Tun tum chu NINGANI tih leh NILAITHAWH|AN tih hi sawi fiah ka'n tum ang e. He thu hi Pu LM Chhinga, Baktawng khua, a hun lai - 1930s vela Primary sikul zirtirtu a ni awm e. Chumi chuan Mizo leh Vai Chanchinbu 1934 issie-a a ziak, ka chhiar ka rawn chhuah chhawng a ni. A peih chuan Synod Bookroom thil hlui dah khawmnaah a zawn chhuah theih ka ring.

(Mizoin hapta kar ni chhiar dan kan nei lo. Vawiin, Naktuk, Naktip, Nakthai, Nakthian, Nakkun, Nakdak tih a ni mai).

Zosap an lo kal a, chawlhkar ni hming siam an tum a, Sunday atangin an tan a, Pathianni tih an duh ber a; mahse, “LALPA i PATHIAN hming a naranin sawi suh,” tih a nih avangin chawlhkar nia an vuah chuan an sawi naran ang tih an hlau a. Mi pakhat chuan, “Vai pawhin ROBIBAR an ti mai a, i hmang ve mai ang u,” tiin a rawt a; mahse, tua mahin an uksak lo. Sunday chu kalsanin Monday atangin awlsam takin Thawhtanni, Thawhlehni, Nilaini, Ningani, Zirtawpni leh Inrinni tih chu inthurual takin an pass ta mai. Sunday atanga an chhiar tan avangin Thursday chu NINGANI a nih chu. Chawfak khamah SUNDAY chu an buaipui leh ta a. Robibar rawttu khan, "Phuah tur in hre tawp si lo, ‘Robibar i vuah mai ang,’ ka tih leh in uksak si lo, in duh leh CHUKCHU ti mai rawh u,” tiin a tiel deuh a. Zosap khan, “Nang kha, i kawr pawh a bal hle a ni, hawng la, luiah zuk insu rawh,” tiin a tir haw ta a ni. An duh ber Pathianni tih an vuah ngam ta si lo, Chawlhni han tih teh tlawng chu Pathian biak ni ber Chawlhni tih chu an phal meuh si lo. A tawpa tawpah CHAWLHNI tihah, sit tak chungin an sir tluk ta a ni. Chu Zosap hoa an phuah chuan Thursday chu NINGANI a nih chu (Sunday atanga chhiar tan a ni tih hria la).

NILAITHAWH|AN - Khawchhak lamho khi thing hmun a nih avangin an awl em em a, Thawhtan leh Thawhlehni an thlo a, Nilaini an chawl a, Ninganiah an thawk tan leh thin. Chuvangin, Chalrang khuate angte khian Nilaini atanga an thawh tan leh avangin Nilaini atanga thawk tan - NILAITHAWHTAN tiin Ningani hi an sawi sam et a... chuta tang chuan a darh ta zel a, NILAITHAWH|AN ti kan tam ta mai a nih awm hi.

He ni hming dik tak chu Ningani a ni (from Sunday). NILAITHAWH|AN tih hi chu Nilainia chawlhoin a awlsam zawna sawiin Nilaini atanga thawk tan leh avangin Nilaithawhtan an ti awlsam et mai a nih ber hi.