Inneihna leh chhungkaw nun, Rilru khawih thawnthu

Malsawmzuala Ralte - Jun 01, 2022

Engtia han sawi chhunzawm tur nge ka hrethiam lo hle. Mahse, ka ruahmanna chu hrilh ngei tul ka ti si, inthen ka duh a ni. Ka sawi tur chu zawi muang fan takin ka han sawi a, ka tawngka chuan a tidanglam lem lo, zawhna min zawt a, “Engati nge?” Chhanna a dawn loh avangin a thin a rim hle. Chaw eina chopstick chu paihin ring takin, “Mihring pawh i ni hrep lo ve,” min ti a. Khami zan khan kan inbe zui lo.....

Khami zana in ka thlen hnu khan, ka nupuiin zanriah a siam chu kan kil a, a kut chelhin, “Thil hrilh tur che ka nei,” ka han ti a. A thu a, ngawi rengin zanriah chu a ei a. A mitmeng atangin tawrhna ka hmu thei. Engtia han sawi chhunzawm tur nge ka hrethiam lo hle. Mahse, ka ruahmanna chu hrilh ngei tul ka ti si, inthen ka duh a ni. 

Ka sawi tur chu zawi muang fan takin ka han sawi a, ka tawngka chuan a tidanglam lem lo, zawhna min zawt a, “Engati nge?” Chhanna a dawn loh avangin a thin a rim hle. Chaw eina chopstick chu paihin ring takin, “Mihring pawh i ni hrep lo ve,” min ti a. Khami zan khan kan inbe zui lo. A inhnit faih faih reng a. Kan inneihnaah hian eng thil nge lo thleng ta tih hriat a duh tih ka hria. A lungawina tur khawp chhanna erawh ka pe lo, ani ai hian Dew-i ka thlang tawh, ka hmangaih tawh lo va, ka khawngaih chauh tawh a ni. 

Rilrua inthiam lohna thuk tak nei chungin inthenna lehkha chu ka ziak a, kan in leh car, kan company a neitu nihna zaa 30 a chang bawk ang. A en vang vang hnuah a pawt sawm ta vek a. Kum sawm zet ka nupui ni a, ka kianga awm tawh chu ka lakah mi hrang mai a ni ta. A hun, tha leh zung a khawhral tawh ka ngaihtuahin pawi ka ti hle, mahse, Dew-i ka duh zawkna chu ka lamlet thei tawh lo. A tawpah ka hmaah chuan ring taka rawl chhuahin a tap ta a, chu chu ka beisei sa reng a ni bawk. Ka tan chuan thawl hawkna pakhat a ni. Hun engemawti atanga inthen duhna rilru ka lo put tawh chu tunah chuan a chiang leh zual tain ka hria. 

A tukah chuan ka haw tlai hle a, dawhkana thil ziakin a lo thu a. Chaw ka la ei lo naa, Dew-i nena hun kan hman avangin ka chau bawk a, khum pan dingin ka mu nghal a. Ka thanharh chuan dawhkana thil ziakin a lo la thu ta reng tih ka hmu a, engteh uala ngai lovin ka mutthilhsan zui leh a. Zingah chuan inthen dan tura a ruahmanna chu min pe ve ta thung a : engmah ka hnen atangin a duh lo, inthen hmaa thla khat hun pek erawh a duh a. 

A ngen ang chuan thla khat chhung chu nun dan pangngai thei ang berin kan nung a ni. A chhan pawh kan fapa chuan rei loteah exam a hmachhawn dawn a, inthenna boruakin a chim buai a duh lo a ni. Chu chu ka remtih pui thlap. Mahse, chumi bakah chuan ngen dang a nei, kan inneih ni a kan nupa room tura ka pawm luh kha mitthla let turin min ti a. Thla khat chhungin tuk tin kan bed room atangin kawngkhar thleng ka pawm chhuak ziah ang. 

A ti ho mai mai ka ti, mahse, kan nupa hun hnuhnung pangngai taka hman a nih theihna turin a ngenna mak angreng tak chu ka remti ta a. Kan inremna chu Dew-i ka hrilh ve a, ring taka nuiin atthlak a ti hle. “Eng kawng pawhin fin kherek chhuah tum sateh mah se, inthen a hmachhawn tho tho dawn,” hmusit rilru tak chungin a ti a. A lang a pauva inthen ka duhna ka tih lan hnuah, ka nupui nen hian taksa inkhawih, innawk emaw insik kan nei ngai ta lo. A ni hmasaber a ka pawm chhuah chuan, kan lai dun angreng hle. A nu ka pawm a hmuhin kan fapa chuan, “Ka pain ka nu a pawm e,” tiin hlim takin kut a lo beng a. A thil sawi chuan min chhun deuh zawk a. Bed room atangin sitting room-ah, chutah kawngkhar thlengin ka nupui chu meter 10 vel ka pawm a. Maimitchhing a zawi tein, “Kan fapa hi inthen chungchang chu hrilh miah suh,” lungawi vak lovin ka lu ka bu a. 

Kawngka pawn chiahah ka nghat a, a hnaa kal turin bus a chang zui a. Keimahin office lamah ka inkhalh ve nghal bawk. A ni hnihnaah chuan pangngai takin kan inpawm a. Ka awmah beiin a kawr hak rim chu ka hre thei. He nu hi chiang taka ka en lohna a rei tawhzia ka ngaihtuah chhuak zawk. Nu valai tak a ni tawh lo tih pawh ka hre thei. A hmai a chuar tan a, a sam a tuak bawk! Kan inkar boruak tha lo tuartu a ni ngei mai. Hun rei lote chhung chu, ‘eng nge a chungah hian ka tih tak mai’ tih ka ngaihtuah a. A ni linaa ka han pawm kan chuan, inngainat tawnna a  rawn awm leh tan tih ka hre thei. He nu ngei hi a ni kum 10 chhunga a nun ka tana hlan tu. A ni ngana leh ni ruknaah chuan, kan inngainat tawnna a lo thang leh zual ta. Dew-i erawh engmah ka hrilh lo. Thla a vei meuh chuan pawm kual vel pawh ka awlsam tawh hle. Ka nitin hna a nih avangin ka lo chak ve ta sawt pawh a ni maithei. 

Tuk khat chu a thawmhnaw hak tur thlangin a buai hle mai a. Eng emaw zat a hak chhin hnuah pawh hak ber tur a thlang fuh thei lo. Thawk halh pahin a thawmhnaw zawng zawng chu a tan a len vek tawh thu a sawi a. Rang takin a lo cher tak zia chu ka ngaihtuah chhuak a, pawm kual a awlsam chhan pawh a ni ngei mai. Chu chuan ka thinlung a chhun zawk a. Rilru natna leh hrehawmna a chhungrilah a pai a ni. Ngaihtuahna vai deuh ruai chungin a chal  ka’n khawih a. Chutih lai tak chuan kan fapa lo lutin, “Ka pa, ka nu i pawm chhuah a hun e,” a rawn ti a. Ani tan chuan kei, a pa-in a nu ka pawm chhuak thin chu a nuna thil pawimawh tak a ni tawh a ni. Ka nupui chuan kan fapa chu kal hnai turin a han zaizir a, nghet takin a lo kuah vawng vawng a. 

Ka rilru ka thlak leh ang tih hlauvin lehlam ka hawisan ta daih. Tichuan, ka kuta pawmin bedroom kan chhuah san a, sitting room lamah kan kal zel a. A kutin ka nghawngah zawi leh titak deuhin min kuah a. Kei pawhin nghet takin a taksa chu ka kuah a, kan inneih ni ang chiah kha a ni. Amaherawhchu, a taksa zang ta em em mai chuan min tihrehawm hle. A ni hnuhnung bera ka han pawm kan chuan, ke pen pui harsa ka ti hle. Kan fapa school a kal tawh a. Nghet taka kuahin heti hian ka sawi, “Kan nunin inngainat tawnna a tlachham hle tih hi ka lo ngaihtuah ngai lo a ni.” 

Office-ah ka inkhalh phei thuai a, hmanhmawh taka car atanga tlan chhuakin a kawngkhar pawh ka kalh hman lo. Chhete a muanchannain ka rilru a tidanglam leh ang tih mawlh ka hlau a ni. In chungah tlan chhovin Dew-in kawngkhar a lo hawng a, “Dew, a pawi ka ti hle mai, ka nupui then ka duh lo.” Mak ti taka min enin ka chal a rawn khawih a, “Khawsik i nei em ni?” Ka chal a dawmna kut chu vai kiangin, “A pawi khawp mai Dew, then ka duh lo a ni.” Kan nupa inkar chu kan inhmangaih tawn tawh loh vang pawh ni lovin, thil te tham ber thlenga inngaihhlut tawn nachang kan hriat loh avanga khi lo awm a lo ni. 

Tuna ka ngaihtuah chhuah tak chu kan inneih ni-ah kan inah ka pawm lut a, thihna-in min then hma chu chelh reng tur ka lo ni si. Dew-i chu a rawn harh chhuak thut a, na taka min bengin kawng a khar ri thuai a, a tap zui bawk. In hnuaiah chhukin ka inkhalh chhuak zui a. Kawng sira pangpar dawrah chuan ka nupui pek tur pangpar ka lei a. Min buaipuisaktu nula chuan pangpar bawra lehkhaah chuan eng nge a ziah ang tih min zawt a, ka nui a, keiman ka ziak ta a, “Thihnain min then hma chu tuk tin ka pawm chhuak ziah ang che.”

Khami ni tlai lamah khan pangpar bawr keng chungin hlim takin in ka thleng a, hmanhmawh baklengin in chungah ka tlan chhova, nunna nei tawh lova khuma muin ka nupui chu ka han hmu ta a ni. 

Kan nuna thil te tham tete hian nupa inlaichinaah awmze thuk tak a nei a ni. In leh lo, motor, thil hlu dang leh bank a pawisa neih zat lam a ni lo. Heng thil hian chenhona boruakah hlimna chu a thlen thei ngei mai; mahse, hlimna tluantling an thlen thei lo. I kawppui tana thian tha ni la, thil te tham te te, inngainat tawnna thlen thei tur ti thin ang che. Nupa hlim lo ni mawlh teh u.

Share now