Mihring zingah hian thinrim ngai miah lo hi an awm ang em le? Mi zaidam tak pawh nise vawi khat mah thinrim lo chu an awm lo mai thei, rilru lama rual ban lo te an nih ngawt loh chuan. Mi zaidamte hi an thinrim khât deuh a, mi thinchhiate erawh an thinrim zing deuh ni maiin a lang. Mi thinchhia te hi an thinrim sam vanga thinchhia nge an nih a, an thinchhiat vanga thinrim leh mai thin zawk?

Hnam dangte ngaihtuah chuan Mizote hian thinrim hi kan thiam vak lo niin a lang. Kan thin a rim tawh chuan kan rilruah kan thinrimna kha kan pai ran mai a, a reh lawk lawk tawh lo. Vai len hma daih khan Buarkhawni Pa an tih chu Vanpuilala khua, Khawlianah a awm thin a. Vawi khat pawh a kawmchhak pa nen an inhnial thinrim a, Buarkhawni pa chu thinur em emin a tlan haw a, pawnpui hnuaiah ni thum leh zan thum a inzial a, a rum a rum a, a thinrimna chu a zual dawn chauh a ni. A ni linaah chuan an kawmchhak pa chu a zu leng ta a, “Buari pa, chu chen chen thinrim tur a ni lo ve, lo tho la, ka tuibur hi i hmuam dun teh ang,” a ti a. Chutah Buarkhawni pa chuan, “I la duh fo a ni maw?” a ti a, chemte a la lawk a, a vit hlum ta der mai a ni. Thinrim insum theih loh te, thinrim rei te chuan nghawng tha lo tak a nei chawk thin reng a ni.

Hnam dang, a bikin vai te hi an thinrim rei ngai vak lo emaw tih tur an ni. A chang chuan an inhau tawn tawn a, an invaw darh vek ang tih hlauhawm khawpin palting leh patling an inân khum a, a hnuah tha deuhin an inkawm leh a, an titi a, an nui tlang leh mai a. An inhauh ang hian inhau ve ngat ila, keini Mizote chu kut kan inthlak ngei ngei ang. Thinrim rei loh chungchangah te, thinrim laia insumtheih kawngah te hian hnam dang, ringlo mi kan tihte hnen atang hian zir tur tam tak kan nei a ni. Kan thin a rim pawhin daih rei lo hram se. Chuti ni loa thinrim a pianga tihtauh nghet nghet te, a tuk thlenga tawng duh loh te, chaw ei duh loh te hian chhungkaw hlimna boruak a vaw chhe thin. 

Hetih rual hian thinrimna awm ngawih ngawih hi a awm ve a, thinrim hrim hrim hi sual a ni ngawt lo. Pathian biak in temple thianghlim sumdawn nan an lo hmang a hmuh khan Isua meuh pawh a thinrim ve a nih kha. Hruihrual a la lawk a, a vaw darh ur ur a, an sumdawnna dawhkante pawh a nam thluksak a nih kha. A hnuah erawh tha takin a zirtir leh mai a ni. Thinrimna awma thinrim chu a pawi lo a, thinrim rei te, thinrim reng te erawh Bible zirtirna nen pawh a inmil chiah lo.

Thinrim rei a tha lo kan tih rual hian thinrimna awm ngawih ngawih pawha thinrim nachang hre lo erawh an huatthla la zawk fo thin. Pa pakhat, thinrimna awm ngawih ngawih pawha thinrim nachang hre lo, thinrim lohna tura thinrim tlat hi ngei awm deuh a sin. Chu pa chuan an mikhual tlangval hnenah, “Kan inah i lo thleng a, tha takin kan lo mikhual che a, ka toothbrush min hman tawm a, ka thawmhnaw i duh duh i inbel a, ka hre thiam che a, i duh hun hunah kan khumpuiah i kai a, kan nu i mutpui a, ka hre thiam zel che a, phone charger leh zel min hman tawm hi chu ka hre thiam thei lo a ni,” a ti e an ti.

He pa ang maia thil serious zawk ngaih serious nachang hre lo, serious lo zawk ngai serious tlat hi kan lo awm fur mai. Entir nan, kan kohhran hian thuhriltu ruaiin crusade nei ta ila, chu kan thuhriltu chuan thu mak sak pui pui sawi thin se la, puilpit atangin pastor leh rawngbawltute tawngkam dengkhawng tak takin bei dum dum mai se, amah sawiseltute chu na tak taka beiin, tûr inpuiah te cho ta vel se la, Kohhran Upa ka nih chuan, “E khai, hei hi chu a ni ta em em lo ve,” tia thinrim nachang ka hriat a, titawp tura hmalak nachang ka hriat a tul ang. Chuti chung pawha ngawih ka chuh tlat emaw, thinrim nachang ka hriat loh emaw chuan kei leh ka lawina kohhran chu kan demawm ve khawp ang. Thinrim huna thinrim nachang ka hriat loh a, khap daih a tul huna khap daih nachang ka hriat loh vanga tute emaw an huangtau phah a, an kal sual a, kohhran inpumkhatnain a tawrh phah hial phei chuan mawh ka phur thui khawp ang. 

Thinrimna âwm taka thinrim hi mi pangngai zia a ni a, thinrimna âwm lo taka thinrim tlat hi mi pangngai lo zia a ni. Thinrim insum thei chu mi fing a ni a, thinrim insum thei lo chuan pawi a khawih a, a hnuah a inchhir nge nge thin. Thil te tham mena thlak thiam te, thinrim rei loh te hi kan zir zel a tha mang e.