Damlo inentir chungchangah hian Doctor te kan fimkhur a ngai tawlh tawlh a, thiamna a sang kan tih rual hian damlote pawhin information an mamawh ang tam tak chu internet atangin an hmu thei a, hei hi hmasawnna anih rualin harsatna a siam fo thei bawk. Damlote'n kan hriat tur pawimawh tak chu GOOGLE hi Doctor ani lo tih hi a ni. In zawhna ka chhan kawngah hian internet ka hmang tangkai hle a, amaherawhchu kan doctor thiam zawk te ngaihdan ka zawt fo thin tih min lo hriatpui ve ka duh a ni. A chhan chu internet chuan theory a pe a, practical experience erawh a enkawltu doctor te chauhin an pe thei a ni. Fiamthu a an sawi ang deuhin "ka pi, i insawiselna hi kan bazar note ah a awm tlat lo" tih tur hi a tam hle reng ani. Kan rawn tarlan fo tawh thin angin mihring hi in ang kan awm lova, kum, san zawng, rih zawng in ang ah te pawh hian in an lohna hi a tam lutuk. Thenkhatin an ngeih em em kha a then chuan an haw thei tlat. Chuvang chuan damdawi ei kawngah te phei chuan doctor rawn hmasa lo chuan eng damdawi mah hi ei hmasa lo thei ila duhthusam a ni. Entirna han pe ta ila - Paracetamol hi nachhawkna kan ei common ber pawl a ni. Amaherawhchu thin (liver) hian a ngeih lova, thin function a ti buai thei a, chuvangin ei fimkhur a ngai hle a ni. Naupang leh kum upa lamah phei chuan fimkhur a ngai lehzual. Steroid damdawi lam chi te hian chaw ei a ti tui duh viau a, chaw ei tui nan leh thau nana hmang tawk an awm leh thin. Mahse a hman dan tur dik taka hman loh chuan taksa tan damdawi hlauhawm tak a ni thung. Damlo tam tak hian investigation an chawh te hi tul lo leh sum sen thlawnna angah an ngai fo a, a then lah an duhthawhin doctor chawh bak an lo tih belh fo bawk. Investigation hrang hrang te hi damlo te natna dik tak hriat chhuah theih nana puitu pawimawh tak an ni a, kan doctor te hian a tul lo chu an chawh mang lo; CT Scan leh MRI te phei chu a tih man a to a, tul fet ah lo chuan an chawh mai mai lo. Chutih rual chuan damlote hian kan inentirna doctor te hi zawhna zawt peih ila, engvanga he investigation hi min tih tir nge tih te zawt fo peih ila, tha taka lo hrilhfiah hi doctor te mawhphurhna ani. Treatment chungchangah pawh damlote hian kan hriat tur pawimawh tak chu eng ang enkawlna nge ka dawn tur tih kan hre chiang/zawt chiang peih tur a ni. Zai ngai chi anih phei chuan doctor dang ngaihdan (second opinion) kan la thiang a, duhthlan tur dang a awm leh awm loh te (options), chu enkawlna ka dawn tur chuan enge a thlen theih (dam hlenna nge tih ziaawmna) te thlengin zawh fiah nachang kan hriat a pawimawh hle a ni. Man chawia i inentir anih ngat phei chuan heng information te hi i neih ngei a pawimawh a, i remtihna (consent) i sign dawn anih ngat phei chuan a theih ang china chiangin i dinhmun i hre hmasa ngei tur a ni. Zawhna in zawh peih hian doctor te pawhin hma kan sawn phah zel ani tih min hriatpui kan duh a ni.