Rinawmna lam chauh ka sawi rih a, SUM NGAINAT lam kan la sawi pha ta lo. Sum ngaina han tih hi chuan ngaina lo kan awm lo mai thei. Khawvela kan awm chhunga thil tithei ber a ni mauh mai a, Pathian dawt ti ila a sual lo hial awm e, kan mamawh neih nan chuan sum a tul vek mai. Mi tam takin kan han ngaihtuah hian sawrkhar hna lian thawk, pawisa pawh a sing tel tela chawklet phakho hi kan han ti thlarawk thin a; mahse, kan ni thei vek tih hre rawh. SUM kan ngainat avangin kan nih loh pui kan inchhal ngam: khaimah aw - BPL member kan nih dante hi sawrkharin ni thei tur chin a tih khan min huap ngei em? BELOW POVERY LINE tih a ni a, rethei pawh phak lo a tihna a ni lo’m ni? Khawimaw lai laiah chuan kan LC/VC member-te pawh BPL member an ni tho an ti a ni lo’m ni? Khawtlang hruaitu atana BPL member han in-candidate ngamte chuh BPL member-in pawisa seng tlem zawka an lei theih leh khawngaih facility an dawn awh vanga BPL member lo nih vete hi sum ngainat vanga nih loh nakah engvang nge ni ang? Naupang zirlaiin tribal scholarship an hmuh avanga kei, a hmu thei chin an tih pelin ka kum khat sum hmuh ka lo sawi tlem nachhante hi sum ngainat vang a nih lohin engvang nge ni ta ang? Medical reimburesemt-a sawrkharin khati em ema tam sum a han sengte kha sawrkhar hnathawkin an sum senral aia tam an reimbursement bill-ah an telh a ni lo maw? Private hospital neitute pawhin reimburse tur a ni tih an hriat chuan sen ral aia tam an bill thin tihte hi thil dik a nih chuan (a dik ngei pawh a rinawm) sum ngaina list-a telh a tul lo maw? Sum tam leh tlemin Pathian hmaah kori a tu dawn em ni? Kan dawn tur ni lo eng emaw tia ka tih kikawi vanga ka dawn khan sum ngaina list-a dah chi ka ni dawn lo’m ni? Engati nge sawrkhar mi lian (MLA-te thleng pawhin)-ho hian Outside Mizoram treatment hi in uar em em mai. Sum ngainaho zingah sawrkhar thilphal kan nei a, sum lah chu a mipui thawh chhuah tum ahnekin a hniktu nih kan tum vek ringawt maite hi Bible inzirtirna a letling zawnga kalpui tumtu kan nih a tichiang. PEK AIIN LAKIN LUKHAWNG A NEI tiha innghat kan ni berin a lang. Assam sawrkhar hnuaiah khan private hospital approve mah se direct-in a in-admit mai theih lo reng reng, prior approval an tih hi a ngai vek a ni. Tunah chuan Aizawla private hospital tawh phawt mai chu approve a nih hlawm avangin duhthalin an kal mai a, entitlement pawh hi a awm ngut emaw ni? Kan hun ve lai kha kan post vawn a thuin khum pawh approve a ni. Conveyance pawh phal chin awm vek a ni. Aizawl Civil Hospital (including Falkawn)-a seat a awm leh awm loh pawhsawi awm loin duhthalin kan duh duhnaah kan in-admit mai ni awm tak a ni. Chubakah a in-reimburse dan chu sawrkhara bill tur a nih leh nih loh pawh heti em em hian medical re-imbursement chungchangah an daw-ha dawn em ni le? Mipui hrim hrim pawh hian Mizoram sawrkhar mi leh sa ka ni tih hi kan sum duh atalang hian kan ngaihtuah ngai loin a lang. Sum kan ngainat avang hian Pek aiin Lakin lukhawng a nei ti deuh vek kan nih avang hian pek lam sawi chu kan ngeih bau lo. Nikum hmasa lam tawh khan em ni kan tui connection lak man hi thla tina kan tui dawn man hi Rs. 100/- atangin Rs. 200/- flat rate-in mimir hi chuan chawi mai ila tiin ka rawt a - Fakselnaah ‘i duh leh lo pe mai rawh’ tih a lo chhuak mai! Han ngaihtuah teh, Aizawlah leh Mizoram khawpui dang tam takah chuan septic tank hmang deuh vek kan nih tawh hi. Bathroom-a tuk tin chhungkhat tui hman ringawt hi han inlei chhintir teh, ni khatah Rs. 100/- a ni deuh kau mai asin. Dik tak chuan tuna Rs. 200/- pek pawh hi a la hniam takmeuh asin. In chhungkaw ni khat tui hman kha private-in lei chhin teh, Rs. 200/- aiin a to nghal mai. I buhfai ei lai, retail price shop-a i lak thin-ah khan sawrkharin kg khatah Rs. 15/- a lo tum ve ziah tih te hi i ngaihtuah ngai em? Engpawh hi ngaihtuah tham asin - electric la lo hian pump khawnvar emaw, kerosene laltin emaw, mombati emaw han inchhittir chhin teh, thla khat senral chu sang tam a tling mai nia. Ni e, a tehna (metre) dik lo vanga pe tam tate chu kan awm nial nual ta ve ang. Chuti chung chung chuan êng dang hman dan nen han teu ila, electric hi chu man tak man tak a ni ringawt tih i hre mai ang. Nimahsela sual tinreng bul - sum i ngainat chuan hriatthiam harsa i ti tho ang. Tunlaiin Thlarau Thianghlimin hna nasa takin a thawk tih huai huai a ni. Chu chu i chunga a thawh chuan i tunhma nun - sawrkhar hnathawk tan sawrkhar i hnikna te, duham vanga thil dik lo i lo tih thinte emaw kha i sum chuan si loh chuan i thlarau chan kha a thianghlim lo tihna a ni. Zakaia kha chuan, ‘Ka sum zatve pachhiate hnenah ka pe ang,’ a ti mai. Hetih kawnga ka rilru khawih em em chu - hming sawi a dik lo ang a, mi lian tak pakhat (a la dam) chu a pianthar avangin, a pianthar hmaa a thil lo tihruk (uirena) a puang hmiah mai a, a lawina Kohhran a inphuartir hmak mai nia. He thil ka hriat hian kei ve tehlul pawh hian PIANGTHAR niin ka hria. Chhiartu duhtak, Kelkang i kal a, Thlarau Thianghlim chang i intih hnuah i sawrkhar hnathawhnaah aikal i la dah tut em? Nang thil zuaru, i thil zawrh leh a man i chhiar kha a inawm tawk em? NGE lei duh an awma hnu, ka hlep tam theih dante chu ka thlarau lam nen a intu lo i la ti cheu. Pathian tan direct-in engmah i ti thei lo, a tul hek lo, Pathian avangin i mihringpui hnenah erawh chuan thil ropui tak tak i ti thei. Pathianin a mamawhna che chu i mihringpui i puih theih nante zuk nia. Tawng nan tak hian Pathian tan kan ti nazen a, Pathian hi KIM, MAMAWH NEI LO a ni. Amah ringtuten ti tura a duh chu mihring dang ringtua siam zela ringtu dangte leh ringlote pawh puih zel hi a ni lo thei lo, KIMA a ni tlat. Thil kim tawhah belh ngaihna a awm lo, kan belh theih chuan a kim lo tihna a ni.