Tun hmaa BJP kaihhruai (NDA) sorkar a finance minister lo ni tawh, BJP hruaitu hlui Yashwant Sinha chuan September 27 khan The Indian Express-a a column-ah Pu Modi-a kaihhruaina hnuaia India economy tlak hniam mek thu chiang tak leh huai takin a ziak a, a mawhphurtu a a sawi finance minister Arun Jaitley pawh a dim vak lo hle. Hemi hma hian prime minister (leh finance minister hlui) Dr. Manmohan Singh leh P.Chidambaram te pawhin economy tlakhniam chungchang hi lo sawi tawh mahse Pu Modi-a leh sorkar boruak san chhoh lai a ni si a, an thengthawngah a lut lem lo. Subramanian Swamy, Pu Modi-a economic adviser pawhin september thla laihawl khan ram economy-in tlak hniam lam a pan thu a lo sawi tawh a; mahse, chai zui a ni lem lo a. Hetia BJP hruaitu hlun, Vajpayee hun laia finance minister lo ni tawh bawkin a ziah takah hian nghawng a nei lian zui ta hle thung. “Economy hi a tlahniam zel a, insawh dawt thei dinhmunah a ding mek a. Chu chu BJP mi leh sa tam tak hian an hria a, mahse hlauh an neih vangin an sawi chhuak ngam lo,” tiin a ziak a. “Tuna India economy nihna tak chu...mimal sumdawnna lam (private investment) a tlahniam hle a, kum sawmhnih kal ta chhunga a hniam ber lai a ni a, thilsiam chhuah lam pawh a tlachhe duai a, lo neih lam (agriculture) dinhmun a tha lo hle a, hnathawk awm tamna construction industry (contract-hna kan tih ang hi - in sak, kawngpui siam, lei dawh) than a thu rih tlat a, service sector (inbuaipuina lama eizawnna huang - dawrkai, hotel & restaurant, financing, insurance, etc.) dang zawng zawng an zawi raih a, ram danga thil/bungraw thawn chhuah lam pawh a tla hniam rawih a, eizawnna/hna peng hrang hrang dinhmun a tha lo hle hlawm a, pawisa tihthih (demonetization) khan economy-ah chhiatna nasa tak a thlen a, chhiahlak dan thar GST lah hi an lo ngaihruat dan a dik loh vang leh an kalpui dan a fel loh em avangin sumdawngten an buai phah nuaih nuaih hle a, tam takin an tlakchhiat phah a, mi maktaduai tel fein an hna an chan tawh a...,” tiin a ziak a. Thla li dan zela ram economy dinhmun pawh a hniam tial tial a, tuna pawisa kum kal mekah hian a tir thla li (April-July) chhung khan economy than dan chu 5.7% chauh a ni a, chu chu kum thum kal ta chhunga a hniam ber lai a ni nghe nghe, tih a sawi a. “Sorkar thupuangtute chuan ram sum leh pai dinhmun tlak hniam chhan hi pawisa tihthih vang kha a ni lo tiin an sawi thin a. An sawi dik. Mahse, pawisa tihthih (demonetization) khan a tizualkai hle a ni,” a ti bawk. Tun sorkar hian kum 2015 khan kum khat chhunga ramin sum a thawhchhuah zat chhut dan an tidanglam a. A hmaa chhut dan ang khan chhut ta ila chuan economy thanna 5.7% an tih hi 3.7% emaw a aia tlem mah a ni thei, a ti bawk. Ram chhunga company lian 40 lai sum leh paiah an tlakchhe mek a..thilsiamna tenau deuh (SME) an talbuai mek bawk niin a sawi a. Economy hi zan khat thil thua siamthat leh ngawt theih a ni lo a, hmalakna hrang hrangte pawh hian hun engemaw chen a duh dawn a....Lok Sabha inthlan leh hunah hian economy hi a insiam tha hmanin a rinawm loh thu te hial a ziak lang bawk. Sinho hi BJP hruaitu hlui mah nise Modi-a sorkar kalphung huai taka sawiseltu a nih avang hian a thuziak hian chai zui a hlawh hle a. “Finance minister-in a kihhnawk chungchang hi ka sawi chhuah loh chuan ram tana ka mawhphurhna ka hlen loah ka inngai dawn tlat,” ti a tawng chhuak ta a nih thu a ziak a. Eptu lam atanga sawi belhtu hmasa pawl zinga mi finance minister hlui P.Chidambaram chuan (twitter-ah tarlangin) “Yashwant Sinha hian thuneihna changtute chungchang hi thudik a sawi. Thuneitu lute hian economy hi a tlahniam zel tih hi an pawm tawh ang em?.... Thudik tluantling chu hei hi a ni : Thitithei ber berte hian engtiang pawhin ti vel mahse, thudik nge nge chu a ding chang thin,” tiin. Yashwant Sinha hian mi mal takin finance minister Arun Jaitley a bei na viau a, prime minister leh BJP president Amit Shah pawh a hmer tel bawk. An party hian a chungah hremna an lek a hlauh loh thu pawh a hnuah a sawi nghe nghe. A hma lawk hian Amit Shah hian economy tlak hniam chhan hi ‘technical thil’ vang a nih thu leh rei lo teah siamthat a nih tur thu a lo sawi a. Mahse, Sinha hian State Bank of India-in economy than a thut chhan hi ‘technical thil’ a nih loh thu an sawi chu a thuziakah hian a tarlang sak a ni. “Prime minister hian hnai tak atangin ram chhungah retheihna hmuh thin thu a sawi a. India mipui zawng zawngte pawhin hnai taka an hmuh ve theihna turin a finance minister hian rim takin a thawk mek a ni,” a tih te phei hi chu a mupui a Modi-a leh Jaitley-a a kahna a ni. Prime minister Modi-a kaihhruaina hnuaia BJP hruaituten an ngaihdan leh an hmuh dan pawh an sawi chhuak ngam lo ni a a sawi te phei hi chuan sawi zui a hlawh zual hle. NDA atangin rang takin an chhang nghal reng a. He thuziak chhuah ni chawhnu hian home minister Rajnath Singh chuan cabinet meeting zawhah thuthar thehdarhtute a hmachhawn a, Sinha thuziak hi chhangin India hi khawvela economy thang chak ber a ni mek tih hi tuma’n an theihnghilh loh thu a sawi lang a. Minister dangte pawhin sorkar chhan zawngin an sawi nak nak hlawm a. Finance minister Arun Jaitley pawhin a chhang nghal a, prime minister pawhin a sawi fiah bawk. Hetihlai hian global agency hrang hrangte chuan India economy tlahniam hi siamthat leh theih mai niin an ngai hlawm a. Kalphung tihdanglam leh siamthat hrang hrang - demonetization te, GST hman te hian rah tha a la chhuah dawnin an ring thung. Morgan Stanley (khawvel pum huapa sum chet vel dan zir chiangtu) pawhin Narendra Modi hmalakna hrang hrangah hian beiseina sang tak a nei a. IMF pawhin India ram hmasawnna hi a la chak leh thuaiin an ring bawk. Sinha thu leh hla avang hian India economy dinhmun dik tak puan zar ni lem lo chu mi thiamten an chai nasat phah ta a. Ram thang chak tak leh economy lian takin harsatna a lo tawk viau mai hi a siamthat hna thawh vat vat loh chuan buaina nasa zawk thleng thei a ni a. Chuvang chuan September 26 a prime minister-in a lo din tawh economist panga awmna awmna Economic Advisory Council pawh an thukhawm a, rawtna leh ruahmanna an siamte prime minister hnenah an thlen tawh a ni. BJP sorkar hi hmasawnna tuipui zet mai an ni a, an tum ang leh mipui beisei anga thil a kal loh a, ram sum leh pai dinhmun a tha lo a nih chuan an talbuai zui ngei ang le.