Zawhna: Ka pu, nu kum 40 mi ka ni a, ka ek hi a khal thin lutuk a, mum te lam, ruh deuh hi a ni thin a, zingkarah tui lum hi no hnih velte ka in thin a, ka ngeih lo a niangte ka tia, engtia inenkawl chi nge ni ang?

Chhanna: I harsatna kan sawi hmain kan ek (stool) insiam dan chungchang hi han sawi hmasa lawk ta ila. Kan ei leh in apiang hi kan pumpui (stomach) a thlen thlak hnuah acid-in a lo chawk darh hmasa a, chumi hnuah kan thin (liver) hian kan taksa tana pawimawh tur lo la hrangin taksaah a sem darh a. Kan ei leh inte chu kan rilte (small intestine)-ah a tla thla a, kan ei leh ina taksa mamawh tam ber chu rilte hian a lo la hrang a, a bak kan taksa tana pawimawh lo zawng chu rilpui (large intestine) lamah a liam thla leh a, chutah chuan tuiril lam a lo la hrang leh a, chumi hnu chuan ek chhuah turin a lo buatsaih ta thin a ni.

Ek khal lutuk hi kan rilpuiin tuiril a hip (absorb) nasat vang a ni thin a, chumi lo awm chhan deuh ber chu kan thil ei inten kan pumpui leh ril a paltlang muan lutuk vang a ni thin. Ek khal lutuk chuan ek chhuah a har a, an lo e tlem tial tial a, constipation tia kan sawi (ek khal kan ti mai thung a), kar khata vawi hnih thum lek ek hi a lo thlen ta thin a ni. Ek khal chhan hi a hrang hrang a awm thei a, damdawi ei vang te, taksa chet tlem lutuk vang te (khum beta na hoah hian ek khal a awm duh zual), nau pai, kum upa lam, nun dan phung inthlak danglam vang (entir nan mut hunbi emaw, chaw ei hunbi emaw inthlak sekte), ek nemna ei nasat lutuk vang, tui leh tuiril lam in tlem lutuk vang te leh, ei leh ina fiber tlem lutuk vang te a ni thin a ni.

Chhan dang vanga ek khal hi awm thei a ni a, natna eng emaw tak neiah te a awm duh a, chutiang avang chuan ek khal/ek chang lutuk kan nei a nih chuan a chhan ni thei awmte zawn hmasak a tul ang. Kan sawi tak angin tui leh tuiril lam in tlem lutuk vanga awm fo thin a nih vangin i tui lum in vang hi chu a ni lo phawtin a rinawm. Ei leh in lam uluk hmasak phawt a pawimawh dawn a, tui leh tuiril lam in tam te, chawhmehah fiber tamna – thlai hring, thei, bean/be lam chi ang hi ei tam a pawimawh a, mawm lam chi insum a tha bawk ang. Chaw ei hun bi mumal lo hian a thlen duh avangin hnathawka chhuak thin tan pawh ei leh in hunbi mumal taka zawm neih theih a pawimawh bawk a, zan mut leh zing thawh hun bi mumal neih a pawimawh hle bawk. Taksa sawizawi tam a tul tel bawk ang. 

Damdawi thenkhat, nachhawkna te, antacid (digene, mucaine) leh allergy lam chi damdawi ei nasatte hian ek a tikhal duh a. Damdawi ei lai i neih chuan i doctor lo rawn chiang leh thei ta la. Kan sawi takte hi i zawm hnu pawha i ziaawm thei lo a nih chuan investigation – endoscopy, colonoscopy te pawh tih a tul thei ang. Mahni thua damdawi ei, doctor-te rawn lova damdawi ei mai erawh chin loh a tha.