To,

    The Queen of my heart, Vuani …

A hmasa berin he kut bawlhhlawh, tuitang lo leh hnaisai lo zet pawh ni lo, keimaha awm zawng zawngte hian kut suih loh chibai an bûk a che.

He khawvêl ram zaua nunna nei zawng zawngte leh vàn thengreng zau pui maia che thei zawng zawng aia ka thlan zâwk leh ka ngaih bàn theih loh Vuani, chung Pathian khian a chhùn a zàna ka tawngtainate a chháng thin a nih ngai chuan tûnlai i dam that lai a nih ka beisei mai ni loin ka ring tlat a. Kei pawh ka dam tha e—he ka tisa hi chu!

Ka rilru, ka ngaihtuahnate leh ka thlarau chen mai hian maw Vuani, tàwpin-tai nei lo hian an rûm niléng zankhua ni tin zan tin thin a. Sawi fiah thiam hleih theih loh natna veiin an khùr der der reng mai thin a ni. Mahse, chutianga hrehawma ka awm reng lai pawh chuan, nang ka ngaih êm vàng chea chutia awm ka ni tih ka intheihnghilh ngai lo a, hrehawm ka ti ngai si lo!

En teh Vuani, hetia ka chhúngril natna ka’n sawi chhuah kher avàng hian lo inti lungngai duh suh la; fel lo taka ka awm ring ngai hek suh. Tin, ngaih huatah lek phei chuan lo ngai lo hrãm la; nang ka ngaih luat vàng chea hetia awm hi ka ni zâwk tih lo hre reng thin ang che.

I sakhmel thlìr ninawm loh hmu thei lo leh i ànka ném hre thei tawh loa niléng hun han hman ni tin mai hi chu … vàn delh ai paw’n a nat ka ring zâwk hial thin nia! I tel lo chuan hringnun kalh a kim thei lo a, nang nèn loa nuih hi lemchanna mai a lo ni tih ka hre chhuak ta. Ka duh ber Vuani, i tán hrehawm tam tak ka tuar ve a; mahse, ka hmangaih ber nun ná’na tuar ka nih miau avàngin hrehawm ka ti hran lo e; mahse, ka tawrh chhan anga ka hmangaihnain chhànna duhawm a hmuh leh si loh chuan hrehawmna hi a thuah hnih thin tih chu hre thiam ve tùrin ka ring che asin…

In khuaa ka chàm chhúng, ni rei lo tê, kár khat êm pawh tling lo chhúng leka heti khawpa ka lo hmangaih hman che hi, a tìr chuan mak ka inti a, ka inringhlel ve hial. Mahse, tûnah chuan hai rual loh leh rinhlelh rual lohin, nasa takin ka lo hmangaih êm êm ta che a nih hi! Vawiin thleng hian—ni tinin—khami zàna in khaw thlanmuala thlanlung nghênga hmangaih biahthu ka hlan che kha, sawi chhiata tih bawrhbàn ka duh ngai lo a; mahse, tih bawrhbànin a awm ta em ni le?

In khua ka chhuahsan hma zàn khan, i hriat lêm lohin pathlawi leh parawl Lalvèna ina va lèn ka tum a. An in ka luh hmaa ka thàwm hriat khân min va’n ti hrehawmin natna min va’n tuartír nasa tak êm! Vawiin thlenga ka nikhua-lohna chhan pawh kha thãwm ka hriat, vawiin thlenga ka benga la chám ta reng hi a ni.

Lalvèna’n ‘páwng’ tel hauh loa a sual … pawh ni loa duh ve veten an tisa châkna an inphuhrûk tawn thãwm kha a ngaihnawm hlawl lo a. Chutah, Lalvèna’n nuam tuar nula a tètír rawng rawng kha tu dang ni loin nangmah ngei i ni tih ka hai si lo!

Mahse Vuani, ka la hmangaih reng tho che a nia aw! A chhan chu maw, ka hmangaih lo thei lo che a ni! I awih lo a ni maithei; a harsa ang. Ka hmangaihna che hi chu ‘over’ deuh mai a nia; ni e, ‘over’ deuhin a nia ka hmangaih che ni!

In khua atanga ka hàw hnu thla khatnaah thianpa Thuama lehkha ka dawng nawlh a. Thu lawmawm reng reng a chuang lo. Lalvèna fa i pai thu leh Lalvèna’n dâwta inpuh chhiatna tia hnâwl zui i nih thu ka hriat khân maw Vuani, ka va’n lainat tak che êm aw … Chu chu tâwk khat viau tawh se tawrh pawh a zia zia a awm tùr; mahse, i chhúngten in khaw zu heh leh kutkem neia thang Lalvèna an duh loh avànga an la tuithlàr zui lehzêl che erawh kha chu, ná ka tihpui ngawih ngawih che a; i hriat ve lêm lohin ka lo na ve vawng vawng asin, Vuani!

I thiannu Ngúri ina inthla-hrung taka i invawm luh thu te ka lo hria a. ‘Aw … ka hmangaih ber hetianga baihvai êm êma a awm hi ka phal lo asin maw le,’ ka lo ti ve vawng vawng a. Vuani, ka va’n lainat tak che êm aw … 

A tàwp nán hei hi ka’n sawi tel leh hrãm teh ang: i lam hawiin hmangaihna bán chu ka la phar reng a ni tih hi! A chhan chu e Vuani, ka hmangaih lo thei tawh lo che a ni! A chhan min zâwt lehzêl a nih chuan, chhànna dang ka nei hran chuang lo: ‘Ka lo hmangaih tawh che avàngin ka hmangaih lo thei tawh lo che a ni,’ tih chauh lo hi chu!

Vuani, eng ang pawhin phatsana kalsan leh hnuchhawnin awm mah la, ka hmangaihna che hi a la ngai reng a ni tih min hriatsak reng la ka va’n duh tak êm! Kawng i lo dai sual-na zawng zawngte chu ka ngaidam vek ang che’ng a, ka hnênah damna leh thlamuanna hmu ngei tùrin lo kîr leh hrãm ang che aw, Vuani. 

Tùn atán chuan tâwk mai se. Vuani, ka hmangaih lo thei lo che a; tin, ka hmangaih reng tawh bawk ang che.

I tana rinawm,
                IK

Tùna i love letter chhiar zawh tâk dawngtu Vuani khi nangmahah han inchan teh. Vuani tih zawng zawng khi i hmingin thlâk la, a thawntu IK tih khi Isua Krista tiin ngai la. Chutiang chuan khi lehkhathawn khi han chhiar nawn leh teh le…

Tin, a hnuaia Bible cháng lãr tak mai hi i chhiar fo tawh ang. I by-heart hnu pawh a ni ngei ang. He chánga underline ‘khawvel’ tihah hian i hming dahin han chhiar tha leh teh …

‘Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân. Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theih nân a tîr a ni zâwk e.’ (Johana 3:16,17)