Zawhna: Ka pu, tleirawl kum 20 mi hmeichhia ka ni a, nikum lamah bathroom-ah ka tlu a, ka insawhna lampang a nih ka ring a, ka mawngkaw zawn hi a rawn na a, chuan tai lamah a rawn na tel ngei ngei zel a, hei hi engtia enkawl chi nge ni ang?  Khawngaihin min hrilh thei em?

Chhanna: I intihpalh hun hi a rei phian tawh a, a tir lamah tuna i insawisel ang hian i awm tho em tihte i sawi lo va. I sawi hmang atang hian i ngum emaw mawng zawn eng emaw lai ber i sawh a nih hmel a. Thil dang engmah insawisel i nei tel lo a nih chuan insawh vanga eng emaw tihpalh pawh chu a rinawm ta ber a. I kawng lam i sawh fuh lote a ni thei a, ruh lam a nghawng a ni thei a, tai na i sawi tel avang hian i chhul lam sawh nghawng a awm tel a ni thei bawk.

Insawh palh chi reng rengah hian ruh emaw, tihrawl emaw, tha inhliam te, thazam (nerve) lam a khawih pawi tel em tih te a ni a. Chumi tur chuan X-Ray emaw, CT Scanning emaw a tul thei ang. Tai na i sawi tel avang hian i chhul, chibawm leh phing lam a nghawng em tih hriat nan Ultrasound pawh ti tel thei ngei la a tha hle. Ruh lam doctor-te pawh lo inentir thei la chu a tha viau mai.