Vawiin, ni 8-4-2018, Chawlhni hi kum 89 leh thla hnih champha ka phâkna a ni. Kum 90 pumhlum turin thla 10 zet ka la bak a nih chu. A huphurhawm. Upat lamah chuan thla khat a lo rei dawn khawp mai! Vawiin, ni 8-4-2018, Chawlhni hi kum 89 leh thla hnih champha ka phâkna a ni. Kum 90 pumhlum turin thla 10 zet ka la bak a nih chu. A huphurhawm. Upat lamah chuan thla khat a lo rei dawn khawp mai! Tun tum chu ka ngaimawh ve em em, kan lai-ah hming baka mahnia sap hming (emaw ni?) kan inphuah belh kan hman lar zawk hi. tu’n eng huah mah ngai mah suh se, ka’n thai ve reng reng teh ang.   Mizo hming hi uluk em ema awmze nei thlapa sak vek a ni ti ila kan sawi sual awm lo ve. Hming chapo deuh lar hi a duh pawh kan duh thin a ni ang, “Lal hming sakna a dal em lo e,” tihte pawh a awm nghe nghe a hi. Khristian kan nih chinah phei chuan mi tam tak hming hi Van lam chawia sak a nih hlawm hi - Vanlalmalsawma, Malsawmdawngliana, Lalhmangaiha, Vankungi, Lalringliani tih angte hi a nih hi. Kan hming satute hian an uluk em em a, hmun tam takah phei chuan arpa-chhipkhuan an talh nghe nghe thin. Eng kan ti ta emaw ni, Sap hming inbelh hi kan ching ta em em mai a. Thangthar hming phei hi chu Sap hming tel lo pawh a awm âwm lo hial a! Elizabeth, George, Leo, Mary, Margareth, Judy, Jenny, Henry, Robin, Simon, Jenita, hriat sen pawh a ni lo. Chung hming phuahchawp chu an lai-ah hming awmze mawi tak nei ai khan an han hmang lar leh ta nghal a, lehkha ziakah ngawt phei chuan Sap an ni emaw tih mai turin an hmang lar lehnghal! - Eli tia an koh han hmuhte hian te tak tê, hâng deuh, châwn sek tak te an lo ni ta dah rual a, NGO PUAKA MAWI. Thenkhat chuan Roman Catholic chuan Saint hming put a tula tite pawh in awm mai thei. Kan Chief Minister hmasa ber, Ch.Chhunga pawh kha 1940/41 lama Roman Catholic ni tawh a ni. CH.CHHUNGA a ni mai. Tu vak mahin a Catholic hming an hre lo. A hmang lo tlat a. An biak in leh sakhaw thilah te chuan a hmang mahna! A nupui pawh khi chuti tho, mahse, a tua mahin an Roman hming an hman loh avangin kha, khu lai ram buaiah pawh Pi Roa ram sawisek a nih kha. Catholic tho a nia, sap hming a neih pawh kan hriat hlawm loh hi. Roman Catholic mi thianghlim pu ngei ngei tur pawh an mi thianghlim hming kan hriat loh laia tu tu emawin sap (?) hming an mahni lai-ah hming tha tak tak aia an han hmang lar zawk hi, MIZO TAN CHUAN NA KA TI. Tunlai thangthar tam ber hian an invuah chawp a, an hmang lar zawk a, an lai-ah hming an bo thak duh a nih hi. Thalaite u, in ngaihtuah chiang teh u, MIZO tihlar tumin mi thiamten nasa takin tan an la a, chutih laia Jim, Larry, Eli, Mary lo intih kawkalh ve hian hnam hma (Mizo hnam) a khawih niin ka hria. Heng sap hming hmang zawng zawng hian paih vekin an lai-ah hming ngei mai kha hmang lar leh se ka ti thin. Hei hi a theih lul tawh lo a nih pawhin April ni 8, 2018 hnua Mizo nau piang hmingah hi chuan Mizo ding tak hi sa vekin sap (nial nual) hming hi telh tawh loh ni se. Chuti lo chu, nakin lawka kan Chief Secretary chu Mizo dik tak ni siin Pu Arnold-a te an ni lo ang tih tunge sawi thei i. Mizoram Chief Minister R.Hubert?? Mizoin Mizo taka hmsawn kan tumna kawngah hian kan sap hming hian a tikhawbaw thei fu mai tur a nia. I fimkhur ang u.