Ka Huang

Ka Huang (August 17, 2014)

Chhuanliana BVT - Aug 16, 2014

Ka Huang (August 17, 2014)

Ka ko ka thlak dawn. Tun issue atanga issue pahnih pathum emaw chu Mizo hmeichhe zinga ngaihsanawm ka tih ber, Pi Pawngi chanchin hi chhuah ka tum rih a ni. Pi Pawngi chu Pu Suakkunga, Kulikawna awm thin nupui a ni a, Mizo Midwife hmasa ber leh Mizo hmeichhe sawrkar hnathawk hmasa ber a ni a. A chanchin hi kim deuh zawka hriat a châkawm tehlul nen, thil hriat awlai a ni tawh si lo a, ka hriat ve ang ang ka han chhuah a ni. A hming tak chu LIANCHUHTHANGI a ni. Kum 1889-ah Lungrang khuaah a piang a. A nu leh pain hma taka an boralsan avangin a piin a enkawl a. A?pi pawh hian a boralsan leh tak zel avangin, Zote lal hnenah lal bawihah a tlu lut ta a. Hetah hian lal bawih bawk, Hlunziki nen an inchhar a ni. Zote khuaah hian Mizo Pathian thu awih hmasa ber Khuma te khan Pathian thu an rawn hril a. Pawngi leh Hlunziki chuan Pathian thu an awih dun ta a. Chu chu lalin a hriat chian a thin a rim em em a, an chhip samah thamin khawlai dungah te a hnuhtir vak vak thin a; mahse, a hneh thei chuang lo. Khuma te va zin leh hnenah an chanchinte an hrilh a, ani chuan Aizawla kala Zosap chawma awm mai turin a lo hrilh a. Remchang an zawng ru ta a ni. Tuk khat chu thingphur tur ni awm takin êm leh hreipui nen an thawk chhuak a, thui fe an kal hnuah an êm chu an paih a, Aizawl lam an pan ta a. Man an hlauh em avangin hmanhmawh em emin an kal a - ram ril leh sakeite pawh an hlau hman tawh lo, lal mi tirhten an man hman ang a, an hruai kir ang tih mawlh an hlau a ni. Tichuan, Sialsuk an thleng a, Pu Hrangchina (James Dokhuma pa) inah an tlu lut ta a. Chuta tang chuan Aizawl an rawn pan leh ta a. Aizawl an luh ni chuan an thim nasa mai a, chubakah thlipui leh ruahpui haw turin a um a, kawlphe chu an kawng êntu a ni hlauh thung. An hmanhmawh em vang chu ni maw, Hlunziki chu a tamchhawl ta a, Pawngi hnenah chuan, “Ka kal thei tawh lo, min kalsan la, kei chu hetah hian ka thi mai ang,” te a han ti thin a ni awm e. Pawngi chuan, “Ni lo e, ti hian kan kal dun zel ang a, Aizawl a hla tawh lo e,” tiin a thlamuan thin a - a chang chuan a han paw-bahlat thin a ni awm e. Tichuan, zan rei deuh takah Aizawl lutin Kulikawn hnuaia Khasi Vengah mei a lo de ve ve a - chu inah chuan an lut ta chawt mai a ni. An lut fel chauh tih chuan thlipui leh ruahpui chu namen loin a baw ta huau huau mai a ni. An tluk luhnate kha Khasi Kristian an lo ni hlauh mai a, duat takin an lo mikhual a, zanriah hlim taka eiin an tawngtaiho ta a ni an ti. A tuk zingah Zosap hnenah an han hruai a, Zosap chawmin an awm ta a ni. Chawma an awm lai hian Zosap hoin Pathian thu hrilin an zin thin. Hun eng emaw ti hnuah Pawngi chu Nu-i (J.Manliana nu) nen tawng zir turin Habirary-ah an kal a. Thla ruk an awm hnuah Pawngi chuan zir puitling loin Lady Dufferin Hospital, Culcutta-ah nauchhar (Midwifery) zir turin an thiannu chu a kalsan ta a ni. Hlawhtling taka Midwifery a zawh hnuah Aizawl Civil Hospital-ah (hetih hun lai hi chuan Aizawl Mizo damdawi in tih mai la ni awm tak a ni) kum 1909 khan Midwife hna a zawm ta a ni. Kum 1913-ah Pu Suakkunga nen an innei a. Kulikhawnah an khawsa a. An fa upa ber Khawtinthanga chu kum 1914 February-ah a piang a. Fapa 3 leh fanu 4 nei hmanin Pawngi chu 10-5-1934 khan santenin a boral ta a ni. Pi Pawngi hian a hnathawh a tlin hle bakah mi tlawmngai thei em em ni tur a ni - damdawi ina a hna pangngai bakah, Aizawl leh a chhehvel khuaa nauchhar tura an koh phawt chuan zanlaiah pawh, khaw chhe eng ang hnuaiah pawh a chhungte damlo deuhte pawh kalsanin, an kohna apiangah, an chunga harsatna thleng ve ngai lo leh chhangchhiat hre ve ngai lo ni awm takin phur takin a kal zel mai an ti. Chung hun lai chuan mahni in lama Midwife kohin koh man a nei ang tih nachang hria chu tlem te tak meuh an la ni awm e. Thenkhat erawh lawmthu sawi nan puanhlap (puan mawl satliah) te, artui te chu an pe ve zauh thin awm e. A ko apiang hnenah a thiam ang thawk turin Pathian hmingin a kal zel mai a ni. Chutia thahnemngai taka khawtlang tan taima em ema a thawh lai leh an fa tlum ber Lalzawna pawh kum 4/5 lek (ani pawh kum 84 mi niin Dec. 2013?khan Chittagong (Bangladesh)-ah a boral ta a. Tunah Pi Pawngi fate chu U?Chhungi (Shillong-ah) leh U Neihpuii w/o H.Raltawna te chauh an dam ta) a nih laiin santenin Pi Pawngi chu ni 10-5-1934 khan a boral ta hlauh mai a ni. Chutih khawpa tanpui ngaite tanpuitu a nih vang chu a ni chek ang - Aizawl khawpui hian a sun takmeuh ni ngei tur a ni, ni 15-10-1934 khan Mission Veng biak inpuiah Pi Pawngi sunna inkhawm an nei a. Aizawl mi lian leh mi pawimawh an kim hle an ti. Chu inkhawm atang chuan heng thil hi an rawt chhuak a:- 1) Pi Pawngi hriatrengna ngaihtuah pawl siam. 2) Vantlang hnena hriatrengna thawhlawm khawn. 3) Hriatrengna siam tur chu ama lampang ni se. A hriatreng tura an ngaihtuah ber chu Pi Pawngi Memorial Maternity Centre din a ni (awm zel tura ziak loh theih a ni lo, Chawlhni leh lamah i chhunzawm mai ang).
Share now