Pathian thu hriltu, inla fêkfawn tak taktena thalaite min hauh nâna tawngkam an lek lâr tak, an duh hun huna an chelek sek, ‘It’s my life an ti alâwm…’ min tih hi sim tawh teh se—khawngaihin!

Hê thû hi a Pathian thû lo riau! Lal Solomona meuh, kan Bible-a Thufingte leh Thuhriltu ziaktu thû zâwmtu kan ni ve takmeuh a nih ngai chuan ‘im hmak’ a tha ang! Kan that lai nî kan chen lohin kan eng hun nge maw kan chen chuan ang le? Upaho, chen tûr nei ve lotena min thîk luat avânga kan chen ve an khap ti tih hi thil dik leh fuh ber a ni chiah em le?—bîkin a!

Amaherawhchu, khi thufing tak khi, he thu pawimawh tak amaherawhchu tiin a zui tih pawh kan hre ve bawk e! Chu lai tak chu pawimawh tihna châng hriaa thatlai ni chên ve kan ni e. A zawng zawng hian, in sawi hêng— zû leh sâ leh drugs leh thil chhia zawng zawng hi kan ngaina vek bîk lo a nia aw… A chhan chu, kan chungah, kan thiltih phû ang zêlin ro rêlsak kan la ni dâwn tih kan inhre ve a. ‘Zah’ nei chungin a nia, kan thatlai nî kan chen ve ni—KTP/TKP/SAY/PYD deuhin! Pathian Lehkha Thû pawna min phalsak chu nangni min lo reh bunsak chi zia em ni kan nih bîk le?

Kan zîngah a fel lo deuh te, thatlai nun hmang uchuak fâl bîk te, kal sual luklak ta luate chu an awm ngei ang a. Kan pawm alâwm. Zan meng rei a, zîng thawh nachâng hre lote pawh kan awm ve bawk. Amaherawhchu, min vai hmâ kher thin teh sek suh u! Kan ni vek bîk lo aw! ‘It’s my life’ hla satute hi kan chhe vek bîk lo a nia. Kan zînga Zoram nghahfâk, ‘the next politician’ te leh kan ram ei bêl tûra rim taka thawk chunga ‘It’s my life’ tha chi hla satute hi kan awm ve bawk a nia…

Ka thu sawi hi min awih loh chuan zîngah, i tawngtai inkhâwm bâng kha rawn walk-in field-te hi min rawn fanpui ve peih meuh em? Thalai engzât fakauh nge zîng ni chhuak thawh khalha khêlmual pana insawizawi thin hi awm a, tih min chhûtpui ve la. Tlaiah in vêng indoor stadium panin inkhêlho min rawn check leh teh—i sêl thalai rual thah, ‘It’s my life’ tha chi hla satu thah kan lo kuh tûn ang. Chûng mîte chu i sêl reng ang a, duh duh dâna awm mai mai a, hmâkhua pawh dâwn lo ang hrimin min chhuah ang maw? Aw… mi khawngaihthlâk i va ni tehlul êm!

Khawvêlah hian chuai tûrin, uai tûrin kan vul vek a. Nula rîm te, han CK ve te pawh in chîng ve thin tho a—kan pi leh pû, nangniho chena in tih thin dân ang tho khân. Mahse, a rengin kan thei dâwn lo tih kan inhre ve. Âm takin kan chên ve. A nazawng hi sex-ah pawh kan fihlîm e. Kan chunga ro rêl tûr dâwna inngaizâwng hi kan tam vê. C. Lûrin hlâ angin, ‘Leiah vawi hnih kan vul dâwn lo / Kan damlai nî a tlâk hma ngei hian…’ tih hla pawh hi, ‘It’s my life’ thunawnah kan hmang ve bawk e…

Nangni angin kan la chuai ve dâwn a; kan vul lai nî a la uai dâwn tih kan inhria e. Min Siamtu hre lo lêka hun leh nî chhiartute zîngah hian, bo hlen hlau a: ni êng leh pâr inkawp ang leh ruah leh chhûm nî inkawp a; tlâng, phûl leh lui, nû leh fâ, êng leh hlim inzawm anga min Siamtu then thei lo hi kan awm ve a nia… Keini zînga fahrahte pawn, ‘Ka neih chhun Lalpa!’ tia zan tina tawngtai duah hluah thin kan awm ve nawk a nia.

Min Dintu hre loa duh duha changpât cheh chhum an sawi ang maia lo tâl ta vêl mai mai chu lo awm ve bawk mah se, kan vai nih vek lo a. Min Dintu leh min Siamtu zah tak chunga Lal Solomona thufing zâwma thatlai nun leh hun chên hi kan awm ve tûn. A narân a, ‘It’s My Life an ti alâwm!’ tia kamchhe tleuh nân hi chuan min hmang lul tawh teh s’u—hrâm ina!