Pawl V, Section B-ah pawh chuan monitor bawk ka ni, tlar hmasa ber, a sir berah ka thu kak thin. Middle sikul ka kal chhungin pawl tinah a te pawl lam ka ni zel, ngam hi ka nei bar lo. Kulikawna Pa Kawla (s/o Rualkhuma) leh Laldinga (s/o Chawnghnuaia) te, K.C.Lalvunga inti ta, s/o Hrawva, Venghlui te kha ka tetpui te chu an ni deuh mai. Tum khat chu recurring decimal hi U Lungmuanan min zirtir a. “10 hi 3-in sem ta ila, a hmun 3 chu 9 a ni a, 1 a chuang a, a decimal-ah chantirin 0 belh ula, chuti bawk chu a ni leh thin, a tawp thei lo reng reng,” tiin. A?uar chuan, “Khawvela lehkhapuan zawng zawng pawh hmang ila, a tawp thei lo a ni; chuvangin, recurring decimal an ti a, whole number 3 piaha dot (.) kan chhut zawhah o belhin 3 vawi emaw sem ila, a tawp thei lo tih entir nan.. 3.333... tia kan chhut a ngai a ni,” tiin a sawi a. Mission Vengthlanga mi, Lalzuiliana, ka aia kum 3/4 vela upa, Pu Zuia tia koh lar em em khan, “Khawiah khawvel jawng jawng lehkhapuana kan semin a tawp loh ngai,” a tih rik chu U Lungmuana chuan a hriat hlauh mai a, a thinrim chuan, “Chhuanlian, tiang va la rawh,” a ti a, tiang tha pangngai ka lak chuan min vel ang tih ka hlauh avangin, pawnah ka tlan vat a, tlangsam kuang ka va la a, “A te lutuk,?Headmaster room-a Class III kha va la rawh,” min tia, a thu ang ngei chuan ka va la a, U Lungmuana vuak nat ber tum niin ka hria. Tiang pawh ama duhthlan a nih avangin chawlhlawkah pawh min vel ta chuang lo! Pu K.Zawla pawh kha Middle school zirtirtu pakhat a ni tho a, tiang a hmang ngai lo. Blackboard hrukna brush-a kutphaha chhut a ching thung. Tum khat chu Thanglunga (s/o Chalkhuma C.I., Thakthing veng thin) khan a tithinur a, dawhkanah a kut a dawhtir a, a chhut chilh chawrh mai a, chawlhlawka, “A na em?” tia kan zawh chuan, “Bakhikin Fahsuk a tina thei lo,” a ti mai! Pawl V kan nih atang khan kan zosap te, a bikin Pu Basil Jones khan min rawn zirtir thin, kar tin hian Games kan nei theuh a, kan game khelhna chu Missin field, tuna SAI in tih emaw ni, Mission Vengthlangah sawn a ni, ruah sur se sur suh se, kan kalin kan khel tho mai. Tum khat chu Football pangngai hmangin Rugby kan khel chiam mai a, tui a tling pem pum mai bawk si. Lalvunga (K.C) kha an bawhbet a, a thaw thei lo a, theihpatawp takmeuhin a bawhtu ka nam sawn a, kha rei deuh sela chu... a manganthlak khawp ang. 1942-ah Pawl VI ka kai chho veleh ta hram a, Selbuanga (DHS kha) (s/o Hrama, Kulikawn) nen kan thu dun a, kan bul chiahah chuan chhim lam mi, Lalmawia leh Lalnghinglova, tlangval zuai tawh mai ve ve, necktie te pawh chawlhni chuan awrh ngam hi, an awm bawk a. SELBUANGA hmingah chuan kan inhnial ta chiam mai a. Keinin B U A NG (ENG) tia kan sipel chu min hnial a, anni chuan B U A N G (GI) tiin an lam si. Keinin JI a nihte chuan Selbuanjia a ni ang chu kan tia, annin ENG a nihte chuan B U A ENG BUAENG a ni ang an tia, kan aia lian deuh tak ni mah se kan tang nasa mai maw le. An alphabet-a NG (eng) ti loin JI an tih thin vang lek lo niin. 1942-ah Pawl VI ka kai a, final exam-naah 33 zingah, 3rd division-ah 30-na ka tling hram. Naupang te e ti loin zu in ruk kan ching a... kha... “Pi Thiam, lungngai suh, ka chawm hlum ang che,” tih uar lai kha. Pi Thiami chu Venghnuai, zu zuar, hmeithai thianghlim, thingfak pawh silfaia pho ro leh ngat thin a ni. Khatih lai khan bel kha (tin zu) dere (12 paise) a ni.