Zawhna: Septicemia hi natural disease (natna chi khat) a ni em? A septic tihna a ni mai em? A hming a\ang hian septic a nih hmel si a, septic dawn chuan thil thianghlim lo a luh a ngaih hmel bawk si a. Damdawi In inenkawl thianghlim loh vangin septicemia hi awm thei a ni em?

Chhanna: Septicemia tih hi kan hre lar ta hle mai a, thih chhanah pawh kan sawi ta fo mai. A awmzia ber chu kan taksa peng khawi emaw lai ber hrikin a tihbuai (infection) vanga chung hrikte chuan thisen zamah lutin kan thisen kal vel (blood circulation)-ah a \ai darh tihna a ni ber a, Sepsis tite pawhin an sawi fo bawk a, blood poisoning ti zawng pawhin an sawi tel bawk \hin. Chuvangin, Septicemia hi natna anga sawi lovin natna dangin a rawn thlen, infection control \hat loh vanga kan taksaa harsatna lo awm sawina (symptom chi khat) ang a ni tihna a ni.
Infection a lo awm reng reng hian kan taksa vengtu immune system kan tih maite hian control tumin timur (cells) chi hrang hrang bakah hrik thahna tur tuihnang antibodies kan tih mai leh chemical chi hrang hrang an siam a, chung chuan heng hrikte hi a lo do \hin a. Chu infection chu kan blood circulation-ah a \ai darh chuan kan taksain a lo do nasat luatah kan taksa pengte thlengin a tibuai a, hmun hrang hrangah vung (inflammation) a lo awm a, chu chuan kan organ chi hrang hrangah harsatna a thlen ta \hin a ni.
Thisenah a \ai darh takah chuan thisen khal (blood clots) tereuh tete lo insiamin chung chuan kan organ pawimawh a thisen supply a tibuai a, an hnathawh nana an mamawh chaw leh oxygen an tlachham a, hnathawk thei lovin (organ failure) an awm phah ta \hin a ni. Septicemia-ah hian kan thin (liver), kal (kidneys) leh lung (heart) te a effect hma a, kan lung hnathawh a buai vangin taksaah thisen a sem darh \ha thei lo va, kidney a lo fail a, BP a drop a, chumi han siam \ha tura khawl pawimawh liver a lo buai tel tho si chuan insiam \ha hlei thei lovin taksa a awm ta mai \hin a ni. Chutiang chu Septic Shock kan ti a, thihna lo thlen chhan ber a ni \hin.
Mihring hrisel \ha pangngaiah chuan infection tam zawk hi kan immune system hian a veng vat thei a. Mahse, eng emaw harsatna nei sa an nih chuan, entirnan zunthlum te, thin \ha lo te, lung lam chak lohna nei saah hian infection reng reng hi a hlauhawm hma bik a. Immune system chak lo sa, HIV+ te, cancer chemotherapy a enkawl lai ah te, ei leh in mumal lo, nutrition dawng \ha loah hian infection chi reng reng hi a hlauhawm hma bik em em a ni. Chutiang avang tak chuan damlo khumbet chi reng reng hian mi dang a\angin hri an kai hma bik a, hritlang nei chung phei chuan heng damlote hi hnaih loh hrim hrim a \ha kan ti fo reng a ni.
Infection kan han tih hian hrik hi chi thumah kan \hen hrang a, bacterial, fungal leh virus te an ni a, an vai hian infection an thlen thei a, control vat loh chuan septicemia hi an thlen thei vek bawk a ni. Eng emaw intihpalh vanga pem neihte hian, bawlhhlawh a kai a, enkawl fai vat a nih loh chuan vanduai vangin sepsis hi a thlen fo thei a, pneumonia, rilphir vung, zun kawng infection (UTI) kan tihte hi control \hat loh chuan sepsis a siam duh viau bawk. A bik takin immune system chak lo saah phei chuan pemte hi a pun hma hle a, sepsis a thlen hma bawk.
Kan sawi bakah hian kum naupang zual nausen leh upa lamah te, damdawi ina enkawl lai emaw damkawrah te, eng emaw natna avanga Steroid damdawi ei laiah te sepsis hi a awm hma bawk a, zunthlum nei control \ha loah phei chuan a awm duh em em a ni. Chuvang tak chuan damdawi inah hian fimkhur a ngai em em mai a. Damlo kantu hian damlo enkawl laite hrik kan kai belh thei a, a kantute ngei pawh hi immune system chak lo sa kan nih chuan damlote a\angin hri kan kai thei bawk a ni. Chutiang avang chuan infection control protocol hi damdawi inah chuan an ngai pawimawh hle bawk.
Kan immune system hi a \hain hri laka min vengtu sipai \ha em em mai a ni a. Chutih rualin sepsis a lo thlen tawh chuan hrik a lo do let nasat lutuk vangin kan taksa a tibuai hlauh thei a, control tel a ngai \hin a ni. Immune system hi vawn uluk a pawimawh em em a, ei leh in \ha (nutrition) te, taksa sawizawi uluk te, hunbi mumal hmanga invawn te, ruihtheih thil leh zuk leh hmuam laka insum te hi a pawimawh hle bawk a ni.