Luangliam

Jon Bon Jovi ang talin aw…

Zirsangkima - Apr 29, 2021

khawthlang mi lâr (celebrity) ho, nupaa insiam a, inthen ‘ngaia neih’-ho pawh khuan an va’n tluk lo chiang êm!

A lârzia kan hria; a hmel thatzia phei chu khawvêl hmeichhiaten an hre chiang. A hla phuah thiamzia leh a zai thiamzia te, nula duh duh thlang thei a nihzia pawh tlâng tinin kan hai lo tlâng vek ang. Mahse, ani Jon Bon Jovi chu, a nupui Dorothea lakah a rinawm tlat. Keini, India ram kilkhâwra awm, sa kâp thei nih làra lâr pawh zo lo hian, ani Bon Jovi band frontman, a hming tak Jon Francis Bongiovi Jr. hi kan va’n tluk lo tak êm! Tin, khawthlang mi lâr (celebrity) ho, nupaa insiam a, inthen ‘ngaia neih’-ho pawh khuan an va’n tluk lo chiang êm!

Kan naupan ve laia (han ti ve khanglang ila) ‘Bed of nails’-a mut hrehawm turzia hre thiam ve ni âwm fahrana, a ‘I wanna lay (Bed of Roses)’ te kha kan thiam ang angin kan sakpui ve thin a. Russia rama an zin tuma a nupui Dorothea a ngaih vanga a phuah a ni tih kan hre dêr si lo a…

Intawnna: An pian leh seilenna khua New Jersey-a Sayreville War Memorial High School, Parlin, New Jersey sikul naupang pahnih, Dorthea Hurley leh Jon Bon Jovi te hi inthian tha tak an ni thin a; Dorthea chu Jon-a thian tha ber Bobby-a bialnu a ni. |um khat chu, class test an nei a; Jon Bon Jovi chuan thiam nei hek lo! Dorothea chhânna chu entawn a dîl ta ngawt a. Chu chu an intawnna chu a ni mai. Ho tak a ni; mahse, a tlo si!

Dorothea leh Bobby te chu an inngaizâwng zui reng tho a. |hian angin, inpawh tlâng takin kum hnih chhûng chu an inkâwm zui zêl a; kum 20 an tlin hma chu an ‘ni’ lo! High sikul an chhuah hnuah Dorothea chu Youth karate champion leh zirtirtu (instructor) ni thei khawpin a inzir chhuak a. Mahse JBJ Soul Kitchen Restaurant chain-ah a thawk zui thung. Chuta an mahni dâwrtu, mi rethei tak tak a hmuh atang chuan khawsakna in nei lo mi rethei tanpui duhna a nei nasa êm êm thin.

Hmingthanna kâra rinawmna: Inhriat chianna, inpawhna leh induhsakna chuan thian tha nihna piah lam aia thûk zâwk, hmangaihnaah a hruai lût ta. Mi dang kawp zai rêng rêl zui loin an inngaizâwng zui ta nge nge a ni.

1983-a Seyraville, New Jersey-a band indin Bon Jovi chuan 1988-a an album palina ‘New Jersey’ an tih chhuah khan chart-a #1 hauh thei hla pahnih, ‘Bad Medicine’ leh ‘I’ll Be There For You’ neiin he album hi copy mtd. 10 chuang an hralh chhuak a; an frontman Bon Jovi chu lâr vêt vêt tak a ni tawh.

Hetih lai hian Jon chuan amah bawhtu leh ngaisanga ngaizawngtu nula chhe lo tak tak pawh a hmu teuh ang le. Mahse, ani chu a tleirâwl chhas Dorothea lakah a rinawm bur mai si. A lâr hmaa a hmangaihna kha a lârna leh a luck-na hmanga hliah khuhtir a tum thertê lo!

‘New Jersey’ album tihlâr nan 1988–1990 chhung khan tour an nei a. 1989 April thlaa Los Angeles-a chawlh lailâwk an hman laiin Jon chu a rûkin Las Vegas lamah a thlâwk thut mai a. April 29, 1989-ah, a tleirâwl bialnu, Dorothea Hurley nen chuan Graceland Wedding Chapel-ah an inkutsuih ta! An nupa hian fanu pakhat leh fapa pathum an nei mêk a ni.

Hmeltha leh lâr Jon-a Rinawmna: Kum 2000-a People magazine-in ‘Sexiest Rock Star’-a a thlan leh kum 1996-a People magazine thoin ‘50 Most Beautiful People in the World’-a a lo thlan tawh, kum 58 mi, khawvêl mipate ngaihsân, hmeichhiate star rawn Jon Bongiovi chuan an nupa inhmangaihna tlona chhan, People magazine zawhna chu heti hian a chhâng: ‘…kan inzah tawnna hi a ni ber. Khaw khata sei liana inkâwm chho ngar ngar kan ni a, kan inhre chiang a; kan inngainat tawn reng thin vang a ni,’ tia sawiin, ‘…kan thian mi lâr dangte tàn thinna “thang”-a awh ve (nupa inthenna) hi kan hlau dûn hle thin a, a thawh pawh kan thawk rim hle thin. Mahse, kan hlim dun êm êm reng a… Kei chuan hla ka phuah a; rilru chhungril atangin tha takin ka sa chhuak thin,’ a ti.

Dorothea paw’n, Jon-a chakna lai a hmuh thiam thin thu leh thilpêk hlu tak a dawn thu a sawi ve bawk.

Lâr zo lo an tam tih kan hria a. Mi lâr, nupui pasala inneite inthen leh thinna khawvêlah hian, Jon Bon Jovi te nupa chanchin hi a ngaihnawm ber pâwl a ni ngei ang. Nupui kan nei tawh a, kan lo lâr a, nula leh pathlawi/nuthlawi, min lo ‘ck’-pui duhtu kan tawng a nih paw’n, Jon Bon Jovi te nupa ang tal hian aw…
     

    And I will love you baby, always
    And I’ll be there till the stars don’t shine
    Till the heavens burst and the words don’t rhyme
    And I know when I die, you’ll be on my mind
    And I'll love you, always…