Ni 5 leh ni 12 August-a KA HUANG ka chhuah loh chhan chu.. Ka thenawm doctor leh Psychiatrist te hian thu tangkai em em, thlarau leh taksa tana thil tangkai an chhuah laia thu nep zet lo chhuah ve hi miin min lo nin viau takin te ka tia. Feren ram kal hawn lai vel khan Feren ram chanchin ngaithla khan an lenchilh thin a ni awm e. Chutih lai chuan tupain a chanchin a lo sawi ve sek mai a, pa pakhat khan a ngai thei ta lo a, “Miin an Feren ram kal chanchin ngaihnawm an sawi laia nanga ta loa Chandrakunaa ka ek chhuahzia tih mai mai... Nghal chhu, ngawi chipcham rawh, chuti lo chu i mitah ka ek ka tat ang,” a ti a, an tihte kha ka hre chhuak deuh a, Tum hnih chhuak chu engmah sawi loin ka’n ngawi teh ang ka tia. Mak tak maiin phone-in, “Engati nge, i dam na nge? Khawnge KA HUANG?” te an rawn tih tak nual avangin ka han chhuah leh ta rih a nih hi. Chubakah hei, kum 90 ka pumhlum ve dawn ta mai a, UPA ka inti ve ta deuh, hmuh a harsate deuh a ni. Mit vei lam chauh ka hmang lehnghal bawk sia, rei pui ka tlin tawh lo ang.   Veng hming tam zawk hi awmze neia phuah a ni. Kulikawn.. Coolie-ho innghahkhawmna, Bawngpukawn, Bawngpuho innghahkhawmna.   Venghlui leh Thakthing Veng hian chanchin ngaihnawm deuh bik a nei a. Chu chu: Bawrhsap hmasa lam tu emaw khan a bangla atanga hnai thei deuha Rahsi (Chaprahsi)-ho dah kha awlsam phah a inring a niang, tuna Venghlui kan tihah hian a dah khawm a. Anni kamding ta chuan silaite an lei a, chutih lai chuan ramsa a la tam si a, an kap chamchi mai a ni awm e. Sa kap na na na chuan, “Ka ai e,” tiin zu nen a lu an lâm a, tlang an tlir a, silai an kap zankhua thin a ni awm e. Chu vang chuan Rahsi Venghlui tih a ni ta a, an va pem pheina chu Rahsi Veng tih a ni ta a ni, an tia lawm.   Rahsi sawi takah chuan hman lai rahsi kha mak tak tak, mahni hnaa rinawm tlat chi kha an tam awm hle mai. Bawrhsap khan Rahsi zawng zawng kha diary neih tur tiin lehkhabu (engagement pad?) a pa a, an ni tin hna thawh ziak turin a hrilh a. Pu Suakhnuna chu Bawrhsap tirhkah deuh bik a ni awm e. Thla tawpah a en ta a. Pu Suakhnuna diary-ah chuan: MONDAY: Vawiin pisa ka kai a, a tul apiang ka ti.   TUESDAY: -do-   WEDNESDAY: -do- tiin Zirtawpni thleng -do- a tia, a karlehah pawh chuan chuti bawk chuan a ziak a. Bawrhsap chuan a ko ta a, “I hna thawh ziak tura tih i nia, ‘A tul apiang ka ti,’ tih mai mai hi ziak tur i ni lo,” tiin a hau rawk mai a ni awm a. Pu Suakhnuna chuan diau miah loin, “Ka pu, khatiang zungpui hmet lek lehkhaah khan pachang ni leng hna ziah sen a ni lo, khatia, ‘A tul apiang ka ti,’ tih khan a fun kim vek a ni,” a ti mauh mai a ni awm e. Bawrhsap chuan, “A nih, eng nge i thawh chu han sawi teh,” a tia. Pu Suakhnuna chuan, “Pisa ka lo thleng dek dek a, ‘Rahsi, Bangla-ah zuk kal la, ka in tur i pi Thingpui zuk dil teh,’ i tia. Ka lo thleng chauh a, ‘Rahsi, Buchhawna ko rawh.’ Ka lo thleng chauh a, ‘Rahsi, hei hi Head Clerk pe rawh.’ Ka lo thleng chauh a, ‘Rahsi, Kailuia ko rawh.’ Ka lo thleng leh chauh a, thut pawh thu hahchawl hman loin, ‘Rahsi, i pi hnenah zuk kal la, thingpui zuk la rawh.’ Ka lo thleng leh chauh a, ‘Rahsi, Bazarah, Chhotelala dawrhah va kal la, a bain Grand National SIkret bawm 5 va la rawh.’ Ka lo thleng a, thut pawh ka thut hmain, ‘Rahsi, Head Clerk ko rawh. Ka lo thleng leh chauh a, ‘Rahsi, thingpui no ruak hi banglaah zuk dah rawh,’ i tia. Hahdam hman reng reng loin min tir nileng zak a. Chung zawng zawng chu engtin nge heti ang zungpui hmet leka hlau lehkhaah hian ka ziak len theih ang? Hetia, ‘Vawiinah pisa ka kai, a tul apiang ka ti,’ tih hian a fun kim vek a ni,” a ti ta tlat mai a. Bawrhsap mangang chuan, “Assam rama diary tha ber, a frame siam ula pisapuiah tar rawh u,” a ti e an tia lawm.   Pu Thangpatea kan tih mai thin, Dr. Thanliana pate kha mahni duty-a rinawm em em an ni tawp mai awm e. Bawrhsap McDonald-a, thinbutut nei (accentric) kha a vil a ni awm a. Pa pakhatin Bawrhsap address lehkha a rawn thehlut a ni awm a, Pu Thangpatea chuan Bawrhsap hmaah a va pharh a, ani chuan en pawh en loin a paih a ni awm e. Pu Thanga chuan engmah sawi loin a chhar a, Bawrhsap hmaah chuan a dah leh mai a, a lo paih leh mai a. Pu Thanga chuan a chhar leh a, a hmaah bawk chuan a va phar leh a, Bawrhsap thinrim chuan a thuai mum tawp a, a lo paih leh mai a, Pu Thanga pawh chuan ngawi rengin a chhar a, a mal chungah a zut mam a, a va dah leh mai a, McDonald sap chuan a chhiar ta nge nge a, action a la ta nge nge a ni an ti tia nia!   Rambuai hma khan babu (clerk) pakhat chu... a tuk office holiday a nih avangin a vang chaun zu a in ta ngat ngat a, a rui lutuk chu holiday nileng chuan a muhil si a, office kal ni zingah a harh a, holiday ni emaw tiin a chawl veleh ta a. Ngaihtha takin a tukah chuan a va kal ve a, Attendance Register-a a hming a va dah tur chu Head Clerk chuan, “Engati nge niminah i lo kal loh” tiin a lo zawt a. Holiday ni kha a mut bo vek si avangin, “NIMIN A AWM EM NI?” a leh tih heu mai nia!!