Tunlaiah Nula tam takin  "Kan man hi cheng 420 a nia, ti a sawi hi an awm ta fo mai, hei hi an hriat chian loh vang a ni ngei ang," Pipu hunah chuan cheng 420 hi a hlu hle ang, tunlai hian a hlutna a nep chuang reng reng lo.  

Nula Pa in Man pui atanga mantang a sem hi cheng 20/50 diat diat pawh nise a hlutna hi a nep chuang lo. Pipute hun pawisa hlutna tunlai hun a pawisa hlutna nen in ang lo mah se, a thil tih tum leh tih theih kha a nep chuang hauh lo. 

Nupui man hi mihring hlutna in lei sakna a ni ber lo.  Nupa  in-siamna hmanga chhung leh khat te inzawm ngehna hmanrua 'Saui tanna hmanrua a ni zawk'. Thenrual tha te insuihngehna hmanrua ah an hmang zawk a lo ni. 

Tin, man ei hi nu leh pa ten an fanu tuam hlawmna hun hnuhnunga ngaihna ringawt a awm thin. A nihna takah chuan a tuam hlawmtu tur leh chhung leh khat leh thenrual tha ten pasal nei tur thlavang hauh a ngaih huna thlavang hauhtu tur insiamna a mawh latu tur insiamna, a ni tel bawk tih hriat a tha.  

Man hlanna a hmeichhe chhung ten an pawisa dawn atanga Thutphah cheng 20 an pek let leh hi hmeichhe lam phalna tel lo chuan mipa lam in an duh hunah thutphah cheng 20 chu an pe let ngawt thiang lo bawk. 

He THUTPHAH hi pasal neiin a pasal te In-a a hlutna vawnghimtu a ni a, mak chhiat  pawh tawk se he Thutphah hmang hian a thuamchhawm luh a hawn let leh vek thei bawk,  tin a chhe ber Uire na pawh tawk mah se, he Thutphah hi kawng tam taka a invenna neih ve  leh a hlutna vawng himtu a ni, mi tam takin Uire chu a pasal In atanga saruaka hnawh  chhuah theih emaw an ti thin, Thutphah hian Hmeichhe hlutna kha a vawng him tlat a ni tih  hriat kar tur a ni.

Pasal chu mi sual tak, Nupui velh ching leh Zu ngawl vei, nupui sawisak ching lo ni ta se... Hmeichhe chhung ten, "Mai mai chuan, a ta a ni hlei nem, man pawh a la pe tlak hlei nem, a nawm a maka a tih theih a ni lo,"  tiin an fanu/farnu thlavang hauhna hmanrua ah Thutphah chu an hmang thei bawk.  

Kan Pipu te kha an lo fing in  thil hi an lo chhut thui hle zawng a lo ni. He dan hi  tun lai inneih ah pawh a la nung reng.

April 28, 2022 khan ka  fanu in pasal a nei a, man  hlan hi khawi hall-ah emaw tih tum in an rawt ngar ngar a, ka duh lo bur (duh chuan mi chuan ti se, ka sawisel lo).  A hmingin In chhe te ka nei ve a, ka fanu man chu ka In-ah ngei ka dawng tur a ni, ka ti tlat a, kei a-hminga Ration Card-a hming chuang hmasa ber ta nana chuan ka ti tlang thei ta hram 

"Man eitu an leng lo ang te an tia,  "Mizo dana man eitu diktak ten an ei dawn a,  mi 40 awrh kan ni ang," ka ti a, "Kei Mizo culture vawngtu Department-a kum 39 thawk tawh ka ni a, Mizo dana man ei hi ka pel dawn lo," ka ti ve tlat.