Hunthar (?) nu nge nulain, “In nu thlalak rawn chhuah tel teh,” a min tih avangin hei ka rawn chhuah tel a nih hi. Kum 1999/2000 vela kan lak dun a ni ang. Hei tunah chuan kum 59 leh thla hnih chu kan innei chu a lo ni ta reng mai, kan nu hi ka ngaizawng bawk a, kum 60 dawn laiah pawh rei ka la ti lo teh a nia! Diamond Jubilee hi thleng dun phak tak i maw?! Pathian thu a ni mai, thla sawm chhung hian thihna hun a la tam rem rem em mai! Hetia ka’n ziak takah chuan LUNGLEN a kai tho uai uai mai. Hla pakhatin, ‘Lunglen rehna daktawr babu ka dul a, tarpin tel min pe, a dam thei lo’ a tih ang ziazangin ngaihtuah letna hian lunglen tireh lo mah se, khang huna kir leh tehchawk kan chang a, nuam ve deuh asin. Sikul ka luh tirh hi ka hre fumfe lo, 1935 a ni mai thei. 1935 khan kum 6 chauh ni mah ila, King George V-in kum 25 ro a rel lawmna Aizawla neihte kha ka hre phak ve fu a ni. Sipaiin lehkha mawi chhunga mombati chhiin zanah sikulpui kawn thlengin kawng an rawn zawh a, sipai pakhat chuan min pe nghe nghe a, ka lawm teh asin. Tin, Sikulpui kawn atanga Mission Veng panna kawng phei tawntirh - tuna J.V.Hluna in hmuna Bakentlang kungah lianpuiin ‘LONG LIVE THE KING’ tih an tar kuau bawk a, naupang chumchiap e ti loin ka hlim ve nasa mai. Lammuala tihpui zawhin tunlaia ‘At Home’ in tih ang hi ni maw, Bawrhsap lawn-ah thingpui ka paten an in a, min hruai ve a, Pu Kalua (Bawrhsap chaw chhum) chuan min khawngaiha cake min pe nghe nghe a ni. Khanglaia Bawrhsap lawn thleng ve thei naupang nihte kha nuam kan tiin kan induh phah vel maw le! Aijal kha a la zimin mi kha kan la thawl tak meuh a, Mission Veng pum puiah in 75 bak awm phal a ni lo a, Kulikawn atanga Zarkawt thleng hi Aizawl tia kan ngaih, mi cheng awmna a ni na vang vangin kan thawl em em a, Zarkawtah te khian in tlem te, in 10 emaw lek an awm chauh a ni. Chutih hun lai chuan dawrkai lo phei chu lamlian kama in sak an la phal lo ta dahrual a, ka hriat sual loh chuan kawng hnaih ber, Biaksailoa pa in pawh a in chung kan hmu ruau ruau thei chauh a ni. Dawrpui phei hi chu dawrkai an nih avangin lamlian ânin in an sa thei a, chu pawh kan mei thulhah choka chu an dawr hnung lamah vek an sa a ni.. Sapho kha an fimkhur teh a nia. Khaw pawn lamlian dung reng reng pawh kha vah pawh phal a ni lo, kawng chhak leh thlangah hlam 10 ve ve emaw kha an reserve tlat a, zin veivak tan ni sa lutuk a awm thei lo. Kan han indipenden a le - chung kangkamte chu dim lo baksak loin loah an/kan nei phirsi ve mai maw le! Zion Street kan tih takah te hian in 4/5 lek bawk an awm a, a thlang deuhah Chhinga Veng a ni leh mai a. Dawrpui atanga chhim lampang chu Sikulpuikawn thlengin private in a awm lo. Surgeon Bangla leh Tuipu (kekawrfuala) quarters a awm leh ngawk a, sikulpui leh vai sikul (hun rei tak chu vacational school-ah hman a ni thin a, mitiri lamah Pu Zabanga hotu a ni a, thiamhnang lamah Pu Ronguaua a ni thung). Kulikawn leh Rahsi Veng leh, Rahsei Veng hnuai a ni leh mai a, chung hun lai chuan Tlangnuam khi a la fal hle a ni. Tichuan Aijal kan han tih ber chu Kulikawn atanga Zarkawt a nih ber mai chu. Maubawk te saw a hla viau kan tih loh pawhin a hnuchhawn veng deuh a, ka tlawh khat hle. Chuti e ti lo chuan Sikulpui hi hmar chan lama sikul sang awm chhun a nih avangin Class IV atanga Class VI chu Sikulpui pakhat chauh khi a nih avangin Durtlang atang leh chhim lamah Hlimen, khawthlangah Tanhril vel atangin kein an lo kal mai, keini aiin a hma hma an ni leh mai thin. Chung hun lai chuan Middle School-ah pheikhawk bun phal a ni lo. Kekawrtlawn hak phal a ni hek lo. Sikul uniform te a awm lo. Boy Scout leh Wolf cub an din a, Scout-ho chu a lian deuhho an ni, an tri-angular scarf hmawr an bawk a, kan chawnah an han hlap (perh) thin a, a thi sawk thei a, kan tap ngam si lo, naupang dawihzep chu kan mittui hi a tla fap fap thin. Kan mawl khawp a, kamit 3, kekawr 3 kha kan nei tawk mai a, 1 sikula hakah, 1 chawlhni, a dang chu sikul banah, chu chu kan inthuam dan tlangpui a ni mai. Ka theihnghilh theih loh chu ka pain Shillong atangin Bata pheikhawk Rs. 2/50 man min rawn hawn a, kum 7/8 vel ka nih laiin, ka inchhuang teh asin! Tum khat chu Vankunga (s/o Pastor Chhuahkhama) nen kekawrtlawn hak kan châk ta tlat mai a, kan nei si lo a, “Mahni pate kekawr tlawn i ha ru mai ang,” kan ti a, a kekawr kawng chu kan kilh tlat a, a zunna tura a hma lam reh pawpah hian kan lu kan rawlh a, chuti chung pawhin a ke hmawr chu thleh 4/5 velin kan thlep ve ve a, kan induh ve ngei asin! Khang hun laite kha mawl lai mah nise tun ang hun atanga han ngaihtuah let hian a lunglenthlak vawng vawng mai maw le! Tunah hi zawng kan fing ker vek tawh mai a, ENGTIN NGE KA EI THEIH ANG tih hi kan ngaihtuah ber ni awm tak a nih tak hi.