1966 Mizoram buai kha hman ni lawk emaw tih chhungin kum 49 pawh thla 6 laiin a lo pel ta der mai! Ka ngaihtuah kir ringawr hi chuan hman ni mai kha niin ka hre tlat si! Chuvangin, tuna ‘kum 50 ka ni’ tia intiupa ve deuhte pawh hian Zoram buai hrehawmzia kha in vei ve tak tak phak si lo a, in thawnthu hriat mai mai tihna a lo ni reng mai. Ka tawh ve dan ka’n sawi nawk nawk teh ang. Kum 1966 kha chuan sikulpui kawnah Dr. Thantluanga (L) in Rs. 40/- pm-in kan luah a, fa pali neiin kan tê ber chu kum khat che che chauh a ni. Civil Surgeon Office-ah LDC hna ka thawk ve a (Nagaland atanga insawnin). 28-2-1966 zan khan Aizawl Assam Rifles Hqs kha lak tum niawma sawi ni mah se an intihpalh tak avangin an sukuk zo ta a, keini sawrkhar hnathawk pawhin thulh chuang loin ti dek chungin kan office tho a. Ni 2-3-1966 chuan hlawh kan sem nghe nghe a, office pawh kan bâng hma lui deuh a, Assam Rifles lam pawh khan an hre thawi ni ngei tur a ni - an damdawi in bulah te khian trenchan lai khu rum rum mai! Ni 2 (March) zan chuan an inkap ta ngei a, chutih lai vel chuan K’u Zuala te inah kan tlanchhe chhawng a, an kawmchhak - Kawlhmingthanga te chhungkua an lo chhuk bawk a, K’u Zuala te skirting chu cement pan tê a ni nachungin min tithlamuang ve deuh! Sikulsen kawtzawl atangin Vai hmeichhe veng chunga sipai saw an ralsai a, silai kha Mizo lamin kan nei lo hle em ni lah ka hre lo, halpuah tlep rite pawh telin zuk hria ia, kah hlum an har awm teh a nia! Chuta tang chuan kan ri ta reru a ni ber a, 4-4-1966 chuan Mizo sipai lam chuan ‘sipaite an lo kal tawh si a, nunau leh chhangchhia kha chu inthiarfihlim ula’ min tih avangin kan lainate awmna lam, Khawrihnim pan tumin kan inpuahchah ta a - hetih lai hian kan fa(nu) upa ber chu kum 10 a la tling lo deuh a, a tlum ber chu kum khat a ni. Min tanpui tur dang hlawhfa emaw awm chuang hek lo, mahni theihtawp kha a ni mai, kan nuin puan tlem azawng naupang thawmhnaw a ak a, kan tê ber chu a paw bawk a. Keiin mutbu lian tawkin ka ak a, a chungah buhfai, lukham case khat leh dal tlem azawng; kan puan ah chungah chuan kan tê ber u chu a chuang bawk a - hnung lam atang chuan ka ke hmawr bak lang tur a awm lo! Tichuan, Hlimen kan pawng pan tawp mai a, Hlimen ho pawh chu an lo ruak hiai huai tawh a, in ruak pakhatah chuan muang zetin kan mu thla rawk phawt a ni. A tukah chuan Hlimen lam kan pan leh ta a. Khawchhete thlen hma Serlui hnar kinah - U Numami te huanah kan riak a. Hetah hian U Tlangliana te chhung pawh kan chhaka thlamah an riak bawk. Inrinni kan châm a, Serlui hnar tui kan theh kang a, nghalim lian fu fute kan man a. Chu Inrinni chuan thlawhnain Aizawl kha an rawn kap a, an bawm bawk a, a ri dum dum mai. A tuk Chawlhni zing chuan U Tlangliana te chhungkua chu, U Varziki te nen hmun hla zawka kal tumin an rawn inak thla hluai mai a, U Nui chuan, ‘Liana, Chawlhnia chhuahte chu a va zia lo ve, in kal lui talh dawn a nih chuan hawh u, i tawngtai tal ang u, chinchang pawh kan hriat loh em hi,’ a’n ti dek dek a - U Tlangliana chuan, ‘Nu-i, ka duh tawh lo, nimin zanriah ei dawn khan ka tawngtai e i ti a, chaw daih der tawh pawhin tuipui sen pawh i la kân lo - en rawh khi Pathian thu awih dik tak chu an kal nal nal mai khi,’ tiin U Varziki Serlui kân tawh chu a kawk a, an kal zui ve ta a - ka nui nasa teh asin. Keini pawh chu tukthuan kan ei kham chuan, ram palailenga awm reng thu awm suh - Khawchhete kan pan chho ve ta a. Khawchheteah chuan Aizawl mi kan thahnem fu mai - Pu Vanchuanga te, R.Thanhlira te nupa te an lo awm a. Khawia khaa kal ngai vak bik lo U Hmingliani (R.Thanhlira nupui) chu a ke te a sil nasa ni tur a ni, ‘Heta tang chuan eng pawh thleng se kalsawn leh ka tum tawh lo, ka thih leh ka thi mai ang,’ a ti ve bawrh bawrh mai, a khawngaihthlak hle. Keini chuan ka laichin unaute awmna lam, Khawrihnim chu kan pan ta a - Lungleng khaw hnuai project phei an tih mai, hruichunin kawng a zam hnan titih tawh khawpa hnim chu kan pal phei a, ka fapa upa zawk (Yula) chuan min khawngaih ve si, ‘Ka kal thei,’ tiin a chhuk a, kal teh a han tum thin, hruichun hrui a pal a, a tlu leh tawp thin - kan khawngaih teh asin, inpui tur chuang pakhat mah kan awm lo, kan bawr em em vek mai si. Tlawng kan thlen chuan kan chawlh laiin tute emaw kan aia chaka kal tur hnenah ka chhungte min rawn hmuak turin ka chah a, min lo hmuak ngei a, engtin tin emaw Khawrihnim chu thimah kan lut ve hram - kan lum lut a ni ber mai. Chaw kan han ei lah chuan kan fate chuan a enga mah hre thiam hek lo, ‘Ka nu, ghee ka chawm duh,’ te an han ti lawng lawng thin a, chhungte in tak meuh a ni na vang vangin a nuam lo deuh thin. Tichuan, kei chu ka nupui fanau hnutchhiahin ni 9-3-66 ah Aizawl panin kan chho leh ta a - Hlimen kan thlen khian tuten emaw, ‘Flag var tiang hmawrah tar ula, Aizawl in lut dawn nia, chuti lo chu man a hlauhawm,’ min lo ti a. Tlawm em emin flag var tarin aizawl chu kan lut ta zaal zaal mai nia. Kei chu Sikulpui kawn lama kan in luahlai pan chuan ka chho a -New Street chhote chu a thin hian a thing thuap mai. Tuna, SBI luah zawn velah khian thlengah vawk sa (thau deuh mai) hi kg 3 dawn lai awm hi a lo awm reng mai. Ei tur ui emaw pawh kha a awm lo a niang. Tichuan, kan in ruakah chuan ka lut ta a.