Kawlasip (ka ziak dan thar) a\ang chuan A-lu-mak hnung lama betin Aizawl chu eng tin tin emaw chuan kan thleng ve ta hlawl mai le. Lawks, 1946/47 vela Aizawl Silchar motor kawng hre pha lo tan, a kawng chhiatzia chu Aizawl a\anga Kawlasip hi eng tin tin emaw kan ban hram tih hria ula, a chang chuan a kara, kawng laka riah takte pawh a awm. 1946 September-a ka chhu\i \um khan truck-ah bawk Silchar a\angin kan chuang chho a nia, motor-a chuang e ti loin, kawng a hnim lutuk a, Vangvat sai\ialin ka chhipah a zuk a, a thi a, a reh har teh asin. Black top te chu vana rah a ni. Driver hian Lifebouy sabawn 2/1 leh chini tam tawk an keng ngei ngei a, truck ka sawite hi, sipai motor condem hnu a nia, petrol put châr nan Lifebouy leh chini an hmeh pawlh vak a, chu chuan an char \hin. A spring a tliah chuan Asal Sal (thing) emaw, phulraw chang suih hi km 3-te chu a hman theih te an ti \hin! Driver kha an Pâ em em ringawt mai a, zahmawh sawi kha an dim miah lo. U Roa te angte kha zahmawh a ni ber mai. Motor a tlan chak vak theih loh avang khan accident a tlem zawk a ni. In ka thlen takah chuan tih tur dang nei hek lo i, ka nu chuan Maubawk hnuaiah lo a nei a, chu chu ka thlawhpui \hin. Nula tu dang mah kawmngeih vak ka neih loh avangin kan hawnpui, Rozami, Kulikawn tleirawl chu ka birh tlut tlut ringawt mai. Kum 1948 a lo her chhuak a, hnathawh ka nei si lo. Arlei hnuaiah ka nu nen lo kan nei leh ta a, \in 2 hmun kan vat ve a, ngaihzawng thar ka tawng bawk a. Chawlhni tlaia kan tlei len laiin mahni chauhin ka tei a, Vai sikul chhak ka thlen laiin ruah a sur ta thut mai a, vai sikulah chuan ka tlan lut a, nula 2 leh tlangval pakhat an lo awm bawk a, ruah a han \ha duh vak lo a, biak in dar khatna a ri mai dawn a, nula pakhat chuan tlangval hnenah chuan, “Hawh, puan hi ka zawn ang che,” tiin an tlan ta mai a. Nula pakhat nen chuan kan awm ta a, ka hre ngai si lo a, bathlarah kan tei dun a, a tawpah chuan, “Hawh, ka zawn ve mai ang che,” a ti a, KA HNIAL LO NGEI MAI. Nula, hang lam, hmai bial, biangsum nei, ha uingho zum deuh a ni. Biak in kawta kan in\hen dawna a mi melh dan chuan ka thin a deng riau mai a, chumi zan a\ang chuan ka rim ta nghal a, nula 2 awmna a ni a, tlangval leng pawh 4/5 lai an ni. Anni pawh chuan kan lo a\anga km 2 zeta hlaah lo an nei ve bawk a lo ni. Kan lo chu Mission veng a\anga km 3 emaw a ni bawk ang. Ka nu chu chutih lai chuan kum 50 emaw vel a nih chu, lehkha ziak pawh thiam lo, sikul pawh kal eih lo, chhiar thei \awk \awk chauh a ni. Mizo hnathawhah thung chuan BA a pass ka ti mai, taima rumrut mai a ni. Lo kan han hal tuk a\ang chuan mang a khawh a, kaiin thlam châk ka khawm a, thiam ve hek lo i, thlam ban pakhatte chu ka put zawh \awng \awnga lian te a ni. Kan ri chhak lamah putar thlam sak thiam tak a awm a, ka han entawn \hin. Thlam bang hi a chhung lama pin a ni tih chuta \ang chauh chuan ka hria. Ka hriat loh apiang ka han zawt \hin a, ka sa ve zel a, mam lo tak chuan ka din ve mai. Ngheh chu nghet tak a ni. Nipui (hrui hnim) hi kan loah chuan a khat tlat mai a, ka nu chuan hnahpui a chhuah hma ngeia rih fai vek tur, hnahpui a chhuah hnuah chuan a rih hlum theih tawh ngai loh a ti mai a, kan rite an bun hma a\angin kan bung tlut tlut mai a, ka ning thei teh a nia. Ka nu chu taima rumrut mai a nia, tuthlawh a han humte hi a zei vah mai, a kawngte a kham ve ngai lo a ni awm e. Lo hnathawh na na na chu a zei teh a nia. Thawh\anni a\anga Inrinni hi kan feh tlang zak zak mai a, ka ning thei teh asin; mahse, a taimakna kha kan chhawr - kan lo chu a fai hlurh reng mai a, buh pawh ram chang ni lo mah se a \ha fu reng a ni. |in hnih hmunah phur 40 (K.Oil \in 20) kan thar ve a ni. Kan lo mawnga thawkawm deuhte chuan \in 4 an tuh a, an ma an ma a, an thlam hmun pawh an ma. An thlam a nuam a, a hnuaiah pipu an suih a, an uai reng mai. |in 4 lai tuh e ti loin phur 10 awrh chu tharin ka hre ta. Ka nu kha lo lam hnaah chuan sawisel bo a ni. A lo thlote hi, a khawl ni mai awm hian ka hre \hin, a hlo telte hi a fel thak bik. A hnu a mam. Buh tuh pawh cheh hnihnaah a cheh-hmeh thlep thlep mai, chakin lang lo mah se a hlawk riau ni tur a ni, a chawl ve ngai lo. Kei chu ka ri phut phut a, ka \ang vak a, ka kawng, ka kawng ka ti thuai zel. Ka nu hi chu ram hna lamah a zuitu ber ka ni bawk a, ka ngai \hin khawp mai. Kum 1895-a piangin kum 1991, August ni 12 khan kum 96 miin min boralsan ta a ni.