Ka chawhchawrawi dawn. Chawlhni hmasaa KA HUANG a chhuah lohna chhan chu - Tlang rângin aw - Kei tar kiring hian ka theihtawpin KA HUANG tur hi type writer-ah ka chhu vein ka chhiar nawn a, a dik lo ka hmuh zawng zawng ka tidik leh vek thin a, chuti chung chuan Zalen chanchinbua chhut kaina lamah ni maw? chhut sual hi a tlem lo thei lo khawp mai a ni. Mizo vek tho an ni sia tiin ka phun lungawi lo thei lo a. MAHSE, ZALEN a lo chhuah meuh hi chuan ka hisap aia tam hi dik lo a lo awm leh thin! Chutah tak chuan chhiartuin Chhuanliana BVT an rawn chhuahchhal titih zel mai si a, ka zah em avangin 27/7/2014-a chhuak tur kha chu ka puah ta lo tawp mai a ni. Chuti chung chuan chhiartu tu tute’n emaw ‘ENGATI NGE KA HUANG HI?’ an rawn ti leh bawk si. Chuvangin, hei 90% tal a dik tawh beiseiin ka’n chhuah leh ta ngawt a, eng tak ang maw? Tun tum chu ZU kan sawi ri ve ang e. Engtik atang tak khan nge kan khawvelah hian zu hi a awm tih hre lo mah ila, ka pu Lota te kha chu heh ve fu chu an ni chek a niang, a fanute a rai lai pawh a hre lo ni awm tak a nih kha, tak tak ni maw, mipa hian hre loin hmeichhia mutpui thei tak i maw. Kei ka huphurh zawng tak a ni! Kum 1963 kha em ni ta, Gauhati-ah ka kal a, ka thianpa Delhi-ah a lo awm bo si, DRY AREA a ni an lo ti khang lang si, Rakzu chauh hotel chhawkrain (hotel boy) min pe thei a, Delhi atang chuan a lo haw hlauh mai a, ‘Nuam i ti em?’ tiin min zawt a, ‘Dry Area a nia, nuam ka ti lo,’ ka ti a. Min pawt chhuak a, kawngpui ân lo khawimaw lai kudam lianpui maiah hian min hruai lut a. Zu chu zu chu, amah Chawngzika dan takah Tlawhmuk ruk aia tam hi a lo awm lawi si! Kan in teuh mai nia. Tichuan Assam khan Dry Area a tih vel kha a sut leh ta ni maw ka ti mai. Zu hi mihring awmnaah tawh phawt chuan a awm a, Mizorama kohhran tin mai hian SUAL kan ti em em ringawt mai chu a ni a, mahse kua a hreuh thiam ngang a niang hei, kum 17 zet KHAP BUR kan hmang a, mahse thil khapah chuan a tam pawl tak ni awm tak a ni. Mahni han insawi ila, heh ve tak mai ka ni thin a, Health Department kum thar picnic-ah te khan ruih lamah Gold Medal hmu tlak khawpin ka khawsa. Tin-zu kha kei chuan tui ka ti ber a (Zu sawr kha) Rakzu leh rum tih ang reng hi chu a tui pawh ka ti lo, ruih nan a ni mai, tawng huai nan te. MAHSE engtik kum emaw atang khan, ka ngeih loh pawh hre lem loin ka nghei tawp mai a, kum 35/40 lai ka nghei ta. Ka nghei hlen dawn a niang, far khat pawh ka la in leh ta lo! KA HUANG a ni tlata ka ngaihdan ka sawi ve dawn! Thil reng reng hi a hmangtua thuin a tha lo ni maw ka ti ber mai. Sawi leh sawi hnu. Sikulpuia an tar thin, ‘THIL RENG RENG HI A LUTUK CHU THA A AWM LO TIH I HRIA EM?’ tih kha dik hi ka ti ngawih ngawih mai a ni. Damdawite pawh Proxyvon mumte kha na chhawk nan a that tehreng nen kan hman luat avangin drugs addict-a min chantirtu a ni mai. SUAL kan tih dan pawh hi i ngaihtuah ngai emaw:- Nula leh tlangval, an inneih hmaa an mut dun chuan SUAL a ni. Innei ta cheng, mipain a mutpui duh loh emaw, hmeichhiain a mutpui a duh loh emaw chuan SUAL a ni leh thung. Zu hi a tâwkte chuan miin in ta sela a hrisel phian tein zuk ring ia le. Hmana zu dawr an hawn kha MLTP Act hian chhilh loin zawrh zawm zel sela chu a tua mah hian eng huah kan ngaih ka ring tawh lo. An hawn tirh khan zu lei tum kha an/kan intlar put thin kha a nia, a tawp lamah kha chuan leitu tur an duh ve ngawih ngawih mai a nih kha, a zuarho khan. Tunah pawh han zuar hlawm sela, a tirah chuan zawng hur ta an sawi ang mai khan chu lut lut hlawm ta ve ang. Kum 5 ral hmain ngaiah kan neih kei chuan zuk ring tlat! Mizo hi a thar laia pâk huam mai, rei peih lem hlei lo kan nia, zu pawh hi chuti tho chu a ni ang tih ka ring. Amaherawhchu kan hman thar lai hian a vengtu tur pulit/excise lam hian ‘Khalfa khua’ an sawi ang maiin ngaihdamna tel miah loin han man zat zatin, Pu K.L.Liana leh a hote (?) lam pawhin rel kawh deuh viau phawt mai se, zu hi chuti anga an strick phawt chuan ruih lam hi a tlem ngei ngeiin ka ring thin. I ngaihtuah ngai emaw, Hotel RAJJ, MOONLIGHT HOTEL tih ang reng te kha - a tir chuan thawm pawh a that kha - 4 star hotel, room tina TV awm, lâmna hall te pawh tih ang reng a than vak reng kha. Thla hnih khat chu Moonlight-ah phei kha chuan tu tute emaw kha chu an che sap hle a ni lawm ni kha. Tuma khar a ni lo, a hlawk loa an khar mai a ni. Kan phak tawk leka siam Chawlhna Hotel te chu hei a la awm char char mai a nih hi. Khangho ruala Hotel din tun thlenga la awm chu RITZ chauh khi ni maw ka ti mai. Zu pawh hi kan han hiar-pui ngial ang a, nakin deuhah chuan a awm tih pawh kan hre lo thuaiin ka ring. Tin, zu in kan thiam ve mai ang. 'Kan thiam ve lo' tih tana tan hi a tha vak lo. Independent hma deuha (British chhuah hma) duh thlan theihna kan neih lai khan Mizo Union au-hla pakhat chu, ‘Independent kan thei em?’ ‘Thei lo’ ‘Engati nge kan theih loh?’ ‘Kan la â lutuk’ tih a nih kha. Try try again tih poetry-ah pawh. ‘Mi tih ngai kha engah nge, Nang i tih ve theih loh le, Hei hi pawm tlat zel ang che, Bei la, bei nawn rawh,’ tih a nih kha. Kan hotute hian zu zawrh phalna hi han kengkawh phawt se, a that ngang loh leh an thlak leh mai ta law. Kei ka ngaihdan tak takah chuan Pathian hian sual/tha lo zinga awm, AMAH avanga inhnamhnawih lote hi ‘KA FA’ a tih chu ni maw ka ti mai. Zu te, Nawhchizuar te, Corruption te, Tual thah te, Pawngsualte leh Pathian duh loh zawng thil tam tak hi he khawvelah hian a awm reng dawn. Chung zinga Pathian thu awih avanga ti ve lo kha a ni lawm ni khita Van nuama Tlante zai turte chu? Khatiang thil tha lo leh sual kha a awm loh chuan ENG HI NGE KAN SIM TAK ANG?