Dr Hrekima Titi

INTHAWINA AIIN THUAWIHNA

Dr. C. Lalhrekima - Jun 05, 2021

veng 14 bikah hian sample 15,837 lak a ni a, positive 2,522 an awm | Hri kaite hnu an chhui zuinaah tute nge, engtia awmhote nge kai zui ta bik tihte kan en

Tun hnaiah khan Police Contact tracing Team leh  Covid19 tamna veng 14-a contact tracing an tih dante zirchiangin veng hrang hranga LLTF te nen kan titiho va. Heng veng 14 bikah hian sample 15,837 lak a ni a, positive 2,522 an awm a. Hri kaite hnu an chhui zuinaah tute nge, engtia awmhote nge kai zui ta bik tihte kan en a. Thil ngaihnawm tak tak kan hre chhuak nual mai.

Tute emaw nena an inhmuh lai leh, khawiah emaw an kal tuma thuawih taka hmai tuam a, kut tithianghlim zui zel hoah tumah inkaichhawng an hmu lo, veng 14 ah hian! Inkaichhawng tam ber chu inawmchilh rei, inhmu zing, hmaituam reng remchan bik lohnaa (chengho) awmte an ni tlangpui. Building pakhata chhungkaw hrang hrang awmnaah te, chhungkaw bilah te leh, in inhnaih, hung chhung khata chengho zingah inkai darh a nasa zel tih an sawi bawk. 

Chhungkaw bila awm hian hmai tuam reng a theih bik loh va. A chhuak vak apiang hi va fimkhur reng se a tha. Chengho ni lo, in inhnaihte leh hung chhung khata awmho inkaidarh hi thuawih loh vang a ni pakhat tih an lo sawi zel. Sawrkarin building khata chengho pawh inlenpawh loh tur a tih laiin hmai tuam lem loa lo inlenpawha lo awmho zingah an inkaidarh zel tlat niin an sawi. Fimkhur tak zingah pawh kai ve zauh chu sawi tur an hre tho e. 

Thuawih hi a that tehlul nen a harsa kan ti fo. Kawng peng thuam te deuhah ‘no entry’ tih intar hmu reng chung a, mi tlem lai leh zan rei a nih tak avanga tlan lui ta hramte hi ka hmu zauh thin. Pulit-in min man dawn loh avang leh hremna pumpelh thei dawna kan inhriat avanga dan bawhchhe ta mai te,  miin min hmuh loh vanga tih thiang lo ti ta mai te, kan mualpho dawna kan rin loh avang ringawta thuawih tluantling duh ta lote hi kan ni fur mai si, mihring te hi! 

Pathian thu hi awih tur a ni. Sawrkar thu hi awih mai bawk tur a ni. Nu leh pa thu hi awih ngei tur a ni bawk. Malsawmna a awm vek.

Pathian thu awih loh hmasak nghawng kal zel avanga mangang leh buaite hi kan tam khawp ang. Mangan hnuah tanpuina zawng a, Pathian ngei pawh au leh ruai si, rilru nawi viau bawk si, beiseina hmuh loh avanga mi dang leh Pathian ngei pawh dem let leh hlauhte hi kan tam viau ang em? 

Pathianin Saula chu Israel lal atan a ruat a. Amalek-ho nen an indo tumin Lalpa thu a awih kim ta lo a. Amalek thil engkim tihboral vek tur a nih laiin an tihlum kim duh lo a nih kha. Saula chu a insawi thiam viau roh a. “Thu ka awih e. Pathian hnena halral thilhlana inthawi zuina tur tlem kan rawn hawn mai chauh a ni,” tiin Pathian lawmzawng titur zawkah a inchhal a. Pathian erawh a lawm hauh lo thung. Lal atana Saula a lo ruat chu a inchhir ta a ni.

“Lalpa chuan Lalpa thu zawm chu a lawm angin halral thilhlante leh inthawinate hi a lawm em ni? Ngai teh, inthawina aiin thuawih chu a tha zawk a,” tih kan hmu zui. (I Samuel 15:22) Saula chuan inchhirin ngaihdam dil ngial mah se amah thlaktu turin Davida chu hriak thih a ni zui ta tho.

Roreltute hi Pathian ruat an ni. Dan hi roreltute siam a ni. Dan zawm hi mipui damna tur leh himna tur a ni zel. Covid chungchanga inkhuahkhirhna dan siamtu nih hi a huphurhawm dawn hian ka hria. Dan siamtute thurawn petu nih ringawt pawh hi a buaithlak duh hmel ka ti. Daktawrin kan him nan inkharkhip an rawt a, kar nga zet han inkhuahkhirh takah chuan a rawttute kan dem ta luai luai a. Mipui, ei leh bar zawngtu mangang tawhte dinhmun ngaihtuah chungin inthlahdul hret an rawt deuh nia kan hriatin kan sawisel leh luai luai bawk si!!

Kohhran hi an zahawm ber mai ka ti. Inkhawm an chak dawn tehlul nen! Tawngtai inkhawmte an duh dawn nen! Sawrkar thu hi an zawm thap mai a. Inthawina aiin thuawih hi Lalpan a duh tih an hria a ni. Tunlai tawngin let ta ila, inkhawm leh tawngtai ringawt aiin thuawih phawt hi Pathianin a duh tih an chiang hle a niang! 

Lockdown zui zel emaw, thlahdul hret emaw pawh ni se, mi tin hian kan himna tura invenna an sawi, a saptawng taka Covid Appropriate Behaviour an tih hi thuawih takin zawm ila chu kan ziaawm zel ang. 

Engpawh thleng se, sawisel ringawttu nih aiin mahni nun theuh inthununtu ni mai ila, mi demtu ni loin mi dangte puitu nih tum theuh mai ila, covid khawvel thawpikthlak tak karah hian hlimna a awm zel ngei ang. Sawiselna aiin thuawihna, demna aiin inpuihtawnna hi kan thatpui zawk ang.

   Tul hle a nih loh chuan chhuak lo la,
    Hmai tuam la,
    ️Kut tithianghlim la,
    ️Mi dang nen hlam khata inhlatin awm ang che.

Share now