Tirhkoh hmasa ber zinga pakhat chu Dokhama a ni a, taksa hleitling lo tak, puitling aia te leh chenbeh, chu achhapah mi satlem lehnghal si a ni a, mi tawng thei vak lo, tawng ban satliah mai pawh ni lova tawng fiah vak lo, mi âwmnat nei lehnghal a ni. A Pathian rin dan chu a kulmut tha hle. Pu Phaisama nen an inkawp deuh thin a, mi tawngtai mi tak leh Kohhran lo puitlin nghakhlel mi tak, Isua lo kal lehna ring nghet mi tak a ni. Ruangam lama rualbanloin hmuhsitawm deuh mah ni sela rilru lamah leh mi thu a khun a khana lak dan thiam tak leh mi lehthlak thiam tak a ni. Tihduhdah laite khan Pathian thu hi a thuhrimin sawi a harsa titih deuh mai tawh a, lal leh mi thate phei chu hrilh hleihtheih mang loh an nih laite a lo awm hial a. Chung lai chuan Dokhama chuan Pathian thu a sawi thei zaw berin mi lian leh lalte pawh a hrilh tam ber a. A thu hrilha te chuan bechhawhchhiin tinawmnah mah sela a tuar ve duh lo a, dawhthei takin a bei zel thin a, a thin pawh a ur duh lo hle mai a ni. Chutiang mi tê chuan rilru zau tak leh tlang tak a neih avangin Pathian ram a tizau hle a ni. Lal pakhat chuan hmusit deuh tak hian, “Dokham, Pathian thu hi ring takmeuha khawsa em maw ni nih ni? Zosap tihduhdaha hetia vak dek dek reng che, Pathiante hi i ring tak tak meuh lo ang a!” a ti a. Dokhama chuan, “Ka pu, nang, i rin loh tawp ngawi enin i kal peih fo dawn emaw chu?” a ti ve tlat mai a. A leh a ling chuan lal chu a hrilhhai hle a ni. Vawi khat leh chu tute emaw hian intitanna dik tak hian, “Dokham, engah nge hmuh hleih loh, rin tih mai maia phuahchawp sawia i vah i vah ni? ‘Pathian thu ring rawh u,’ tiin mi apiang hi insawm am hmuh hleih lohte rintlak em ni a, rin theih pawh em ni?” tiin a bei a. Dokhama chuan, “Hmuh kher em ni kan rin ngai? Nang pawh i thluak i hmu ngai lo a, i hmu thei ngai bawk lo ang a, i hmuh loh mai avangin thluak nei loin i inngai em ni?” a tihsan ta mai a, chu mi chu a hrilhhai leh zawk mai a ni. Chung lai chuan, “......... chhanna tur chu thlarauin a hriattir mai ang che u,” tih kha adawng beuh emaw tihtlakin heng ang chang lo pawh hi fel tak takin a dangthla hlauh hlauh thin a ni. Mizoram lo ên thuai thuai hi a nghakhlel em em thin a, chumi ngaihbel deuhin, “Isuan min êntir,” tih hla hi a kalna apiangah a zirtir thin a. A hla duhzawng a nih avangin Dokhama hmingah chuan, “KHAWNVARTEA” tiin an vuah a. Tihduhna avang leh hmuhsitna avang pawh lo ni mah sela Antiokei miten Apostol-hote chu hmusit avanga “KRISTIAN” an lo vuah ang fang lek a ni ta a ni. Pathian mi thlan a ni ve ngeiin a hriat a, Zoram tiengtu bul berte zingah a tel ve a ni. Tin, Kristian hmasa pawla mi tangkai leh mi hrat deuhte zingah chuan Pu Thanga (Lalsangpuii pa) te leh chhim lama Pastor Thankunga te chhungkua saw an ni bawk a. Engkima Kohhran tihphuisuina lama mi tangkaite an ni a - tun thlenga min la dampui avangin an chanchin ziak aiin an nunin a sawi chiang zawk a ni. Mi pakhat Hausatlova (a fapa chu Ztu. Tekawha) chu mi tangkai tak, rinnaa khat, mi thahnemngai thei em em mai a ni a, amah chu lehkha hre hauh lo a ni a, pa te tak te, bial te tawi a ni. Mizo khawsak danah pawh mi fel tawk tak a ni. Mizo Kristian zingah chuan bi neia fianrial tawngtai nei hmasa ber leh fianrial tawngtaina puk nei hmasa ber a ni ang. Pathian thu hrilte a châk em em a, a chang chuan khuate a fang ve thin a ni. Kan pu Zosaphluia pawhin a mi rin ber pawl a ni. Amahin Pathian thu hril a châk chang ni loin Pathian thu hrila mi zin vakte leh Tirhkohte hi a theih ang tawk tawka tisa lam leh thlaram lama pui peih fotu a ni. Vawi khat chu Ralte tlim khuaah Duhlian tawng tuallenna hauh loh khua thlawhnaah a tel ve a. An mawlzia leh thimna danin a khuahkhirh nghehziate a hriatsak a, Ralte tawngin Chanchin |ha leh kan Zo dan inthat hleihzia tehkhinin a sawi chiam mai a. Ralte mi, an tawng hmang rengte pawh hian Ralte tawnga thusawi chu a har an ti theuh a, ani Huasatlova chuan bah chuang miah loin a sawi ziah ziah mai a ni. Tihduhdah laia thusawi phal lohna khuaahte pawh a kal laklawh tawh chuan Pathian thusawi a tim chuang miah lo a ni. Thihchilh pawh a ngam beuh emaw tih turin Pathian thu sawiah chuan a diauin a zam lo a ni. Note: ‘beuh’ hi ka pa hian hmun 2-ah a hmang a, tawng hman tawh loh ni mah se a copy a nih avangin a tel tho turah ka ngai. Pu Buanga - beuh = adv. even (A word used for the sake of emphasis) tiin a hrilhfiah.