Ka Huang

Ka Huang (08/02/14)

Chhuanliana BVT - Feb 08, 2014

Ka Huang (08/02/14)

(Khuma chuan) lehkha chhiar thei leh ziak thei changchang chauh tlengin a zir ve a, Zosapin a tih theih zawng kut hnathawh ilo leh zin hruaitu atan an chhawr thin, chu chu a khawsak dan ber chu a ni a. Khasi ram Assembly chhimin Mzirengah pawh a kal ve a, harhna a chang ve a, chu a thil chan chuan a thil chin tha lo deuh - sahdah hmuamte a sim phah a ni. A sahdah heh dan chu mi a hluana nasa a ni. Mi retheite hi a khawngaih tak tak thin a, amah pawh mi rethei, silhfen pawh a thuah nei ngai lo a ni a, a aia rethei a hmuh chuan a sem mai thin. “Kawr pahnih i neih a nei lote sem ve rawh,” tih Pathian thuchang zawmtu a ni mai. A Pathian rinzia a lanna pakhat chu - Vawi khat chu amaha khawtlang a fan tum hian Dairep phaiah khuan ram palailengah kawng pawh awm lo a ni a, Saitluang a zawh mai a ni a, a lo thim ta a, chaw lo, tui lo leh mei loin saitluangah chuan a mu ta mai a, a tuithawl chu a ruak tawh si a, zan a lo rei deuh chuan sai beng thing ri hlup hlup hi a hria a, amah chu a inhlauhpui miah lo a, Pathianin veng tlata a inhriat avangin; mahse, a tuithawl chu sai rahkehsak mai a hlau ber a ni. Paula ang em lo mah se a zin vah velnaah thih theihna hial hial - sa hlauhawm te, tui lian te, riltam te, natna te, tihduhdahna avanga hnawh chhuah leh daipawna riah zankhua mai mai te a tawk fo na a, a phunnawi ngai mang lo. A zin vahvelnaah hmun a hmuh mang loh deuhte chuan a chawlh emaw, a tlawh emaw chuan tawngtaina nei lo chuan a awm ngai lo. thil lamdang deuh a hmuh chuan a rilruin Pathian a hre kawp nghal thin tih a lang hle mai. A tawngtai zing ber na a, mahni tana a dil hi hriat ani ngai mang lo. Thawktute zawng zawng leh ram hrang a hriat phak - America ram ropui leh zaupui atangin mi hriat tham mang loh Siremangal te, Shashtaganj te chenin tawngtainaah a telh thin a ni. Kristian dik tak leh Pathian mi tak a nihzia chu Kristian lo pa chinchang hre deuh Pathian thu ngaihven deuh si, zawm thei mang si lote hian, “Khuma anga awih tha chu mi dang pawh hi ni vek ula, Pathian thu chu kan awih mai ang, han awih dawn ila, mi anglo tih thika awihte chu a lo dik tak tak loh maite a hlauhawm si,” tiin tanfung takah an hmang fo a ni. Kohhran a lo puna an lo puitlin deuh hnuah chuan amah aia Pathian thu hre zawka mi a rin avangin a inphah hnuai hle mai; mahse, kawng dang a tih theih zawng - Biak Insak te, kawngrih te, bungbel silfai te leh hmunphiah te hi ami a zirtir lehzel a, thu mai leh tawngka maiin a zirtir a ni lo a, amah ngeiin a tihhmuhin a tulnaah phei chuan thla hnih/khat cham chilhin a thawhpui zel thin a ni. A thianghlimna pakhat chu mi a sawisel ngai lo a,mi a rel ngai hauh lo bawk a ni. Vawi khat chu Kolasib banglaah khuan a thianpa Duma nen an riah tumin bangla chhuatah khuan chil a lo chhak palh a, Duma chuan sawisel dang vak pawh ni loin a mawi lohzia a sawi a, ni tlak dawn vela inti an ni a, mut hma zawng chuan a khat tawkin Khuma chuan, “Unau inhauhah chuan a tawk ta,” a ti a ti mai a ni. Inrelna leh insawiselna hi a ngai thei mang lo hle angin amah pawhin mi a relin mi a hau ngai lo a ni. A thianpa, Duma (Pu Engvara pa) pawh hi Kohhran lamah chuan amah Khuma ang bawka mi tangkai tak a ni. Tawngkam phei chu thiam zawk tak a ni. Duma chu Kristian hmasa chu a ni ve lo a, harhna thlen vel lawka hming pe ve a ni ve zawk. Khuma nena inkawp chawt a ni a, Kohhran tan chuan an tangkai ve ve em em a ni. Nupui fanau neiin a awm a, a nupui fanaute pawh Pathian lamah a hruai hneh hle tih tun thlengin a lang a ni. Khuma chu a vanduai deuh a, nupui nei mah se fa a nei ve hman ta lo va. Khuma lam phawt chuan Duma hriat loh theih loh a ni a, Duma lam phawt chuan Khuma hriat loh theih loh a ni. Davida leh Jonathana hriat kawp zel an nih ang hi a ni. He mite thiandun hi Kohhran lo dintu mai ni lovin a kul a taia tang an ni. Mi thiam lo pawh Pathian ram dinnaah hian an tangkai nasatzia an tilang chiang hle mai.
Share now