Ka Huang’-ah hian thu tlaktlai lem lo, thu vunuk tek te, hlawhpuina awm lem lo kum 7 lai ka ziak ta a, a awmzia chu 52WksX7yrs=tum 360 aia tlem lo ka lo ‘KA HUANG’ tawh tihna a nih chu. Ka han thlirlet hian tangkaina nei miah lo, ka thil lo tawn tawhte leh Aizawl khaw awm dan thinte mai mai a nia, chuti e ti lo chuan min fak dertu an lo awm veleh nual thin! Tun tum chu PATHIAN ZAR ka han rin ziak teh reng ang. Tangkaipui an awm mial mahna. Kum 1962-a Mizoram ka lo chhuah a, Civil Surgeon Office-a LDA hna ka thawh tirh tê khan Motor Cycle lei nan loan a dil theih thu a lo thang a, dil ve ka tum a; nimahsela K’u Zuala’n a phal lo a, a sawi dan chuan, “Mission Veng atanga Civil Surgeon Office (Medical Qtrs. chung tlang pawng) chho tih tham awm miah lo a ni. Kein kal la, i hrisel zawk ang, Motor cycle i neih chuan a tithatchhia ang chi a, i chhuah hlek dawn chuan Cycle i ti reng mai ang,” min ti a ni ber. Tichuan lei loin ka awm ta a, Zoram buaite kha a lo ni a, ka han tang lehnghal vei nen! Kum 1968 August khan min pawng release leh ngawt a, office chu ka kal chhunzawm leh mai a. Kum 1969 a lo her chhuak a, tuna ka chenna tak (BVT) Pu Barkatikia’n kum 1949-a min pek hi, ram buai (1966) vanga thingtlang atanga lo tlanchhehoin an bawh darh mai hlauhawm a nih min hrilh avangin, awmchilha lo neih kan tum ta a. Kan vat a, kan hal a, Di in chhe zet, kan chhungkaw khawsak theihna tura zau kan sa a, March 1969-ah kan inbenglut ta a ni. Tuna ka khawsakna mual (a hnuah Rimawi veng tih a ni ta)-ah hian in pakhat te mah a awm lo. He ka in hmun atanga tuna Zoo road kan tih kha hmanni khan step awm zat ka chhiartir a, step 250 chiah a ni. Ka awm tirh khan step a awm lo, tlangsam hmun a ni mai. Changtual lei a nih avangin furah a nal em em ringawt mai a, chuvangin changkham khamin kacha step ka rem a, tuna zoo road thleng khian makpui rual rualin chang ka kham chhuak chho vek a ni. Chuta tanga Bethlehem Venglai biak in chhaka tlang intanna bul chu metre 1000 emaw a ni ang a, chho degree 4 vel a ni ta ve ang. Khi Vaipuithiam hmun hrulah khian Treasury Square thleng khian, chu chu degree 35 te, 40 te, 45 veltein chho hlirin Treasury Square kan chhuak thin a ni. Chumi inkara lungrem step kan kal chu Treasury chhuah dawna step khi a ni mai. A dang chu vai dan takah KACHA MUCHA vek a ni. Zu ka la in nasa sia, fur laia ka office hawng chu in ka’n thlen meuh chuan chirha lip ka ang ngawt thin awm ta e. Tum khat pawh Ar dum 2 ka lei ve bawk a, a thla kan khirh a, a kea tawn mai a ni bawk. In ka thlen meuh chuan ar ngo an ang dun hle nia! BVT-a kan awm thlak hlim chuan kan fa(nu) upa ber pawh kum 13 emaw lek chauh a la ni si, ka nupui, Zahmingthangi pawh a hah teh thin a nia, 1969 & 70 kha chuan Mission Veng Retail Shop atangin ration kan la la ngat ngat a ni. Tui chawi a ngai, thing phurh (loa mi) a ngai, thing eh a lo tul, tin 4 dawn lai buh kan tuh avangin thawh veleh zing thingpui pawh in hman loin hlo thloa bun a ngai (kan fanuin a rawn lum a, hlo thlawhnaah min rawn pe thin). Inrinni bazar kal ngai dawn se, ke ngatin kacha road-ah Saron veng hnuaiah kan zal phei a, bazar pawh tih namai a ni lo, thulh chi a ni lo, HAH hi a ni reng mai a ni. Kum 1980 vel kha em ni ta nge, a hma deuh, Dr. Thanliana kha a lo leng thla a, chung lai chuan Officer-ho chuan jeep-in Forest Training Centre an rawn thleng thei (ruah sur loh laiin). Kan nu pawhin 1974 atang khan sorkar hna a hmu ve ta a, tichuan ke ngatin office kan kaiin kan hawng thin. Dr. Thanliana lo kal chuan Bethlehem Vengthlang Bazar atang khian Vai puithiam in lam chu a thlir chho vang vang a, “Chhuana, engtin nge office i lo kal hian i lo kal thin?” tia min zawhna chu Vai puithiam in lam ka kawk chho a, “He tlangdung hi kan zawh chho a, Treasuery Bûng hnuaia step lo chhuak khi kan lo chhuahna a ni,” ka’n tih chuan, “A pawi lo e. BP sang/hniam/zunthlum/Ashma damdawi i ei reng tihna a ni. Heng natna lakah hi chuan i him ang,” min ti a ni. Min hrilh lai chuan chuti takin ka ngaihtuah zui lo. Nimahsela hei kum 87 lai emaw niin kan nupain kum 60 inneih champhaphak hialte kan lawm thei ta mai hi a chhan nia ka hriat chu (1) Pathian khawngaihna (2) Loh theih loha taksa excercise kan lak nasat em vang hi a niang ka ti lo thei lo a ni. Kan duhthu ni lo mah se kum 20 chuang kein km 3/4 chu kan kal ngei ngei ringawt mai a nia. Tunlai hian doctor tawh phawt chuan excercise lak thatzia heti taka an sawi takah chuan kan retheihna kha kan dam rei phah a nih hi tih loh theih pawh ni loin ka hria. Nimin lawk pawh khan pneumonia hlauh vangin ka chuap ka X-Ray a, normal an la ti nia. Khati khawpa zu, meizial, kuhva heh kha ka ni thin sia. Kuhva hi zu ka ruih nasat luat avangin 1975 khan ka nghei a, Meizial hi 8-3-1986 kha ka birthday a ni a, Meizial nghei ka in-present a ni. Keimahin ‘Happy Birthday to ME’ tih hla kha ka sa nghe nghe. Zu hi chu 1980 a ni ta awm e - Upahoin min lenchilh a, tawngtaiin Pathian kan au a, min pek a ni bawk.