Chawlhni hmasa - 15/6/2014-a KA HUANG khan nghawng a nei deuh em ni? Kan Revenue MInister te hialin min rawn phone a, Chaltlang kham leh Durtlang kham bekberep te khi hman hmanah pass an lo nei veng vung tawh a lo ni awm a, kei kea kal lai pawh khian kawng chhak lam ka nek lui tak hram hram a, lung pawh lo lum se min zuan sawn/khum anga tiin. Tuna kea kalte zawh turte khi lung lum den duh tawk awm vel niin ka hria a, awm vungin ka inhre thin. A thlang lam lah khi kham mai pawh ni lo lengkir ni hial awm khawpa awih nia ka hriat chu PASS te an lo pe dim diam tawh a nih awm chu! Revenue lam pawh hian pass ilo pek hi an uar lutuk hrim hrimin ka hria. An sawi dan chuan hmun awm miah lo LSC te pawh a awm an ti. Loan laka dahkhawmah an ti ni maw PHAKARITY hi a leng nasa ni maw? Mission Veng saw Saphoin an din tirhte atangin in 75 aia tam awm phal a ni lo, in leh in inkar hlam 15 a ni tur a ni. Compound fel taka hung tur a ni. Ek in (Pit latrine) chhung tinin an nei ang a, a chhuatah thing an phah insi ang a, leiin an vur phui ang, a dailenna lai kua pawh a chhin phui tak siam tur a ni. Dailen zawh veleh vuta phul zel tur, a rim a chhuat loh nan. Tho luh theihna khawpa phuia siam tur tih a ni. Vawk a vulh duh chuan a huang hung tlat tur a ni. Bawng vulh chuan a in an neih a ngai bawk. Tin, chutih lai chuan Mission sap ram a ni bawk a, chuta khawsate chu Kristian (Welsh Mission mi leh sa) an ni tur a ni bawk. Eng emaw tia Kohhran dan pel chu kohhran mai ni lo, Veng atangin an hnawtchhuak mai thin. Pu Mena (Rev. E.L.Mendus) phei kha chuan a la run bawk a, Chawlhni chawhnu inkhawm lai takte hian a hawi vung vung a, a chhuak a, vengpaho, inkhawmnaa a hmuh lohte in lam kha a pan a, a thawng thut mai a, kawmchar lam a san leh a san loh pawh ngaihtuah hman loin an zuang nawk nawk mai a ni awm a, an pilh deuh phung hlawm an ti! Ram a zauh teh lul nen in leh in inkarah hlam 15 (feet 75) tla aia zing an han phal tlat lo maite kha hrisel nante a lo thain a tua mah kan intihnawk phak lo a, an lo thiam tehin an lo dâwn thui teh asin. Missionary an liam a, LSC te kan ti vai tingtang vel a, in 75 awmna thin saw va en teh mah u - hmana in hmun pakhatah khan in 3/4 a... 5/6 te pawh a ni ta ve ang. Chuti chung chuan Mission Veng chu thawl pawl a la ni ta dahrual a. Aizawl in hmun reng rengah hian in an sak dawnin an ramri khawii lai pawh kha feet 4/5 talin hnaih phal ni lo se la chu, Aizawl khaw thawl nuam kan ti mai tur, tunah zawng thenawmte ramri chhunga sak tak kan nap tawh hlawm si a. Tukverh reh ngaihnna pawh awm loin thenawmte nen kan inhnaih ta theuh mai zawng a nih hi. 'Tute nge in thenawm?' inti ila kan hnaih tehlul nen, hriat pawh kan hre thlei lo a. Kan duham lutuk hian min tikhawhawi zau hleithei lo hlawm zawng a ni phawt mai. State kan nih tirha chanchinbua Aizawl khawpui zauh dan tur ka rawt thin ang khan tih ni sela chu tun ai hi chuan nasa takin kan ziaawm ang maw le. Kan rilru hian Chanmari leh Sikulpuikawn inkar bak chu a thlir phak hlawm tlat lo a, a khawpui ramri chu rin zau fu thin mah se tumah an awm duh lo a ni tih chu a lan reng si hi. Mi mal Pass chuan a tuam vek lawk si. Tuin emaw eng emaw han ti dawn dek dek si, 'KA RAM, KA PASS HUAM CHHUNG' a ni vek lawi si. Ka hre chiang lo naa tuna World Bank road kan tih kawngkamte hi ruak awm awm pawhin ka hmu lo. Chuti tlat chu kan ni mai a, a pawi thlawt mai. Ka rawt fi chu Office lian (Directorate) hi chu hla deuhah dah se, entir nan - PHE hotu chu Tlawng kam lam Dihmunzawl-ah, Electric lam chu Zuangtui lamah, Supply nen. Education lam chu Hlimen/Hualngo dai lamah. Aizawl District office-in an chhuahsan hi luah ve se. Tunah chuan thuneihna kan duh luat avangin District hotuin thu nei hek lo, an directorate vek mipuiin kan dawr lo thei lo a, thuneihna hi district hotute hi pe se District-Directorate--Secretariat tiin indawr chhawng chho se, Directorate-ho hi mipuiin dawr thiang lo hial ila chuan Aizawl siam thawl hi a har lutuk lo maw le. Revenue leh Electrick-ho directorate kawta motor leh cycle zozaite khi thlir ve teh mah rawh u, a titawttu, in hi thiah theih tawh rih lo mah se ka rawt anga directorate office hi sawn hlat darh a nih chuan, Aizawl khawchhunga cheng, eng emaw zat hian kan zui lo thei lo, tichuan kan thawl deuh sawt ngei ang. Tunah phei chuan AMC kan nei tawh a. He AMC hi khawpuia mi tur a nih ang ngeiin hna thawhtir se, thuneihna pawh nei sang se. Durtlang, Chaltlang leh Ngaizel kham bekberep te hi chu 'Mihring luah atana in sak nana hlauhawm' tiin a pass lo awmsate pawh chu a kansel vek theih lawm ni! An saktir ang a, public khawhawina a hliah vek ang a, engtikah emaw lung lumin a deng ang a, a nih loh leh an sakna lungkelha a chim ang a, 'an thi/an hliam' kan ti ang a, kan lainat leh em em mai si lawng maw. Chung pass ilo chu cancel-sak theih a nih lul loh pawhin sawrkarin acquire se, kawmpensasawn pawh dan angin pe mai se. Pawisa awm lo tih lamah - hmanni lawkah state pawisa ba an rawn chhuahah pawh khan a tlem ber PATHUMNA chauh ka la nih kha, thuneitute hian puk se, ba pawh sum lo ni hek lo, kawmpensasawn pawh a tam lutuk thei dawn em ni? In chu sawi loh, thlai leh theikhung pawh pakhat te mah awm si lo, thâng tih ang reng mai mai hmunte pawh tam vak ngaihna a awm dawn em ni? Thuneitute u, kan thlahte zelin an dem loh nan che u, Aizawl hi han tithawveng deuhin khawhawina te han buatsaih teh u. In duh ngat chuan in thei mawlh ang. Eng nge, Disaster Management te in tia, tul mang hlei loah Mock Drill te in tia, pawisa tam tak tak in khawhral lo maw le? Pawl VI (Middle English School-ah) ka nih lai (1942)-in thlawhtheihna lo kala trench-a fel taka tlan luh dan tur kan zir thin te min hrilh ang thlapin trench-ah kan lut dial thin, FULL MARK kan hmu mai. |um khat American Flying Fortress khan khawchhak lam atangin Tuikhuahtlang a rawn hrut thla thuak mai chuh.... khawi lam indawta tlante chu hnai lo.... mahni hnaih hnaih tukverhah a lian lian leh chak chak an zuang chhuak a, a te te kan lut hnuhnung mai! Kha, hmelma thlawhna niin rawn bomb phei chu ni se, sikul kan tlanchhuahsan hman eih lo ang! Zirlaia kan thiam tehlul nen!