Sawrkar hnathawk pakhat hi a nungchang a tha lo a, tih loh loh tur a ti a. A awm tha duh vak lo a, a hna a thawk tha thei lo a. A chhungten ro an rel a. A hna chu bânsan mai se an duh ta a. A hna bânsan se, an khuaah awm se, a nunna atan a that zawk an ring a ni. Hriselnain a tlin loh vanga hna thawk thei lo (invalid pension) mai turin hma an la a. 

Daktawrten an enkawl a. Hma a sawnin a tha viau a. A enkawltu daktawrte chuan a hna chu an uipui deuh zawk a, a nun chu siam tha mai se, tih loh loh tur ti tawh lo se, hna a thawh leh mai theih an beiseipui a. Mahse, a tun hma awm dan leh mizia an thlirin an chhungkua chuan a bân an duh tlat. A thawh zel chuan a thlarau nun thlenga a chhiat vek an hlau a ni. 

Doctor chuan, “Bâng se, inkhuaah awm se, a nun a siam tha dawn tih in chiang em ni?” a ti a. A nu chuan, “Aw, a tha ang. Ka bulah awm se, a tha ang. A thlarau nun hi kan ngaih pawimawh ber a ni,” a ti hmiah. An bul atanga a hlat chiaha chhe tan a ni reng a. 

A ropui ka ti. Sawrkar hna hmuh a harsat tawh tehlul nen, hlawh pawh a that ve nen, an ui lo. Nun hloh zel an hlau zawk. Chak lo tak leh tling lo leh thawk hleithei mang lo chung chung pawha inhamtan hram hram kan duh laiin anni chhungkua chuan sum an ngaihtuah lo a, thlarau damna an ngai pawimawh zawk. Leia sulrul leh tuiekin a ei chhiat theihnaa ro khawl aiin vana ro a chan theih an duh ber zawk. 

Thlarau nun thlenga chhiatpui phah tur khawpa ‘sawrkar hna nei’ nih hi eng nge maw sawt tak le? Nun tak tak an neih loh phah dawn ai chuan mi chhungkua hi chuan ui an lo nei mang lo a nih hi.

“Ka bulah awm se, a tha ang,” ti ngam ngattu nu hi a ngaihsanawm teh e!

Kan bulah aiin khawiah emaw kan fate thattir tum nu leh pa hi kan tam zawk daih a nia! “Nu leh pa sawi ai chuan mi dang sawi hi an awih zawk, min lo zilhsak teh,” tiin mi dang kan pun fo mai. Khawvel thil hriat belhna thuah chuan nu leh pa aia thil lo zirtir thiam an awm ngei ang. Ka saptawng lam dan thuah chuan ka fanuin an zirtirtute lam dan a ngaisang fe zawk, ka lam thing thei bawk reng a! Dam lohna leh thil dang tam takah tu emaw kan rawih a ngai ngei e. 

Naupang thanglian mek nungchang hi nu leh pa siam tur a ni ve thung dawn lo’m ni? Zirna leh hmasawna dang chu hmun dang atanga an zir a ngai ngei ang; mahse, an thlarau nun chu nu leh pa kut tur a ni mai lo maw? 

Kan enkawl tura fanau pek kan ni. A bilhah tho fuh thin se chuan kan fate enkawl tha ber tur chu nu leh pa kan ni tur a ni ang. A tho fuh lo thin nge ni, a harsat viau thin si hi le? 

He nu hi chuan a hmuh phak loha awm a fapa nungchang khawlo hi siam that dan kawng a hria a, chu chu a bula awmtir a ni. Mahni inringzo takin, “Ka bulah awm se, a tha em em ang,” a ti hmiah ngam. A fapa pawhin chu chu a pawm. A nu bulah a tha thei ber ang tih a inpawm thlap.

Entawn ve theih ka va châk em!