Ka Huang

Ka Huang (23/2/2014)

Chhuanliana BVT - Feb 22, 2014

Ka Huang (23/2/2014)

Mizo Khristian hmasate chanchin, ka pa ziak ka chhuah chhawn khan ka rin aia hmain hna a thawkin ka hria, ka lawm takmeuh a ni. Khristian tak tak nih kan mamawhna a nasa hlea ka hriat avanga chhah ka ni. Tun tum erawh chu ka thu avang bawk khan ka thianpa fa, ka hriat ngai hlek si lovin a pa chanchin tlem azawng tal ziakah min duh avangin, ka thianpa Sainghingloa chanchin leh Rahsi Venga kan hoh lai chanchin ka’n ziak thut teh ang. Amah lah chuan a hming min hrilh duh maleka, N.V.L. Kawmi ka ti mai! (Nuvalai Kawmi) a hming a sawi ui tlat si a. Sainghingloa chu Thangpatea (kan tih mai) fapa a ni. Middle Sikula kan kal laiin hotute’n Vai puja an en phal ngai lo. Mahse kan en ru deuh ziah si. Tum khat chu kan pawl nga kum vel em ni ta, varak tuikhuah chhak ta zawk (tuna tennis court saw)-ah vai pathian nu?(Durga) chu an paih a, kan ninhlei chuan Sainghingloa te nen chuan kan hnuk chhuak a, puan them eng eng emaw kan lak hnuah paih leh lem loin kawngsirah kan dah a, a phu hlurh hlurh mai maw le, a tikhawngtu chirh tam tak a tla tawh sia. Kum 1945 April-ah sipai (Clerk)?ka zawm ta daih a, Sainghingloa pawh Bel thum ka kai hnuah a rawn in-enroll ve a, ka khum bul khum ruak a remchang bawk a, ka bulah chuan a mu a. Kei, zingthawh hreh rura, ani chu vat chi a ni bawk si. Zing tin choka thingpui min laksak a, keiin ka thiam ang tawk tawkin ka zirtir thung a, tichuan rawn pass chhuakin a rawn hawldar (Bel thum) ve ta mai nghe nghe a ni. Section hrangah thawk mah se ban hun a inan avangin bahrik (barrack) khata khawsa na na na, office ban leh zan kawnti hma hi chuan kan ler bawk a, nula rim tur hi kan hre thei thin khawp mai. Family lane chu sipai tawng takin auter bond (out of bound) a ni na vang vangin kan kal zan tin deuhthaw mai. Mizo, Gorkhali, Khasi nulate an awm ve diah avangin kan rim ve zan tin a ni mai. Kum 1946 December ni 26 ni tain ka hria, remchang fahran hian kel mei sei (Hindu lam chuan an bawng chei emaw ni an ei duh lo) kan dawng hlauh mai a. Mizo leh Khasi clerk-ho chu kan lawm sakhaiah a tla thung a. Sainghingloa nen chuan fatuah min dah a, kan talh a, kan lip a, kan chan bawk a. Kan chan lai chuan eng kan ti ni maw, hei ei kan châk ta tlat mai pek a, a hnungzang ti, kezungpui tiat ler lawr vevein kan han ei chuh - a al khawp mai a, kan thial kan thial mai a, a tawpah chuan a fe tlat mai, kan seh chip theih theih chu kan lem zel a, engtin tin emaw chuan kan lem ta hram, ei leh zai erawh kan rel ta lo. Tichuan, a kan leh a vil lam chu mi dang tih tur a nih avangin kan inha sawk sawk a, Family lane-ah Gorkhali inah nula rim pahin jar (rice beer) kan in vak mai a, kan nam hle hnu chuan U Lianvawma inah Kaitluangi rimin kan lut leh a, a lipstick te kan inhnawih sen hlur mai a, kan hlim hle tih chu ka hria - chu bak chu ka mang ta a ni ber ang; ka han harh leh chuan kan khumah kan lo mu a, ni 27 zing a lo ni tawh. Ngurkhuma, “Nangni thiandun kha ‘open arrest’ in ni a, in kawnghren pawh an lak daih tawh kha, in guard ka nih hi,” a ti ta mai. Mak kan ti lutuk a, kan awih mai lo, mahse, kan kawnghren an lak takah chuan kan awih ve chhawm ta a. Kan han hriat chuan Family lane-ah chuan Anglo-Khasi - Ida King, Staff Nurse hmeltha zet mai a awm a, chu chu lo han tibuaiah min puh deuh a lo ni a. Ni 26 ni kha chuan kha lama kan kal awm reng reng kan hre lo dun a. Tichuan, kan Company Commander Major Grace-a chuan damdawi in lam min panpui ta a, a kawtah min halt a, Nurse nula chu a va ko chhuak a, vanneihthlak takin, “He mite hi chu an ni lo,” a tih tak avangin kan ZALEN ta a ni. A hnua kan hriat leh chuan kan Mizo thianpa bawk (a hming sawi lo mai ila) a lo ni. Tichuan 1947 July velah sipai chu ka bansan ta a, chumi kum vek chu ni tain ka hria, kan senior clerk thin - Mata (Kulikawn) te, U Neihchana (John Kumar Rualkhuma tia hming thlak ta) Thakthing tlang te, U Ngena, Mission Veng te, Sainghingloa te chu an lo chawl rual ni maw - Chawlhni tum khat chu Sainghingloa te inah chuan get-together kan nei a, chhun pachangah ka ni Chawng habali rui a lo lut a, a kam a tha em em mai a, U Mata (Khrismasnanga) chuan min tibuaia a hriat avangin vau deuh pah hian, “Ni Chawng, kha Neihchan te i ti mai a mai a, a hming pawh a ni tawh hleinem, lei i chawi thei asin,” a han ti a. Ka ni chuan, “Ni tak e, i hming i thlak tak kha, ‘John Kumar Neihchana em ni kha?” te a ti vel hlawm. Mahse, a hnu deuhah min chhuahsan ve ta mai. Vanduaithlak tak maiin Sainghingloa khan cancer a vei tak avangin a aw bawm an paihsak a, a tawng thei ta lo hlauh si. A?fapa thih lai khan PC?lal lai kha a ni a. zualko engtin tin emaw kan hmu a, kan nupain kawngpui helin kan thleng ve hram a, a u Dr. Thanliana khan a lainat si, mutna pindanah Thangzuali nen, amah Sainghingloa nen kei nen min khung khawm a, anin a duh a ziak a, keiin ka-in ka chhang a, khawngaihthlak tak a ni. Rahsi Veng saw tlangval laia kan hohna veng a ni. Sawi vek sen loh leh chi lohte pawh a niang. Tum khat chu an kawt (LAD office kawt zawl)-ah chawlhni chawhnu hian kan inbah vak mai a. Nula kha 10 emaw lai, 5 ve vein emaw an tang a, keini tlangvalho chu thawk palai, thawk nu lai, thawk pu lai, nu lai, u lai, nau lai-ah kan tang a (in hre lo mai thei a, thawk palai hi chu an thawk reng mai, an beng ve ngai lo) mual dung zawngin kan inbah a, kan ri suau suau mai a. Ka la theihnghilh theih miah loh chu Kapthangpuii hnenah Bawihluta’n, “Ka thawk palai duh,” a’n tih chuan, “A khat,” a ti a, nulai, pulai, pilai, u lai, nau lai... a khat tawh a ni vek mai si. Tel ve a duh si, puh tur hming a hre thei mai si lo, “A nih ka thawk xxxxhur mai ang,” tih pahin a kawi a la a, a thawk ve tawp mai! Amah ka hmuh apiang hian kha a thawh dan hming kha ka hre chhuak zuah a ni! Pu Tunga (Kapthangpuii pa) ina zu kan in tumin Lalhmelthaa’n “Vawiin ka ram vak chuan kawra thehlei tlan zai zai thu tawm leh lai tak ka kap a, ka thelh chiang lutuk a, mahse a ral chiaha varung tla lai a fuh ni chek ang, a lo lum thla tawp tawp a, thehlei kapin Varung ka hawn hlauh,” a ti a. Pu Tunga pawh chuan, “Kei pawh ka kah thelh hnai ber chu - Mualpui kawnah tak khuan a thim tawh a, Tukuli ka pu a, Sakuk hian min lo vau nasa mai a, hmuh theih si loha ri chu rinnain ka tin ngawt mai a, ka hnaih hret hret a, ka’n hmet dawt mai a, ka silai ngul hnuaiah a lo awm chu niin, a su leng lawp mai, a hnaih tehlul nen ka thleh nasa teh a nia,” a ti a, kan nui nasa mai thin. Khang hun, harh lai, ler lai te kha kir leh rual an ni si lo a, “Ka va ngai ta em!” tih mai loh chu thu dang a awm thei ta lo a nih hi.
Share now