Tun Thawhtanni (8-12-2014)-a chhuak Vanglaini-ah khan ka rin loh tak maiin B.LALNEMA h/o Saikhumi, kum 1921-a piang, kum 1991-a chatuan ram pan ta, a fapa B.Lalhmingthanga’n an nupa thla nen meuh an ngaih thu a rawn chhuah a. An veng/khua pawh a rawn telh lo nain, U Lalnema hmel ka han hmuh meuh khan kum 1945 kum tantir lam ka hre vawng vawng mai a. A thlalak ka han en atang chuan ka hriat ve U Lalnema, kum 1945-a Assam Regiment Clerk rawn zawm kha ni ngeiin ka hria. Kum sarih tlawngin ka phak lo na a, ‘U Lalnem’ tiin ka ko thin. Naupang zawk daih mah ni ila, ka in-enroll hmasa a, ka hriat reng nachhan tak chu - Sylhet (tuna Bangladesh) atanga Shillong a rawn panin CC Co. (Commercial Carrying Company Bus)-ah a lo chuang chho a. Chutih laia Shillong panna bus lun ber an ni. An bus station inte pawh chu a ban thing tei mai mai vek a la ni. A chuanna bus a chhuah dawn chuan a ban (ding lam ni tain ka hria) bus pawnah a lo dah chhuak a ni awm a, bus chuan U Lalnema chuanna lam thing van chu a hrut lo chauh a, U Lalnema ban dah chhuah kha a tawt em emin a hrut chilh ta a, a ruh khawih chhe loin a banpuam chu bus bang leh thing ban karah chuan tawt em emin a hrut chilh chhuak thak ringawt mai a ni awm a, Karen line, Happy Valley, Shillong-a Clerk a rawn zawm chuan a ban chu min hmuhtir a, dam thar hlim a nih avangin a ban chu a rang ruai mai. U tak tak ang maia ka en a nih avangin a kan awmho chhung zawngte chuan ka nel teh thin a nia, a zaidam em em mai a ni. Kha U Lalnema ka tih kha B.Lalhmingthangan Vanglaini-a a rawn chhuah kha ni ngeiin ka hria a, ka lung a tilengin kan Adjutant, Capt. D.S.Elwell-a hlaua kan tlanchhiat thin laite kha a thar uar uar mai a ni. Thu dang dang sawi ka tum. Presbyterian Kohhran Nilai zan thupuia NUNTLANG tih kha (12-11-2014 zana zir) TLANG tih thluk dan kha a thluk fuh loin ‘ka ban tlang’ tiha tlang (through) anga ngai an lo awm nual emaw ni, Champhai khawi maw lai atangte pawhin min rawn zawt hial a. Ni e, kan tawng hi THLUK-in a hril em avang hian ngaih sual theih apui a tam reng a ni. Heta TLANG tih hi chu FIAN thluk anga lam tur a ni. Nuntlang - nun tha, dam (fair minded) tihna a ni ber ang chu. Kum 1985 atang khan kan kohhranin thuhriltuah min ruat ve a, tling lo chung chungin ka awm ve ta tauh tauh a, kumin 2014 hi kum 30 a pumhlumna a lo ni ve ta reng mai, Pathian zar takmeuh a ni. 2015 atang chuan ka chawl ve dawn ta ni awm tak a ni. Ni e, Pathian leh kohhran zarah kum 30 lai ka awm ve thei hi KA LAWM TAK MEUH A a ni. Tichuan, thuhriltu list-a ka awm chhunga ka thuhril hnuhnung ber chu Chawlhni hmasa (7-12-2014) khan chhunah ka hril a (he ni hian kum 85 leh thla 9-a upa ka ni) Kan kohhranin thuhriltute chu kumin chhungin tum khat tal RINAWMNA tih hi thupuia hmang turin min ngen a, a hmain ka sawi tawh naa, ka vei zawng tak a nih avangin RINAWMNA bawk chu thupuiah ka hmang leh a, Mizote hian kan mamawh ema ka hriat avangin. Ka thuhril tlangpui chu a hnuaia ka ziak ang lam hi a ni. RINAWMNA tih hi Mizote hian kan mamawh em ema ka inhriat avangin KA HUANG-ah ka rawn ziak ve ngawt mai a ni. Ka thlir ve dan atang chuan Mizo Khristiante hian a tlangpui thuah kan Pathian hi kan HNAIH LO niin ka hria. Israelho kha chu Pathian chungah an rinawm a, an rinawm loh pawhin Pathian chunga rinawm lo niin an inhre tlat thin. Mihring chung kha chu a VE chauh niin an hria. Fapa tlanbo (Luka 15) khan, “Ka pa, Vana mi chungah leh nangma mithmuhin thil ka tisual e,” a ti. Vana mi kha a pakhatnaah a dah a, a pa chu a ve chauhah a dah a ni. II Samuela bung 12-ah khan Davida’n Bathsebi a uire a, a pasal Uria ral kuta a thahtira Zawlnei Nathanan a zilh khan Davida chuan, “Lalpa chungah thil ka tisual ta a ni,” a ti. Sam 51:4-ah phei chuan, “I chungah, i chung chauhah thil ka tisuala,” a ti tawp mai. Uria chhungte hnenah ngaihdam dil tur ni awm tak, Pathian chunga tisual an nih an hre zel. Mizote hi chuan Uria chhungte chungah ngaihdam kan dil chauhin a rinawm. Fapa tlanbo leh Davida te hi chuan Pathian chunga thil tisual niin an inhria a ni. Pathian an hnaih bik niin an lang. Genesis bung 39-a Josepha chanchin phei hi chu - a rinawmna a lantirna hi PATHIAN HNENAH a ni, Pathian nen an inhnaih tak meuh niin a lang. NGE Josepha hian Pathian a hnaih tak meuh? Pharoa officer, Potifara nupui, han ngaihtuah mai pawha milian nupui, awl em em, mipa duh ngawih ngawihin muangleiah a han thlem a nia, keiniho hi chu ni ila a thlem hmasatuah kan tan loh pawhin kan it thlawn hle ta ve ang! Khata Josepha mutpuia a han thlem khan eng danga chhang loin, “Ngai teh, ka pu chuan he inah hian ka hnenah eng nge awm a hre si lo a, a neih zawng zawng ka kutah a dah vek a; he inah hian ka aia lian zawk tumah an awm lo a; a nupui i nih avangin nangmah chauh lo chu ka lakah engmah ui a nei hek lo; chutichuan engtin nge he sual lian tak hi tiin Pathian chunga thil ka tihsual theih ang?” a ti khalh mai a nih hi. Keini chuan hnial tehreng pawh ni ila, “Engtin nge ka pu Potiphara chungah thil ka tihsual ngam ang?” kan tih ka ring, kan hnial phal a nih pawhin. Ka inhmuh danin keini Mizo Khristiante hi chu - ka han sawi tak, Fapa tlanbo, Davida leh Josepha dinhmuna ding ni ta hlawm ila - fapa tlanbo pa, Uria chhungte, Potiphara te kha kan thinlungin Pathian aiin a hmu pawimawh zawkin ka ring a ni. A chhan chu: (1) Khristian inti si heti em ema corruption kan ngam hi. Dik tak chuan Tuirial Hydel Project heti taka a khawtlai chhan pawh hi compensation UCHUAK vang a nih kha. (2) Heti tak maia compensation hui theihna remchang kan zawn kan dap dan te. (3) Sawkar buhfai heti tak maia a pelhe hi. (4) Gas cylinder kan chin pawr dante hi. (5) Buk tling loa thil zawrh kan hreh loh dante hi. Chhiartu duh tak, ngaihtuah belh teh mah - Khristian inte ve si Pathian chunga thil tisualah kan inngai phak lo a ni lo maw? Pathian chunga thil tisual/tisual turah kan inngai ngai lo a, chuvangin hetiang sual hi a tam niin a lang. PATHIAN I HNAIH BER PHAWT MAI TEH ANG U.