ngaih berte laka tan der sâwt lohzia ka hre thiam ve ta! A tih sa loh loh te pawh kan ti ta a. Ka rilru chu a nuam lo ngei mai. Mahse, “amah chu, ka hmangaih miau si a,” tiin ka la inthiam chawp a.

An sawi fo thìn, “Hmangaihna mitdel” an tih hi ka awih ta!—ka duh loh min duhtír theitu a ni tlat a. Thiante leh mi dang thlahin, mite mit hmuha mawi lo dáwn dáwna khawsak dun pawh dáwn zo loin kan inzui ta zêl a; amah ka hmangaih êm avàngah ka ngai zêl a. Vawi tam an inah ka léng fo a; mí min sèlna leh rèlna zawng zawng ka pawi sa thei tawh lo. Hei hi a ni lo’m ni an sawi “hmangaihna mitdel” chu?

Pa a nei tawh lo a, a nu leh a ú nèn chauha khawsa an ni. A nu, Nu Mami, lung lam tha lo nei chunga office kal leh a u class kal hlànin, a pindanah class kan lo kal dùn ve thìn! “Pa a nei tawh lo,” han ti ila, a la nei tho a. Mahse, nuthlawi ûmsanin a nupui fanau a chhuahsan a nih chu! Khawngaihthlâkin!

Hring nun a chhiar sual a ni!

Hmangaihna mitdel chu Mawitea te in lam pan tùr chuan a mit a vár ngang mai! Ka sawi tawh ang khán mite sèl leh rèl rêng rêng ka dáwn peih lo—ka hmangaih thlâwt vàngin! Nupa kan nih lohna chu, zànah kan riak dùn lo, tih mai chauh a ni ta!

Mahse, ka duh leh beisei angin thil a kal hauh lo mai! Kan inngaihzàwn atanga kum chanve êm pawh a la ral lo tihah, ka hmangaih Mawitea chu, ruihhlo number 4 addict a ni tih ka hre chhuak a nih chu!

Tum khat chu a pindan chhúng rilah kan awm dùn a. Thlan tla hluama thahnemngai kan ngaih hnuah bathroom-ah min luhsan a. Kei lah pek, harh hek, a khum síra a pawhdawh chu ka’n hawng khera maw le—awi ka nu le!

“No. 4 (heroin)” an tih hi ka hre ve tawh. Ka cousin paw’n a thihpui tawh. A thih dáwnin a lukham hnuaiah chéng sîng chuang man No. 4 an hmu! Chu chu kuhva an pack thinna saräng angah a leng hal hal! Kha kha chéng sîng chuang fé man a nih chuan, Mawitea kawl lai hi … ka chhût peih lo! A sawi pawh ka duh lo! Ka hmangaih, ka rilru, ka thinlung leh ka taksa, ka pumpui ka hlanna Mawitea thil kawl lai, a kawl zah hi ka sawi ngam lo! Damdawi müm leh inchiuna hriau a dah that zawng zawngte nèn pawh hian!

Kan in lam pana tlàn hàw ka tum lai takin bathroom socket a ri rak a. Mawitea chu a rawn chhuak. Kei mittui parawl kuangin bathroom kawngka biangah ka lo ding.
    
‘Lucy … engati nge?’

Tèng fe-in, ‘Tenawmpa!’ ka ti ringawt!

Dik tak chuan, ka chhànna thu khi ka ten—ka aw-ka chhuak hi a lêt 10-in ka “ten”! Ka thinlung chhúng ril hian a la hmangaih miau bawk si!

‘Lucy, eng nge i hriat a? Khatia i àn chiam?’ A aw phàwi a pangngai tawh bîk lo.

‘Eng nge thil dang hriat belh tùr ka la neih chuan le? Sawi leh chuan tùr eng nge awma i la hriat? I heroin zawng zawng te, i damdawi müm zawng zawng te … ka sawi vek peih lo! Enga tána i tih nge? Hei hi maw, i sum hnár chu ni a? Kei hi i naute lem—i Barbie—i duh duha i khalh theih! Nang chu Superman!’ tih leh a pawhdawh atanga a damdawi phawrh leh chhuata paih darh ka rùal a. Tap tuau chung leh thinrim chungin a ni khîng thute khi ka sawi ni. Drugs addict ka lo addict ve leh zêl chu ka inkhawngaih êm êm a ni.

‘Lucy, ngaithla teh. Ka thlang sual a ni! Hring nun hi ka chhiar sual a ni!’ a tih ri chu a pindan kawngka ka khàr rual chuan ka hre riai ruai a.

Min au a, min ko a, min ûm a tum tih pawh ka hria. Mahse, a u—U Ruati office báng nèn kan innang chiah a. Ka bánah min chelh a. A nau, min rawn ûmtu Mawitea chu a pindana lût tùrin a hrilh a. U Ruati chuan ka duh lo chung an inah min hruai lêt leh a, a pindana min kai lûtin hêng thute hi min hrilh ta a ni:

‘A nuna i rawn lan hma khán vawi tam tak intih hlum a lo tum fo tawh a; mahse, a hlawhchham ziah! A thil tih sualna lak ata chhantu chu nang hi i ni, Lucy. A tán hian i hlu asin! A tán chuan vàn angel i ni tawp tih hi ka hrilh duh che a ni.’

A sawi zawh hmain, a thu sawi ka awih lo lutuk chu, ‘A ni thei lo!’ ka ti ringawt a. Ruihhlo a la sim chuang si lo a. Tin, u Ruati hmuh loh; mahse, Pathian mit hmuha sual bawlhhlawh lutuk daipui thìntu chu kei hi ka ni a, a “van angel” ka ni ang maw!?

Kar lehah chhunzawm tùr…