Amona thlahte bei tura a inbuatsaih lai khan Jephtha kha a zam hle mai a, tlawm zawka tan mai a hlau a ni. Chuvang chuan Pathian hmaah thu a tiam ta ngawt mai a, Indonaah hnehna a chan phawt chuan a hawn leh hunah a kawngka atanga amah hmuak hmasa bertu chu eng thil pawh nise Pathian hnenah halral thilhlanah a hlan ngei ngei tur thu a puang ta rup mai a ni.

Indonaah chuan Jephtha chuan hnehna a chang ta ngei a, khaw sawmhnih zet a la a, ahmaah Amona thlahte chu hniak pherh vungin an tlanchhia a ni. Amaherawhchu, indona hmun atanga a hawn leh chuan a beisei loh lutuk thil a chungah a thleng ta. A kawngkhar atanga amah lo hmuak hmasa ber tu chu a fanu neih chhun chu a ni tlat mai. A fanu neih chhun (fapa dang pawh a nei lo) chuan khuangte nena lamin a pa chu a lo hmuak haih haih mai le. Chutah meuh chuan ralhrat pasaltha Jephtha thinglung chu a keh sawm ta a, a puan a pawt thler a, “E khai, ka fanu! Mi titlawm ta hle mai a! Mi timangangtu zinga mi i ni ta!” a ti ta hial mai a ni. 

Kumin kumtawpah inthlanpui kan hmachhawn leh dawn ta. Tun apangin political party tinin tan an la leh ta hle mai. Inthlannaa chak ngei tumin, hnehna chan ngei tumin an campaign leh chur chur ang a, hnehna an chan theihna a nih dawn phawt chuan mipui hmaah thutiam awmkhauh pui pui pawh an tiam leh mai thei. Amaherawhchu, intlannaa hnehna chan duh luat vanga thutiam awmkhauh pui pui tiam leh thin hi a hnua min tilungngaitu a ni fo thin. ‘Nuai khat sem, nuai thum sem, district thar pek, sawrkar hnaa thun’ tih te hi sawi mai chu a lawsam. Sawi mai a awlsam ang ai hian a taka tih hlawhtlin erawh a harsa viau thung. Kan tihhlawhtlin theih loh tur thutiam neih zut ai chuan tiam loh law law hi a tiamtu tan pawh a hahdam thlak zawk awm a sin. 

Tin, ram leh hnam tana tha tur pawh ni lo, tlin duh hrim hrimna avanga thutiam harsa pui pui, tih hlawhtlin huphurh awm tak neih thin hi tlin phahna pawh a ni tak tak chiah lo. Kum 1998 intlanpui kumah khan khatih laia sawrkar khan district thar 5 (panga) a puang thawt mai a, inthlannah erawh an tla chiang hle. District an pekna ngei ngeiah pawh pakhatah chauh hnehna an chang a ni. Kum 2008 inthlanpui kumah khan inthlan dawn hnaihah khatih laia sawrkar lai party khan district thar 3 (pathum) a puang ve leh a, inthlannaah erawh an chak loh mai bakah district thar pathum an peknaah hian an arte lukawn a ni. An district thar pek te lah a hnua sawrkarna cheltute khan an sawrkar kum 10 chhung zet khan an ti puitling ta chuang bawk si lo.

Jephtha fakawmna em em chu a thutiam chu eng anga harsa leh huphurhawm pawh nise, tih hlawhtlin a tum tlat mai kha a ni. “Lalpa hmaah ka ka ka lo ang ta si a, chu chu zuk leh thei ka ni lo” a ti hmiah mai a ni. Mimal anga kan indawrnaah a ni emaw, politician kan nih anga mipui hmaah thu kan tiam anih chuan eng anga harsa pawh nise Jephtha anga tih hlawhtlin kan tum hram hram hi a tha a ni. Kan thutiam kan tih hlawhtlin loh fo chuan miin miin min ring lo telh telh ang a, bum hmang ang thawthangah min ngai mai ang. 

Jephtha bakah a fanu pawh hi a fakawm reuh ngawt mai. “Ka pa, Lalpa lamah i ka zu lo ang ta che a, i kaa i thuchhuak ang ngeiin ka chungah i ti tur a lawm” a ti ve hmak mai. Duh nise a pa thutiam ti hlawhtling lo tur hian chhuanlam tur a ngah ngawt ang. “Ka pa, i fa mal neih chhun ka ni a, i fa neih chhun hi halral thilhlanah i hlan ang maw? Ka vanglai hun ka hmang tan ve dawn chuah a ni a, ka remtihna loin Pathian hmaah thu i lo tiam ringawt a, halral thilhlanah chuan min hlan thei lo ang” pawh ti se a mawh miah lo. Mahse, chhuanlam a siam lo a, a nunnain tuar dawn mahse a pa chu a thutiam tihlawhtling ngei turin a kar let zawk a ni.

Kan ram hruatute’n mipui hmaa thu an tiam tawh chu an ti hlawhtling ngei tur a ni a, chu chu mipui laka an bat a ni. An hnungzuitu leh party-a an sang-awi zawnpui te pawhin an thutiam ti hlawhtling tura an kar ngam a tul bawk. Jephtha fanu ang hian, “I kaa i thuchhuak ang ngeiin i ti tur a ni ang” an ti ve tur a ni dawn lawm ni? Chutiang ni lo a, an thutiam pehhel zawnga an insawifiahna awihtu leh sawimampuitua kan tan zel chuan kan ramin hma a sawn thei nang. 

Mipui hmaa thu kan tiam dawn a nih pawhin kan tih hlawhtlin theih ngei tur chauh tiam tawh ila,  Jeptha anga a hnua min tilungngaitu tur thil te chu tiam lo law law ila, kan tiam tawh rau rau a nih chuan a man sang mahse Jephtha ang hian tih hlawhtling ngei tum bawk ila, mipui pawhin kan hruaitute hi an thutiamah an rinawm em, manifesto-a an intiamna te hi engzat nge an tih hlawhtlin tih hi kan tehna ni se, tun ai hian hma kan sawn zawk ngei ang.