Nula tap, tlangval sual ka va hmu hnem tak! A chhan ka hre deuh..

He hmeichhe mangang manganna hi a manganthlak ve ka ti! “Ka pu, nula tam tak an chesual ve loh nan leh mipa tam takte an inngaihtuah harh ve nan kan chanchin hi ziak rawh, tarlan ka phal e,” a tih miau avangin kan sawi ang e aw.. Nula leh tlangvalte u, lo inring ru aw..

Kum 3 zet an inngaizawng a, tih loh loh an ti teuh tawh pek! Chetsual nawn leh pawh a duh tawh lo thin a, Pathian a hlauhawm tih pawh a hre ve naa, an thleng thui laklawh tlat tawh si a, han tan leh tlai khawhnu pawh chu a rem fo tawh lo. A rai ta nge nge a. A bialpain, “Titla rawh, ka hmangaih che a, kan la innei dawn tho alawm, ka la inpeih lo deuh si a,” a tih avangin sual tawh chunga sual nawn leh pawh chu ‘hmangaihna avangin’ a pawi ti leh ta lo a. A bialpa chu a hmangaih miau si a!

Mahse chutia hmangaihna avanga Lal pawh hlau zo loa pawi chi tin a khawih hnuah chuan, hmangaihtu nia a hriat chuan a be duh ta hauh lo a, a ngaihsak ta lo reng reng a. A mang a ang a, vawi tam tak biak a tum a, thu a thawn a. A tawpa a chhanna hmuh chhun chu, “Hun min pe rawh, ka hmangaih leh hmangaih loh che ka inngaihtuah dawn!” tih zuk ni a!! A va nain a va rapthlak em!!

Hmanah sex hmanpui tura a sawm hmasak tuma a duh loh viau lai khan a hmangaih zia thu kha a hmatheh ngei tawh asin! An nawn dawn apiang khan biahthu di lungkuai a chham ziah tawh a nih si kha! A duh chiah lo chung a sual luih apiangin hmangaihna a chhuanlam ziah a. A mualphona tur hliahkhuh nana nau titla tura a ngen lai khan a hmangaih thu a chham ngei si a. Tunah eng tiziaa han inngaihtuah dawn ta chauh chu ni leh ta ngai?

An hun kal tawha an thil tih zawng zawng kha a dik lo tih hre chungin, ‘hmangaihna’ avangin mittui nen a paltlang zel a. Hmangaihtu nia a hriat ‘hmangaihna’ chu engkim a huam phah zel tawh asin! “Ka hmangaih che nge hmangaih lo che tih ka inngaihtuah dawn,” han tih tlaikhawhnu leh si chu a tan tuar a har em a ni! Engtin nge a awm tak ang le? A inngaihtuah chhung chuan engtia lo awm tur nge? A ngaih titha tur tal pawhin a be tha duh tawh si lo. Nghah loh theih ni si lo, nghah chhuah tur awm dawn nge awm dawn lo tih hre si lo mangang chu a van ruai ruai ta mai a ni.

He pa hi ka dem a ni. A demawm a ni. A hmangaih leh hmangaih loh inngaihtuah san leh tur si hi a thlenpui thui em mai. Kum thum ngaihzawng, engkim tihpui tawh laka a rilru la siam fel thei lo khawp a rilru chak lo lutuk hi a pianpui rualban lohnaah ngaihsakin hmusit phal ta lo pawh ni ta ila, tawngkam leh tisa thila a che rang leh viau lawi si hi a huatthlala a ni.

Hmangaihna hi vawi khat inhmuha piang a ni vek lo ngei e. Hun a duh ve fo alawm. Dam chhung kawppui tur atana thutiam hmain inngaihtuah fim pawh a tul fo ta ve ang. Mahse, chu ‘waiting period’ laia tu emaw nun lo tihchhiat vek kha ‘thihpui khawp sual’ niin ka hria! A hmangaih leh hmangaih loh nghah chhung khan a kutte pawh lo vuanin, a biangahte pawh lo chuk ve zauh se thil awm lo lutuk pawh a ni lo ang. Kohhran pawhin an phuar bik nang maw le! Mahse, engkim tihchhiat hnua hmeichhe thinlung kehsawm kalsan lehtu hi zawng, Salem thar lama in hmun a ‘patta’ ve duh a nih pawhin a beih ve fe chu a ngaih ka ring! Tlawn lungawi tur an hraw dawn tlat!

Tlangvalte u, nula rilru tha tak takte hi dim ve teh u! Khawih chhiat hi tum reng teh suh u! I duhtawka i sawp hnu i kalsan leh si hian a chanin maian chan pawh a tluk lo mai dawn asin! Engati nge maw in sual a, in h… riau mai reng hlawm le aw!! Nulate thil hlu, an thianghlim mawina hi hlutin zahsak ve teh u aw! In neih leh duh si loh hi engah nge maw thliah phet in tum le! Thil pawi in khawih hma khan a tawp in thlenpui thak duh khawpa in hmangaih leh hmangaih loh ngaihtuah fel hmasa tawh teh u aw! In inngaihtuah tlai hret thin e.

Nulate u, bumin awm suh u. In rilru hi a tha a, in ngaihtuah hi a tawi si a. Hmangaihna leh sex hi kal kawp ngei ngei turah in ngai a. Mipa hian an thliar hrang thei tih hre teh u. Bum fin theih loh an sawi ang mai! Hmangaihna chhuanlam dek dek tawh bulah chuan thingthi nghal rup zel hlawm mai! In hlutna ber hi hlut nachang hre teh u.

An hmangaih leh hmangaih loh che u an inngahtuahsan leh fo dawn che u a nia aw! Mipa tam tak hi an taksa a chak anga en chi an ni lo, an rilru hi a chak lo tlat zel a nia!! Nangni lah engkim pawi tawh hnuah in inchhir tlai khawhnu leh lawi fo si! In mittui engzat pawh far se tlen fai zawh loh tur ser nung a awm hman palh ang e.

Inngaihtuah chhuak tlai thei hlawm dun si!! Hui ham..