Tun tum chu thil tul em em si, tam tak chhiar peih loh; mahse, Mizoin kan mamawh tlat si hi ka’n chhuah teh reng reng ang. Mizo kan Mizo-na bul a ni tih hriain chhiar la, a tul a nih chuan zawm hram ang che. Aizawl Post-ah Hruaia Kawlniin, ‘KAN HMING SAK DAN BAWK’ tih a rawn chhuah kha kei chuan full mark ka pe. Mizo hian hming sak kan duhtuia kan uluk tehlul nen khawilam lam hnam dang hming emaw kan belh chawp a, a nih loh leh mipa leh hmeichhia a nih tih pawh hriat lek lohin V.L.Hnamte, J.K.Poonte, R.T.Hanner tih ang reng te kan kat ta nuk mai! Kan lai-ah hming hi pi pute’n an uluk em em a, uluk takin chhan neiin an sa a, hmanlai kha chuan chhuan nei loa hming sak a awm âwm lo e. Khristian kan han ni a, Pathian/Lalpa hming lampang telin kan sa leh a, Vanlalkunga, Lalmalsawmi, Lalbiakchhunga ti te leh thlahtute thil tihthat chawiin, Khawlhmingthanga, Laimani ti tein kan sa thin kha a ni a, chu kan hming awmze neia min saksak chu eng kan ti lawi emaw ni hnam dang hming belha Jenny, John, Elizabeth, David tih ang reng kan hmang thliah thluah ta mai a, kan laiah hming aiah kan han tilar leh ta dahrual a! Bakthak-ho khu, Shillong khawpuia awmte khu an ler veng ni maw, an hming khan lal hming sakna a han dal lo nasa khawp a - Dr. Khawmzoa (Pastor Haudala fapa) khan a sawi thin. "Pa pakhat chu 'Bah Ista' tiin an ko a, ka zawt chiang a, Bah Railway Station-a a lo ni a," a ti! 1943-a ka thiante chu Wellington-a leh Benedicktion-a zuk ni a! Keini Mizo ngei pawh hian mahni Mizo laiah hming paihin Jerry-a te, Beck-i te, Jane-i te, Linda-i te (hmeichhe hming ni se a-in a tawp si, Linda-i tih a tul mauh hi) te kan ni ta nuk mai a. Rual u-te kha chuan Bible an lehlin pawhin Bathseba chu Bethsebi, Mary chu Mari, Ruth chu Ruthi tiin a hmang Mizo hmiah zel mai a nih hi. He hnam dang hming tunlaia kan hman lar tak riau mai hi thangthat hian tihluihna hial hmanga an tihreh a tulin ka hria. Mahni HNAM zahpui mihring chu mi tlaktlai vak chu an ni lo mai thei a ni. Thalaite u, hnam dang hming ka hman hian ka Mizona a bo chuang lo in ti mai palh ang e, tun su su-ah bo rih lo mah se, tu, tuchhuan i neih hunah meuh chuan kan Mizona hi lang tur a vang hle tawh ang a, “Nang Mizo i ni em?” kan intih chawt chawt a ngai tawh ang. Roman Catholic hian an Khristian hming atan mi thianghlim hming an lai-ah hmingah an belh thin, chu chuan a laiah hming a lan tihna a ni lo. J.Lalsangzuala te, A.Thanglura te pawhin mi thianghlim hming invuah chu an ni ngei tak a; mahse, an boral thlengin an lai-ah hming an tluan zak a ni. A tua mahin U Sangzuala chu John a ni tih pawh kan hriat hlawm loh kha. Chuti ang bawkin Lura kha Aloysius tih hming a nei a ni tih pawh kan hriat hlawm loh bawk kha. K'u Chunga (Ch.Chhunga, Ex-CM) phei kha chuan a hming lamtawiah tak ngail pawh a dah eih lo, a baptisma hming chu Lawrence chu a ni ngei mai. L.Ch.Chhunga te pawh a tih miah loh kha, Roman Catholic-ah pawh la rinthlak chi tak phei chu a ni; mahse, a laiah hmingin a ni a lar ni. Thangtharte u, (ka’n inti-upa ve vel deuh a nih hi!) hnam dang hming in hman lar zawk zel chuan kum 100 a ral meuh chuan Mizo (Duhlian tawng hmang, Paihte, Ralte, Lakher leh Mizo chibing hrang hrang) mahni hnam hming hmang lo deuh hlir kan nih tawh a hlauhawm tak zet a ni tih hi ngun lehzualin ngaihtuah teh u. Tuna hmang in nih pawhin thai bo (tihlar loh zawk) tum ula, in rin aiin Mizo hming hian Mizona a tilang nasa tih hria ula, a tha ngawt ang. Tuna ISL khelh mekah pawh hian JEJE tih ai chuan DIDIKA tih hian Mizo a tilar tihte hi i ngaihtuahin MIZO HMING ngei hi hmang rawh u. MIZO KAN NI SI A, MIZO HMING I HMANG ANG U. Thu dang - a zangkhai lam leh nuihzatthlak lam aw - Tunlai hian khawii chanchinbu buah emaw Ukil-te hi dawt sawi hmang an ni reng em? tih lampang a chhuak nual a nih hi - Readers' Digest - Laughter the best medicine tiha Ukil thu an chhuah ka'n sawi ang e:- Petera leh Setana hian Vanram leh hremhmun kar kawng a hnim lutuk tawh avangin repair hnatlang neih an rel a, “Naktukah a pachhuakin thawk ila,” an ti a ni awm e. A tuk a lo thleng a, Vanram lam an kim thap a, hremhmun lam pakhat mah an kal lo a. Patera thinrim chuan Setana hnenah, “Pathian court-ah ka khing ang che,” a ti rawk mai a. Setana chuan, “Ukil i nei ve dawn em ni?” tiin a lo chhang hmak mai an ti. Chu lo pawh - Pa pakhat hi vanram a kai thar ve a, lunghlu kawngkhar a lo thlen chuan Petera’n pangpar thi a lo awrhtir hmak mai a. Vanram lama lo awmsaho chu a pakhata mahin pangpar thin an la hlawh ngai loh avangin vui thu Petera hnenah an thlen a. Petera chuan, “Bengchheng suh u, ani chiah hi Vanrama Ukil kan neihchhun a nih avang hian alawm par thi kan awrhtir,” a ti nia! Vanramah hian thutna a inang lo nuk mai a, an Pathian thuawih that dan angin an thutna a indup hleih nuk mai a, class hniam ber phei chu chhuat charah an thu tawp mai a ni. Pa pakhat thutthlengsei thut chhan dup chang hian a hmaa thutthleng dup chang pha lo tlarah chuan an Father, sual a puanna thin thu hi a hmu a, mak a ti lutuk chuan, “Father, engti zia nge ni ngai, kei tehlulin nang aia thutna class sang zawk ka chan tlat mai?” a’n ti a. Father chuan, “Zawite-in tawng rawh, kan hma chhuata khu kan Bishop pawh a thutsawp nulh khu,” tiin zuk chhang a.