Tun tum chu ka’n chawk chaw rawi leh teh ang. Keini ang mi a tan chuan thu sei pui pui sawi theih pawh a nih ve loh hi. A hmasain Pathian thu nia ka hriat ka’n sawi ve kha han chhunzawm lawk ila. Mizo hian Pathian thu kan hre lutuk ta a, HRIAT-ah kan ram tang a, kan nih tur zawk AWIH-ah kan tlabal leh hle si. Sawrkhar hnathawk ka nih chuan sawrkhar zinga pakhat ka ni tih hre reng reng loin chu sawrkhar chu ka ei thei dan ang anga ei ka tum mai hian kan langin ka hre thin. Kan retheih luat avangin a hnîk theih dan dana hnîk hi kan tum em ni zawk? Assam Chief Secretary thin - K.N.Kidwai ICS te khan a car a hmang duh mang lo, Ward Lake ral, a bangla atang khan kein a lo chho a, kawng te tak teah khan a lo chho a. Sectt.-ah a pa naran luh leh mai thin. Keiniho chu hei - Designation plate bel leh bel loh tih ang reng mai maiah chanchinbua chhiar ninawm khawpin kan ziak biau buai mai a nih hi! A hmaa ka sawi ang Group D atanga Chief Minister hi sawrkhar a ni ber mai. Chuta hnathawk chu i nih avangin a tê emaw, i lian emaw chu sawrkhar zinga mi chu i nih mai bakah Khristian i nih lehnghal avangin RINAWM taka i thawh hi i bat a ni. Hmanni lawka siam World Bank road-a Chite kânna lei a chhia kan tihte hi a zahthlak, vai siam ni rawh sek sek, a endiktu Engineer pawh lungkuna zawng zat in awm a ni lo’m ni?! Kelkangah nuai hnih chuang kal tawhin kan insawi a, chu?Thlarau Thianghlim avang chuan SIMNA kan hawn em? NGE Pathian thu leh sawrkhar hna hi thil hrang daih? Khristian ka nih chuan ka hnathawh apiangah ka rinawm tur a ni tihte hi, kan chhiar pel mai em ni teh reng, heti taka hnîk theih theih kan hnîk zel mai hi. Mizo Khristian hmasa Khuma te, Khara te ai khan hriat lamah chuan Pathian thu hi kan hre tam daih theuh zawkin ka ring; MAHSE, awih lamah chuan an ne pawh kan ek leh si lo. Ziakah chuan Pathian thu awih lo nih chu kan duh bau lo; mahse, thawh leh tih lamah chuan kan nêp em em si. Zu in, zu zawrh tih ang bawr velah kan intibuai em em mai a, ZU hi tha lo i tih chuan IN LO MAI RAWH emaw, ZUAR LO MAI RAWH. Prohibited mai ni lo, TOTALLY PROHIBITED a nih lai pawh khan a tam em kha, tu khawvel mihring mah hian an titawp thei lo ang. Noa te, Lota te pawh khan an ina an ruih kha. Tha loa i hriat phawt chuan in lo mai la, zuar lo mai la a ni mai. Kei ka rin ve dan chuan zu in mi te, kuhvakhawr ei thin te, mei zuk ching te, sahdah hmuam te hian vanram an kal loh phah ka ring thak lo. ‘Thil engkim hi a lutuk reng reng chu Tha a awm lo’ tihah hian innghat ila. Sikulpui Hall bangah khan khi thufing bakah khian ‘Tam lutuka thi aiin puar lutuka thi an tam zawk’ tih an tar bawk. Zu ruih hi a tha lo let tawp. A! Zu ruih chang a ni lo, motor ruih te, kuhva ruih te, ni sa ruihte hi a tha lo vek mai. RUIH hi a tha lo hrim hrim a niang. Pathian thu ruihte pawh hi a tha loin a pawi viau ta ve ang. RUIH vanga sim phah hlauh nana hmangte erawh chu thudang a ni mahna. Kei ngei pawh hian ka pi bilat sahdah, kum 1936 vel khan ka hmuam ru a, a tui ka lem zel sia, ka’n rui tak tak mai chuh, ek leh luak ka fawm a, ka tap bawk. MAHSE, chuta tang chuan ka kaah sahdah tih lam chi hi a lut leh ngai ta lo. Chuti ang atan chuan a tha mahna le. Thu dang alai chuan Doctor thiam tak pahnih, Dr. Hrekima leh Dr. Chawnglungmuana, damlo mi harsate tanpuitu tangkai em em kar a thu ber niawm fahrana hmun sei ber lo chan ve hi ka inthlahrung thin. Mahse, a tituten min ti ve lawi si a, ka zak bawk. Hrekima phei hi chu Cable TV-ah ka hmu tamin a thusawi hi ngaihnawm ka tih zawng a ni lehnghal a, kan venga koh tak ka nap thin. Kan thu pha ve si lo ale. Thangthar hian saptawng in thiam luat vang en ni ta ngei heti em ema Mizo tawng in baha in thiam loh tak mai! Mizo tawng hi a thlûk a pawimawh em em ringawt mai a, thu mal thlûk dan tihdan avang hian a awmzia pawh a dang zel tih hriat a tha. Tun lai hian TV-a fakna puannaah ‘Chang dang a kân thei lo’ tih hi CHANG hi mau chang thlukin an thluk tlat zel. Sa châng tih thluka thluk zawk tur a ni. Sa a châng a, a kah tak avangin a chân leh pawhin a chânna ngai kha khân bera a hriat avangin CHâNG DANG A KâN THEI LO a ni. Sap tawng hi kan ngaihsan em em avang hian Mizo tawnga awm sa reng pawh thiam uk loin saptawng kan letling a, kan hmang ngawt zel mai. Entir nan Sapin ‘Don’t make a noise’ an tih avangin bengchhengte kan siam ve ta zel a, ‘Bengchheng suh’ tih mai thin kha ‘Bengchheng siam suh’ te kan ti vai tingtang kawi ta vel. Tawng hmang a awm. Hnam a hran ang bawkin tawng hmang pawh a hrang tih hriat a tha. Khaimah aw: ‘Ka lu a met’ tih hi sap tawngin let ila, ‘He cut my head’ tih hi a tawng inlet dan ngau ngauah chuan a dik chiah a ni lo’m ni? ‘The Lord is my shepherd’ tih hi tunlai thangthar chuan let se, ‘Lalpa chu ka berampu a ni’ tiin an leh chhuah mai hmel a nih hi. Sapin Cup an laka LIFT an hman avanga CHAWI kan han hmang ve ngawtte hi a dik lo hle a ni. Cup/Shield an la a ni mai. ‘Kan fapa chuan pakhatna a rawn hauh hawng,’ te kan ti mai mai. HAUH te chu nep tak a ni. ‘I mei zuk kham ka hauh’ tih hi tawng dik a ni. Mahse, a hauh ringawt a, a la khawih eih lo. Tunlaia kan hman dan chu, ‘Pakhatna a rawn hauh a nih kha’ te an ti mai mai a. ‘Pakhatna a rawn ni hawng’ tih zawk tur a ni. HAUH hi chu la chan loh thil a ni. nichin tih lah kan ti NACHIN zo ta. Mak tak maiin hun sawi nan hian NI, IN leh NAK hi kan nei fel thlap mai. NAK hi hun lo la awm tur sawi nan; mahse, NACHIN ti thangthar zingah hmang an tam mai. Hun kal tawh a nih avangin Nachin ni lovin NICHIN tih tur a ni. Hawh u, Mizo tawng hi kan hman vangtlang tawngkam na na na hi chu hman dik i tum hram hrang ang u. Hman than tawh avangin a harsa tih chu hriat sa a ni. Mahse, mahni insiam tha hram ila. Hetih kawngah hi chuan Idol Judge pakhat, Siamkima hi ka fak ngawt mai - hun rei tak NACHIN a lo tih tawh avangin a tipalh leh thin na a, NICHIN tiin a sawi nawn leh deuh zel hi - nakin lawkah chuan a la NICHIN mai ta ve ang.