Ni 8-12-2015 (Thawhlehni) zana Synod Palai lawm zana damdawi in thar sak, ‘John Williams’ (Mizoin Pu Daka kan tih mai) tih an sawi khan, Pu Daka a han tih khan ka thinlung a deng zawk mai a. Pu Daka tih kha John Williams a ni tih reng ka lo hre ve ngai lo a. Kum 1934 nge niang 35, ka hre lo, ka chal pâng tak mai hi a khawihli mauh mai a, a hnai dawn chuan a zum vat a, a eng kalh mai. Ka pain Durtlang damdawi in min panpui a, thir thutthlengah min thuttir a, ka hriat dan chuan Pu Daka khan sakawrbakcheh hian a hmawr a chep hawng ni maiin ka hria, Sap sister kha Pi Sangi kha em ni ra (?) hian min dawm bet a, ka tap hlarh hlarh mai tih ka hria, a zang an sawr chhuah hnu chuan bandage-in min tuamsak a, chu zawng chu ka hriat a ni. Pu Daka ka hmuh dan chu ke lehlam tlawn niin ka hria. Ka naupang em a, ka chiang lo, kum 5/6 emaw chauh ka nih chu. Chuta tang chuan ka ngaihtuahna chuan kan lo hawng thla a, Leitan kan lo thleng thla a (chung lai chuan tuna motor kawng lei tante khi a la awm miah lo. Khi khi chu kum 1943/44 vela ITA (Indian Tea Association)-ho laih chauh kha a ni. Khi leitan (chhakta zawk) khi Upa Laia, Mission Veng (Lalremliana, Aizawl College Lecturer pu)in a zuan kân a, U Rivela (Riwell Roy Diengdoh) khan zuan kân a tum ve a, mahse nulain a zuan kân zawh loh chuan a thi mai ang tih an hlauh avangin an pawt bet tlat tih thinte chu kan khum laizawl atang chuan ka hre chhuak chawp ta zel a. Chubakah chhun lam khan Doordarshan, Durtlang, Leitanah ka han kal a, BVT atangin Chite lui kanin World Bank Road kan zawh chho a, Chite hnar, Dhobi nullah an tih mai thinte chu eng factory in ni mai awm tak hian Green House te an lo sa thluah mai a. Chite kam lehlam atang chuan a khat tawk hian in awmin, a thente chuan Picnic spot ni mai awm, hmuh theih loha hung phui tlatte a nia. Chuta tang chuan Falkland, Thuampui, Bawngkwn a inzawm khir chho un ni ber maw ka ti mai. Bawngkawn kan tih tak rawk khu Bawngpu kawn tih thin a ni, chenna in pakhat te mah a awm ngai lo, Ramhlun pen atanga hla lo te, Durtlang lamah khian thutna chi reng reng loh, lung in thutthleng a inrem bur mai a, ka hriat ve chin chuan lungpui sam leh lung hmul eng eng emaw hian a bawm luk thin. Durtlang leh Chaltlang inkarah chenna in pakhat te pawh a awm ka hre lo. Tin, Bawngpu kawn leh Zarkawt inkarah chenna in a awm ka hre bawk lo. Tuna Ramhlun North, South tih velte khi ram palaileng vek (dik tak chuan tunah pawh RAMHLUN chu a awm lo tiraw?). Chaltlang khi chu khaw hlun tak a ni. Chaltlang atanga Zarkawt inkarah pawh khian kawng kamah chenna in a awm chuang bik lo. Chanmari, tuna Biak In hmun khi em ni ta? ah khian Assam Rifles kudam, an silai kah zirna bungrua eng eng emaw dahna, in khat chu a awm, mihringin an luah leh luah loh ka hre lo. Laipui tlang bulthut atanga Lower Chanmari lane phei zela Dawrpui Biak In kawmthlang thleng khian sipai chanmari kahna a ni. Laipuitlang bulthutah khian target an dah a, Yard 50, 100, 500, 600, 1000 ti velin dawrpui Biak In thlangah sawn ral hla ber a tawp niin ka hria. Chuvangin, Chanmari Veng hming pu ta a nih hi. Kawng chung lam thung - High sikul tlang bulthut kawng chhak lawk atang khian Thingpui an phun a, Thingpui huan hming a pu. Mahse, lawn tham thama lian a ni. Chhawlhring leh Tik Tik sava hian chen nan tak a hmang a, thlikthliekbawm an ei kha an e chhuak a, thingpui kung chakna ringin a chawr mai si a, sawrkharin tik tik leh chhawlhring lu man chu a siam a, lu khat zelah siki (25 paise) a ni. Tlem ti suh, chung hun laia patling nileng hlawh chu 50 paise a tling lo. A zik ni loin, a rah phai lama chin atan an tirah a ni mai thei. Tuna Zarkawt Biak In vel saw Babu tlang hla zawk kan ti a, vai babuho quarters-ah an awm thin. Zarkawt kawn leh Chanmari inkarah chenna in a awm ka hre lo. Kawn piah kawng chhak lamah Pu R.Buchhawna leh Pu Sainghinga an awm a, kawng thlang lamah chuan ka hriat sual loh chuan Pu Chhawnzinga te, Pu Hmartawnphunga (kan CM Hawla pa) te, Pu Lalaua, Counpounder (Biaksailoa pa) a awm. A in chung chu a lang phak ruau a ni. Tuna in hlui ber ni awm tak, Biak In kawmchara Pi Darawti in tih mai khi chu tlai khaw hnu, 1947 hnua mi a ni. Zarkawt tlangvalho infiamna (Basketball khelhna vel) khi Babu tlang hnai zawk kan ti a, Vai babuho an awm thin. Inder Singh-a khan hma khaw sang khan in a lo nei reng em ka hre lo. An awmna ka hriat ve chu Dawrpui phei, Man Hausaa thenawmah khuan a ni. Tawk rih se. Kan indipenden tum lam kha - Thianghlima (mi ang lo) ka tih kha Pu Lalliana, Anti-Malaria Officer (Retd)-in min rawn phone a, 1990 vela thi tawh awmin min hrilh. A ât dan kha a naupan laia a damlohna hriin a tihkhawloh niin min hrilh, para-typhoid an tihte pawh kha a vei a ni mahna. A damloh hma chuan, naupang harh tak leh inkhen kalte pawh thiam tak niin min rawn hrilh a ni. Keini indipenden tum man khawmho kha chu kan chhangchhia: Matu Thanga te, Thianghlima te, Sampujoy-a (Tuikuk) te, Durtlang mel 6/8 vela mi Thianga bawk te, indipenden tum e ti loin Assamese tlangval Birena te, Kalusingh-a te, Tachhip zirtirtu fapa U Thanga te kan ri nuk mai. Matu Thanga te angduang phei kha chuan ‘ka tang’ tih pawh an hre (feel) kher lo ang.