Ka Huang

Ka Huang (August 24, 2014)

Chhuanliana BVT - Aug 24, 2014

Ka Huang (August 24, 2014)

Pi Pawngi Hriatrengna ngaihtuah pawl an siam chuan Pi Pawngi Memorial Committee an din a. Pu P.S.Dahrawk, Secretary, Chhinga Veng Pu Pachhunga, Treasurer (P&Sons, Dawrpui) Pu Laldailoa, Thawhlawm khawntu (Kulikawn) Pu Sainghinga, Thawhlawm khawntu (Zarkawt) Pu Ch.Pasena, Thawhlawm khawntu (Mission Veng) Pastor Chhuahkhama, Thawhlawm khawntu (Mission Veng) Pu Durra Chawngthu, Thawhlawm khawntu (Lunglei) Pu Chawngzika (Upa), Mission Veng hoin Pi Pawngi Memorial Maternity Centre din tur tanpui nan Drama hmuhnawm tak 'Krista Palai' thawnthu kha an chang bawk a ni. A lan danin Aizawl khawpui hi Pi Pawngi hriatrengna eng emaw din tur hian a khaw nawtin an tang tak meuh niin a lang. Keini tunlai mi hi chuan Pi Pawngi hi engti ang taka Aizawl leh a chhehvel khuaah a pawimawh tih kan hre ve phak lo a. Kei ngei pawh hian a fa naupang ber, Lalzawna chu ka rualpui a ni chauh mai a. Eng le khawle, heng Mizo leh Vai Chanchinbu (1936) vela an thu chhuah atang hian Pi Pawngi hnathawh hi ngaihsanawm tak a nih chu a ngaihtuah theih riakruak mai awm e: (Extracts from Mizo leh Vai Chanchinbu July 1936). Pi Pawngi, Midwife hriatrengna Mi tam tak chuan in la hre reng ang a, kum 1934 May thla khan Pi Pawngi Midwife chuan min lo thihsan ta a. Amah hi Mizo hmeichhe zinga damdawi lam hna thawk hmasa ber a ni a, Aijal leh a vel khuaa awmte chuan a tangkaizia kha an hre em em theuhin a rinawm a. Kan Mizo hmeichhe zingah chuan amah anga vantlang zinga tangkai kha tun chinah rih chuan an la awm lo a ni awm e. Mi taima tak leh tlawmngai em em mai a ni a. Tunlai aia thil kan hriat tlem lai leh mi thiamte pawh an la awm loh lai atang khan Aijal damdawi inah hian a thawk thin a, a tul chuan thingtlangah te pawh a kal bawk thin a. Mi rethei leh mi tha tam tak Aijal vela mi hi chu amah ruai lo leh hmang lo pawh kan awm loin a rinawm a ni. Nimahsela tumah Pi Pawngi chungah khan vuina em em nei kan awmin ka ring lo. Amah pawh khan tuma chunga a vuina kan hre ngai lo a ni ang. Chutiangin mi dang ama thawh ang thawk an awm ve hma pawhin kum tam tak a thawk a, mahse, ama hnathawh lam thuah chauh khan chuan tuman an rel ngai lo, relna a awm lo a ni ang, mi chhia leh tha tan pawh. Miin eng hunah pawh an koh chuan a kal zel mai a ni, mi hnenah engmah pawh a phut ngai lo. Miin artui pum hnih khat an lo pek leh lawm takin a la mai a, puan hlap pakhat an pek leh a lawm viau bawk a; Pawngi kohin man a nei tih pawh hre loin mi tam tak chuan kan lo chhawr fo bawk a, a vui chuang hlei lo a, mi khati ang kha an vang hle tur a ni. Kan at lai leh kan pachhiat laia thawk awm (reng) a lo ni. Tun atangte hian mi tam takin lawmna chang kan la hre dawn chauh niin a lang a ni. Chutiangin kum 25 lai (1909-1934) kan hnam tana tangkai taka hna a lo thawh hnuin chatuan hmun lam min lo pansan ta a, kumkhaw chawlh hlennaah min kalsan ta a ni. A tangkaina leh pawimawhnate chu kan Aizawl khuaa kil tina mi liante leh kan hotute chuan an lo hre em em mai a, amah sunna inkhawm a hranin an siam a, Aizawl biak inpuiah mi pawimawh tha zawng an lo kal khawm a, a chanchinte an sawi hlawm a; a chhungte leh a fateho hnenah vantlangin kan sunpuizia leh kan ui theuhziate an hrilh bawk a. Mahse, chuta an thusawite chu ziak chhuah pawh ka tum lem lo a, amaherawhchu chumi inkhawmna atanga kan hotute thil rawt chu hetiang hi a ni: 1) Pi Pawngi Hriatrengna ngaihtuah pawl an siam a. 2) Vantlang hnenah Hriatrengna thawhlawm an khawn a. 3) Hriatrengna siam dan tur chu amaha hnathawh ang lampang ni sela an ti a. Tichuan Pawngi hriatreng nan chuan Maternity Ward (Nau nei enkawlna in emaw, pindan emaw) lo siam thei ila a tha berin an ring a, a damlaia a hnathawh nen pawh a induh a, tin, vantlang tana thil mamawh leh tangkai ber tur a ni bawk a. Chumi siam rilruk ber chuan thawhlawm pawh kha khawn a ni ta a. Aizawl chhung leh khua velah te, hmun tin atangin khawn ani hlawm a. (AWM ZEL TUR)
Share now