A pasal chuan a ringhlel tlat a. Engmah awm si lovin a melh rum a, kut a thlak a, chemtein a vau a. A ruih chang phei chuan thenawm khawveng zawng zawng hriat turin a ang phiar phiar tawh mai thin si. Tlai tin mai hian thin phu dep depin a awm a. Enge lo thleng dawn a sawilawk theih thin si loh. Naupang ho nen chuan kawngkhar lam chu ti dekin an melh ru zauh zauh a, thlamuang taka mut siai siai zan a van vang em! Han inthen dawn se karah fanau an awm diah tawh a, fahrah tir mai chu a ngai ngam si lo. Beidawnna avanga indawm kun chung leh rilru na avanga mittui tla chungin a a tuar tlawk tlawk mai a ni. Pasal chu nupuite hmangaihtu tur, an thlamuanna tur, an mangan lai ber pawha awma kuah beta an mittui hrufaitu tur kan nih laiin, nupui fanaute tithlabartu, sawisatu, vautu, rilru tinatu zawkte hi kan awm thin a ni awm e! Nupuite hi pasalte zah tur, an thu awih tur, pasalte tizahawmtu, rawngbawlsaktu tur an nih laia pasal zah lo tak, pasal te che hlek apianga dik lo hmua sawiseltu, inchei taka leng mai mai, rinhlelh loh theih loha khawsa kan tam ve bawk a ni mai thei e. Hmeichhia hi vau ve ngai deuh chu an awm pawh a ni mai thei. Upain, “Hmeichhe vau loh leh vau vau loh chu an pawng tual tual,” an lo ti ve tlat! Kan inneihna hi zahawm se la, kan inngaihzawnna hi reh lo se la, mipa leh hmeichhe inneihna hi hmuhnawm se la, kan in chhung hi a lo nuam ang. In chhung nuamin veng nuam a siam ang a, veng nuamin khaw nuam, khaw nuamin ram nuam.. Tunlai hian mahni anpui ngaizawng leh innei duh ta hial maite an tam kan ti maw? Hetianga mahni anpui ngaizawnga nei duh ta mai hi mihring awm dan phung pangngai a ni lo tih hi mi tam zawk ngaihdan a nih avangin a chhan an lo zawng tawh thin a, an lo zir bing fo tawh. (Zir bing ngai, chhui ngai a nih chuan thil nih phung pangngai a ni chiah lo tihna chu a ni. Mipa leh hmeichhe inneih chhan hi tuman an zir bing ngai tlat lo!!) A chhan hrang hrang zinga pakhat hian ngaihtuah a tithui! Inneihna hmuhnawm lo kara seilian naupang zingah mahni anpui ngaizawng an tam bik zuk ti a! Inneihna hi a hmuhnawm a, a hlimawm a, a nawm hmel chuan naupangin mipa leh hmeichhe inneihna hi an pawm thlap a, nawm hmel an ti a, an nu leh pate anga nupui pasal neih ve an chak thin. Inneihna hahthlak, hmuhnawm loh leh hlimawm lo kara seilian hmeichhe naupang chuan mipa neih a hlau thei a, mipa naupangin hmeichhe neih a hlau thei a, a hlauhawm lo zawk nia an ngaih an mahni anpuite lamah an rilru an pe ta thin a ni awm e. An taksa insiam phunga mipat hmeichhiat chakna rilru awm ve tho chu an anpuite lamah a thanglian ta thin e an tia lawm! Nupa nun hlim, inneihna hmuhnawm leh hlimawm tak kara seilian naupangte hi an rilru a hrisel a, mahni an inring tawk a, mawhphurhna an la ngam a, an hlim a, ruih theih thil leh mipat hmeichhiat hman khawloh lakah an fihlim bik tih hi zirnain a hmuhchhuah a ni zel. Kan ramah rilru hrisel lo, thalai thatchhia, ruihtheih thil ti mi, mipat hmeichhiatna hmang dik lo kan tam a nih chuan inneihna hmuhnawm lo, hlimawm lo a tam tihna a ni ang em?