He thil ka rawn ziak tur hi, kum 1948-a mi daih tawh, kum 70 liam taa mi ni mah se ka theihnghilh thei lo. Ka dawihzepzia kha... tunah hian ka inchhirin ban mai a chen lo... HLAM aia sei a nih chu.

1. Census Supervisor hna ka thawh lai a ni a, Thaidawr (Farkawn chhak Tiau lui kam deuh maia awm a ni).

Khaw te tak te, in 20/25 emaw lek an ni ta ve ang. Pawih, Hrendum hnam hlir an ni. Lusei in khat emaw chauh an awm ve a, chutah chuan ka thleng nghe nghe a. An lal chu Sangviala a ni. A fanu (nuthlawi) hming chu Salmani a ni. Ka chhun rim a. Chutah chuan Nghalêngdawi-puiah min sawm phut mai a. Min hrilh dan chuan: “Engmah i keng ve lo ang. I duh leh ipte leh chem i ak ve chauh ang. Chawchhun turte, sangha manna bawm te chu ka keng vek ang a, lui kan thlen hunah lung i phawk ang a, keiin sangha chu ka man zel ang. Kan sangha man zawng zawng chu keiman ka hawn vek ang.

“Kan hawn kawngah i duh chuan min paw hawng ang,” a han tih lai chuan, “Engtin nge hmeichhe puitling ka puak zawh ang che?” ka lo ti hman a. “Puak tak tak pawh a ni chiah lo, lui kan dai laiin vaukam hnim thlengin min paw bahlat ang a, ka kal ve leh mai ang a, kan in thlen dawn hian min paw leh ang a, kawngka kan thlenah, ‘Ka pu, i fanu ka rawn paw hawng e,’ i ti ang a, in chhungah min nghat mai ang. Ka pa a lawm chuan Sial emaw, Bawng emaw a talh ang che. A lo berah Vawk chu a talh ngei ngei tur a ni,” tiin min hrilh a. ZUK NGAM LO IA LE!! Kha an thil tih dan ti ngam loa ka tlawm kha ka inchhirin ban mai a chen lo, HLAM ai pawhin a sei.

2. Chalrangah pawh khian an lal, Pa Thangkiman, “Ka lal thlen dawn che a, kan inah ni loin, nakinah tlai lamah tute emaw an lo kal ang a, zui mai ang che,” min ti a, ka huphurh khawp mai a. Chawhnu her velah hian Pawih upain min rawn ko ta a. Ka zui tawp mai a, an inah chuan paho 10 lai hi an lo awm a, chhuat laiah chuan hranden bel 7 hi a indawtin an lo dah a, a hmasa ber chu thla khat zu, a dawtah thla 2 zu, chutiang zelin a upa indawtin thla 7 thleng chuan an dah a. A bel ringrekah chuan kan fawh veleha suih tlat tur hrui an suih thliah bawk a. Tin, a bel tinah chuan dan an phun vek a, inches khat velah an thliak a, chu inches khat zel chu kan dawt tur a ni. Ka dawt hmasak loh chuan an in thiang lo! Bel hmasa ber chu ka han dut zo ve a; mahse, bel 2-na pawh chu dut zo theiin ka inring lo. Ngaihdam ka dil ta a, “A bel 7 hi ka fawp vek ang a, nangmahnin in duhtawkin in in mai dawn nia,” ka ti ta ringawt a, an remti ta a ni. A hnuah hlui puitling an rawn chawi a, chu chu in neitupa nen chauha kan kil tur a ni. Mi dang a thiang lo, kan pahnihin kan ei ta nia.