Mahni huang a ni bawk a, zak map lo êm lovin tlangval VE lai, belval vala val mah ni ila, ka’n ziak leh thin. Ka ngai tlat sia. Sipai atanga ban takah chuan Aizawla hawn mai loh theih ni hek lo, 1947 te hial a lo ni ta bawk a, truck-in tlangdung kawngah ni hnih leh zan khat thangin kan chho a. Kolasib-ah, Diakkawn hotel ho khu an lo hawng thar hlawm a. Keini pawh chu Gorkhali hotel-ah kan thleng a, khum hrangte awm hek lo, khum chen vel hian dap, bawhtah an phah duai a, chutah chuan kan mu tlar pat mai zel. Kan rualin nula pahnih an tel ve a, sipai bang chu 4 lai emaw kan ni. Kan thlen zan tak chu an hotel thar tuih zan a lo ni a, khawi lai vai putar Ralte tawng thiam em em mai te hi an lo tel ve a, balhla, tih ang reng (parsad) an sem deuh reng mai a, a meng meng chu min pe ve zel mai a, a nuam ang reng. Aizawl kan thlen chuan tumah han chhai em em tur ka hre lo a niang ka leng lawr nasa hle. Kan hawpui nula pakhat zawkte inah khan ka leng deuh ber a, Thakthing veng lamah te pawh ka leng rawlai mai mai thin. Aizawl nula leh tlangval khan khatih lai khan chawlhni zan riah hma deuha ei a, tlai len kan ching em em a, Dawrpui lam pawh Tuikhuahtlang thleng thleng khian an lo tlai leng a. Keini Aizawl South lam pawh Treasury Square thleng thleng khian kan leng ve bawk. Ngaihzawng fumfe nei lo ta pui chu, mahniin ka leng ve ruk ruk thin a, chawlhni tlai khat pawh mahni bawkin ka leng a, Lungremsei (Sabinga lung) bul vel atang sawn ruah a sur titih ta mai a, ka tlan vang vang a, huh hman lovin Primary sikul (Vai sikul)-ah ka tlan lut a, nula pahnih leh tlangval pakhat hi an lo awm a. Ruah chu a han tha duh lo hle a, a sur tam vak lo nain a sur cherh cherh deuh a. Tlangval pakhat chuan nula pakhat zawk hnenah chuan, “I puan kha inzawn mai ang, inkhawm kan tlai dah ang e,” tih pah chuan an inzawn a, an kal ta mai a. An kalsan tak nula pakhat nen chuan kan la vei rak rak a. He nula hi a hmain ka la hre chiam lo. Tihngaihna dang awm hek lo, chu nula chuan (He nula pawh hi Sialsuka ka ngaihzawng hmel ang deuh kha a ni a, a hang hret zawk a, a ha uingho a zum zawk a, biangsum erawh a nei mawi zawk!) Ani chuan zak deuh chungin, “Hawh, ka zawn haw ve mai ang che,” tih pah chuan a puan chuan min zar ve ta a, ka hreh lo kher mai. Tlan titih, kal titihin biak inpui kan thleng a, biak inpui kan thleng kan puan inzawn a’n la thla tur chuan min chho melh tehreng a, kha mitmeng kha hei, kum 67 vel a liam tawh na a, ka mitah chuan a la thar sar nia! Tichuan kan inkhawm ve ta a, banah ka zui hawng nghal a, chuta tang chuan chang dang kan loin ka birh tlut tlut mai a, min ngei nge min hua tih pawh ka dawn lo, nula inah tlangval ka leng ve a ni mai a, nula pahnih lai awmna a ni bawk a, inleng an thahnem thei khawp mai a, kan hlim thei hle a ni. Zan khat chu suvela an la hlum tur chu kan uan kan thawh lawk a, hlum hmain a hmawr kan la lawk a, kan han la kawi kikiau buai nasa khawp a, an tukverh kapna kuaah te, khawi khawiah emaw kan rawlh a, inchhung kal mai hleihtheih loh khawpin kan pawt kawkalh nuk mai a, duang chanve dawn lai kan pawt kawkalh hmasa a, a bak chu suvelah kan (chhiartu hriat reng foa ka duh chu ka Ngaihzawng ka tih hian min Ngaizawng ka tihna a ni lo. Keima lam chauh atanga ngaihzawng ka ni tih min hriatsak fo ka duh. Chuti lo a, min ngaizawng ve anga min sawi chhawn palh hlauh chuan SA-LAM kan chawi mai ang tih a hlauhawm) bat ta a, kan nula rim chuan a hlum ta ngat ngat mai a, suvela kan bah a zawh chuan a tawpna hmawr chu hlum chen chen khan a tawlh ve hrat hrat zel a, kan bah kualna zawng zawng kha a chhui ve dap lo thei si lo a, a rei pherh erh asin. Thei miah si loin chu nula chu kum thum/kum li emaw chu ka zui ka zui mai. Lo te a nei a, keini pawhin an lo hlat deuhah kan nei ve bawk a, buh lak ram riahte chuan ram a riah chuan lo atangin ka rim a, a riah loh leh kan lo atang bawk chuan an inah ka rim tho a. Kha... Kawlphekhawnvar ka neih awm pawh ka hre lo, ka thleng reng tho mai! Ka dawihzia ka’n puang leh law law ang aw... kan ti ta sa sa. Zan khat chu an loah an buh lak tawh chungah kan bawk dun ve bawk a, thla lah chu en loha salamin a eng mai lehnghal a. Ka rilru chuan eng eng emaw, mipain an ngaihtuah ang thinte chu ka ngaihtuah ve vek, min ngaizawng tih ka hre map si lo a, chuti tehngawta han pawng kuah teh rawk chu a lo duh lo hian a te vak ang a, a nu, kan bul maia tukthuan hmeh tur chhum chuan a hre ngei dawn si a, tih te ka ngaihtuah a. Mahse, tlangval tute emaw ang chu ni ila an pawisa awm si loa tih te thlengin ka ngaihtuah ve bawk a, chu chu ka tawpna ni leh tain zan dar 11 dawnah ka mawl haw leh ta mai a!! Tuai chu ka ni lo, mahse ka hmel hian PUAK a ti lo tih ka hriat chianna hian min tiDAWIH tlat mai a ni. A nula zawk khan min leh kuah ta zawk sela chu khawsak dan pawh a dang mahna, min kuah miau si lo a, duh e duh lo e, kan piangthar haw leh lawng lawng mai thin a ni ber. Kan inhnaih ber chu vai sikul atanga Mission Veng biak inpui thleng puan kan inzawn kha a ni mai!!! Chhura chengkek lo ang ziazawngin.... chu ni sela a dim awm tawp si loa kan ti liam mai mai zel! Nula chhungte tan chuan an fanu nula veng himtu kan ni ringawt mai a ni ber! SUAL?ni tak maw... hre kur siin ngam si loin han zankhua ve ringawt mai thinte kha? He nula hi ngaihzawng han tiha keima lam atanga ka ngaihzawn 3-na a ni awm e. Sipai bang ve lem kan sezawl chhuah leh ngawt mai thin kha a ni a, mak ang reng tak a ni. Mahse, tun hnuah hian ka inchhir lo khawp thung mai. Lo thei ta viauin lo ninhlei phian ta ila, duh loh loh hian sawn ka thlak e ti kan ti hlawm khawm ang a, DAWIH leh hmelchhiat vang ni mah se a inchhirawm loh khawp mai lawi si.