Aizawl Khawpui tui lâkna Tlawng lui fintu kawr then fai beih pui thlaktu te hi i lo hre ve tawh em? Kumin February 2024 khan mi thahnemngai kalkhawm te chuan 'Save The Riparian', pawl an din a, Riparian chu JF Dictionary-ah chuan 'riparian: (raipêrian), adj. luikama chêng' tihna a ni a, kan lui dung leh a chhe vêl tawp lutuk chu veiin then fai hna an thawk a, phut let engmah nei lova pen chhuak te hi an entawn tlâkin an hnathawh hi a ropui tak zet a ni. Mihring kan pung zel a, a ken tel chu hnawm a pung ve zel tih hi a ni. Thil reng reng hi a awm lohna tura a awm hian bawlhhlawh a ni a, bawlhlawh paih dan kawnga kan harh thei miah loh chhan hi eng vang nge ni ang le? Tun dinhmun thlir ila, kan rama lui kan neih te enkawl leh mahni ta anga chei thiam tumah kan awm lo te hi in enfiahna tur kan nei. Lui kam leh a chhe vêla chêng te tan pawha chenna tlâk loh hiala kan chhuah ta mai hi in enfiah kan tul ta hle mai.

Mi hmuha mawi chauha thianghlim kan tumna rilru hi siam that kan ngai a, a pawi chuang lovang ti a, ngaizamna rilru kan nei zel hi a pawi ber mai chu a ni. Bawlhhlawh paih Motor hmangin kalphung kan thlak tan a, a paih ve ngailo te hi luikawra paih thin an ni tih hi hai rual a ni lo. Hmun rual rem lova khawsa ta na na chu luikawra paih mai kan awlsam a, a hnua a nghawng let tur kan dâwn pha meuh lo. Kan lui tlân ber Tlawng lui fintu kawr then fai heti taka a ngai ta mai hi tudang vang a nilo, nang leh kei vang a ni. Bawlhhlawh a bawmah paih ila, a awmna hmun turah zel kan paih chuan hetiang hi kan thleng lovang. 

Fiara tui thiangtê tia in­chhuang taka Hla pawha kan phuah hial hi in tlak lovah kan chhuah zo ta, lui kawra bawlhlawh paih kan chin chhung chu hetiang then fai tur hi a awm zel dâwn a, mihring chauh lo chu zirtir an ngailo tia hla thu in a lo sawi ang khan a tha lam kawng zawh tal hi chu i in kawhhmuh zel teh ang u. Save the Riparian te hmalakna hi awm hmun atang pawhin kan thlawp thei a, kan tana inpe an ni tih hi hre reng ila, tun a chinah chuan kan ze thalo in siamthat har silo hi sim hram i tum ang u khai. Pawn lam lan dan ringawtah buai lo ila, kan bawlhlawh paih danin kan mizia a ti lang tih hi i hre thar ang u. 

A la tlai lo e, Pathian hian mihring te chauh hi a hmangaih lova, 'khawvel' a hmangaih em em a, mihring te hian kan mihrinna leh kan chungnunna hi kan hman thiam a ngai hle, kan chheh vela nungcha te thlamuang taka an len ve theih hi kan mawhphurna a ni tih hi kan inhrilh nawn fo a va tul em. Pathian in a thil siam te chunga thu neitu turin Mihring te min siam a, mihring min siam hma hian nungcha te hi he khawvel ah hian a lo dah hmasa a, mihring te thian turin leh an chunga thu nei turin min siam a ni tih kan hmu a, an tan hian thian nih kan tling em? tih hi i in zawt fo ang u. Kan chheh vêl boruak thlirin an chunga thuneitute hian an chenna hmun kan ti tawp em em a, kan duh lo leh hnawh lui zel mai hi chu insiamthat tur kan va ngah em! Pathianin a duh takin, ama an pui ngeiin min siam a, nungcha te leh ramngaw humhalh a, enkawl a, an ni laka thunei turin min duang a, keini erawh chuan kan chungnun zawk na kan hmang thiamlo fo thin, hei hi siamtu pawisawina lian tak a ni.

Mahni ramchhung a thil hlu te hlut nachang hre lo a, ti chhe tu leh suat tu kan la awm belh zel chhung hi chuan ram changkang nih hi kan la hlat hle. He ram kan neihchhun hi kan duatthiam a, a chhunga cheng nungcha te nen a cheng zà ho tur kan ni tih hi hre reng ila, an tána hnawk sak i tum lo ang u. Save the Riparian hmalakna hi thlawp zel ila, intih hmuh tha ber chi a niin ka hria, phut let nei miah lo va kan ram tána thawk tute inpekna hi a ropui in an fakawm tak zet a ni. A tha lam chu i INTIH HMUH zel ang u aw!