Ka vawnsawr ilo vel avangin Chawlhni vawi thum lai mai ka ‘KA HUANG’ lo a. Chubakah kei ve tehlula ‘KA HUANG’ hi miin an ninte pawh hlauin ka inthlahrung bawk a ni. Ziaktu dang hi chuan chhiartu tana tangkai leh chhiar nahawm tak tak an ziak a, keia ziak ve hi chu tangkaina pakhat mah nei lo, chhiar peih hram tana chhiar tur a ni ringawt mai a nih hi. Aw le, ka ziak tawh na a, la hre lo an tam riauin ka hriat avangin Hapta kar ni Mizoin kan neih dan - Pu L.M.Chhinga, LP Teacher ziak ka chhiar, ka ziak chhawng ang e. Sunday atangin an tan a, Sunday chu Pathianni emaw, Lalpa ni tih emaw an duh vek a. Mahse, Exodus 20:7 “Lalpa i Pathian hming chu i lam mai mai tur a ni lo; Lalpa chuan a hming lam mai mai chu thiam loh chantir lohvin a chhuah dawn si lo va,” tih lai hian a dal tlatin an hria a ni. Hapta kar ni hminga vuah a nih chuan an lam sek mai dawn si a, Pa pakhat chuan Vaihoin Robibar an vuah hi i hmang ve mai ang u a ti a, an uksak lo. A then chuan Chawlhni tih an duh deuh a; mahse, Chawlhni tih ringawt fahran chu an hreh bawk si. Tichuan, an dah tha ta a. Monday atangin an tan a, Hnathawh tanni - Thawhtanni, Thawhlehni - kar khata ni laihawl - Nilaini - Sunday atanga chhiara ni 5 ni - Ningani, Lehkha zirtawpni - Zirtawpni. Sunday atana inrin ni - Inrinni tih chu rual takin an rem thlup mai a ni. Sunday hming vuah tur chuan - Chawhnu lam atan an dah ta a. Chawfak kham chuan an han tan leh a, an buai leh ta a. Vai tawng duha khan, “In inrem thei si lo, Robibar hi i hmang ve mai ang u ka tih leh min uksak si lo, in duh leh CHUKCHU pawh ti ula a pawi lo,” a ti a ni awm e. Zosap chuan, “Nang kha, i kamit a bal hle a ni, hawng la, luiah zu su fai rawng,” tiin a tir hawng ta a ni! Tichuan, an khel vak hnu chuan an duh em em Pathianni/Lalpa ni tih chu Exodus 20:7 avang chuan an vuah ngam ta lo a, CHAWLHNI-ah an sir tluk ta a ni. Ringtu hmasate hian Pathian hi zah taktein an zah tih a lang. Ka pain ringtu hmasate chanchin tawite a ziaknaah pawh khan Lalpa zanriah kil dawn kar hian an chhung/nupa inhnial deuh se an ei ngam lo. Pathian an zah/tih avangin tiin a ziak ve nghe nghe a ni. Aw le, he lam chu duhtawk ila. A ni telin ka upa a - a ni telin ka lunglen a zual mai. Hman zan chu Dam Veng, Venghnuai leh Thakthing Veng (Rahsi Veng)-a kan harh thawt thawt lai ka ngaihtuah a, ho hle mah se ka lung a tileng nasa mai nia. Kungliani (Dr. Thanliana farnu) te in saw tlangval bupui a ni ringawr mai. A zaidam em em a, rui deuhin ri deuh buan buan mah ila, an dawh thei em em ringawt mai a ni. Tum khat pawh Sapthlenga nen Bawra nen kan lut a, ruah a sur deuh avangin. Ruah a bân chuan Mission Veng lam panin kan chhuak leh ta mai a, Venghnuai peng thlen dawn hian a ngal reka hnawk deuh chu a han dap a, laphiar kutphah chen dawn lai hi a lo ni a, lain a la zawm avangin kan hlum kir ve ta a, Kungliani te inah kan chhui lut a, an wool la hlum khan kawngka a kan ve theih loh avangin a lo vir a lo vir mai a lo ni. A berh teh a sin aw! Chawlhni hi chuan tuna LAD building kawtah sawn kan inbah thin. Kapthangpuii te, Lalchhingpuii te, tu tu nula emaw te leh tlangval te nen Bahpui an tih te, Chhuihkah an tihte kha thiam e, thiam lo e, kan uar em em mai thin. Tum khat pawh kan in-bahpui a, tlangval chu thawkpalai, thawk nulai, thawkpu/pilai/nilai/ulai/naulai/vahlai - kan hriat zawng zawng kha kan .... palai zo tawh a. A hnu deuhah chuan tlangval pakhat (tunah pawh a la dam) lo tel ve a tum a. Ka thawk palai ang - an awm tawh. A nih nulai/ulai/naulai..... an awm tawh a ni vek mai si, hming tur awm a hre si lo. A tawpah, “A nih, ka thawk chhu hur mai ang,” a ti a, awm hel lo, a thawk chhu hur ve ta nia! Thakthing, Dam Veng, Venghnuaia ka tam lai chuan tam tak ka ni. Khua a lo thal a, tui a kang a, nula tuichawi kan han chhawm a, Lungrem Tuikhur, dam em em maiah, tlangsam tang ro ilo kan han fawm khawm a, lum lo zet mai kan han ai tlaivar thelh tumte kha tunah chuang LUNG TILENG a ni ta mai. Venghnuaiah hi chuan chhang siam leh thingpui zuar an thahnem bik deuh a, Hla phuah thiam Rokunga pian leh murna a ni bawk a, Mission Veng atangin a hla lo bawk a, Kohhran inkhawm hi Mission Veng atangin a zuk hmanpui chawk bawk a, a hoa zaipawl kan neih pawhin Venghnuai nula, Kapthangi te, Hnuni te, Biakkungi te leh tu tu emaw an tel chawk mai. Dam Vengah lah ngaihzawng ka nei a, a veng neitu ni awm hrimin ka tam mai bawk. Khang hunte kha an kir leh dawn tawh si loa leh, Gas thuk, electric tih angrengte la awm lo mah se, “A thim em mai, leng lo mai teh ang,” kan ti ngai miah lo, kan phal bawk hek lo. Nula rim laia, “Mi zawn tur a awm e,” tih han hriat a, kan thil eng eng emawnula mal chunga kan han paih thak a, kan han tlan ve nal nal maite kha, kan nula rimte pawh khan an ngaithiam em em mai. Tunah zawng an la dam pawhin kum 80 aia hniam lo an ni vek tawh ang. He KA HUANG chhiar, khatih laia awm ve thin in awm chuan min rawn phone teh u a, lung a leng alawm mawle!