BVT (Bethlehem Vengthlang)-a ka luh thlak hi kum 1969 a ni. Bawrhsapin ram, 1949/50 khan min pe a, chutah chuan 1969 March vel atang khan kan khawsa ta a ni. Ka awm tantirh chuan tuna ka awmna mual, Rimawi Veng kan tih tâkah hian in pakhat tê pawh a awm lo. At kan so a ni ber awm e. Mahse, ka ram chu loah ka vat a, buh K.Oil tin 120 lai kan thar asin! Hei kum 48 vel hnuah chuan in 100 dawn lai kan ni tawh ta ve ang. Tunah pawh sawrkharin kan kawtah motor kawng a buaipui a, veng kel til rau rauah motor-in ka chhuakin ka lut thei dawn, ka va lawm em! BVT (Bethlehem Vengthlang)-a ka luh thlak hi kum 1969 a ni. Bawrhsapin ram, 1949/50 khan min pe a, chutah chuan 1969 March vel atang khan kan khawsa ta a ni. Ka awm tantirh chuan tuna ka awmna mual, Rimawi Veng kan tih tâkah hian in pakhat tê pawh a awm lo. At kan so a ni ber awm e. Mahse, ka ram chu loah ka vat a, buh K.Oil tin 120 lai kan thar asin! Hei kum 48 vel hnuah chuan in 100 dawn lai kan ni tawh ta ve ang. Tunah pawh sawrkharin kan kawtah motor kawng a buaipui a, veng kel til rau rauah motor-in ka chhuakin ka lut thei dawn, ka va lawm em! Tichuan, ka awm tak vang ni maw, a kum telin kan pung hret hret a. Kum 1974-ah phei chuan kan hlim tham ve tawh deuh a niang, kan kawmchhakpa, Biakzaua (RIP) police hnathawk nen kan inkawp nasa hle mai a, chumi kum Khrismas leh Kumthar chuan nuam kan ti filawr deuh ni ngei tur niin ka hre ta hnuhnawh - kum thar tlaivar zan chuan kan nam ang phelh phawlh a. BZa chuan an petrol drum a rawn lir thla a, kan kawt zawlah tual mei kan chhem a, kan ai a, kan zai a, zu kan in reng bawk a. Chutih pah chuan a petrol barrel chu kan vaw bur bur mai a, tu dang mah kan ngai hlei lo a, tu pawi mah sawiin kan inhre bawk lo. He Bethlehem Vengthlang hi Maite leh Chhawrtui ral tlan awmna tura sawrkhar ruahman a ni. Thahnem tak chuan in an rawn sain an lo cheng reng a ni, tun thleng hian an permanent resident a ni ve ta tho mai. Keini pahnih chuan le, tu zaikhawm mah ngaihsak lo chuan kan duh dan danin kan zai a, kan khuang (petrol barrel) chu kan vaw nghek nghek zankhua mai a. Khawvar meuh chuan kan khuang ve chu kan vaw chhe hneh ngei mai, a per phek vek mai nia.   Chutih avang chuan ka thianpa, Biakzaua chuan, “RIMAWI VENG kan nih hi,” a’n ti leh ta nghal a. A tuk pawh chuan kan la ruih phuang avangin kan la hawk kan la hawk mai. Tichuan, kan veng bik chuan veng hming mumal tak nei lo chuan kan khawsa ta a. A kum ka hre ta chiah lo, veng upaten paho inkhawm an ko a, chutah chuan Veng hming phuah an rawt a. A thenin Mual Veng, Veng Mawi tih te, a thenin Rimawi Veng tihte an/kan rawt a, kan ri nak nak mai a. Duh dan neite kha kan inzat deuhin an hria a ni ang chu, banpharin vote kan la ta ringawt mai a, Mual Veng leh Rimawi Veng vote chu a inzat ta chiah mai a, kan chhiar nak nak lai chuan thenawmpa pakhat - Lalsâwia (RIP) phar ve loin a lo va zung chu niin. A lo kir chuan an han hrilh a, sam khai deuh hian, “Rimawi Veng a ni mai alawm,” a rawn ti a; tichuan, vote khatin Rimawi Veng lama tang chu an chak ta a, chumi zan atang chuan RIMAWI VENG tih chu a nghet ta a ni. Nuam angreng tak asin!   Ka sawi hun hi kum 40 kal ta lam thil a nih chu. Chutih lai chuan in in deuh vek a ni a, gas thuk, PHE tui te a awm lo, kan chawi a, thing pawh kan inphurh chawp a, kan khu ve ra ra thin nia. Ram hmasawnna tur hian duhtawk chu a awm thei lo; mahse, chunglai hun nen chuan ka han teu hian tunah chuan kan kawtah kawng chu sawrkharin kan Chief Minister, Pu Lal Thanhawla min khawngaihna azarah hei, PWD-in kan motor kawng laihchawp chu motorable raod turin a buaipui a, SIPMIU lahin tuichhe paihna tur (?) an peih ta diam a, tunah te hian road roller-in an thum vut vut mai, kumin hian pucca motorable road kan neih hman ngei ka ring. PHE tui lakna te kan sawn thla sup sup mai. A lamlian hmingah lah chuan ‘Chhuanliana Road’ te an ti emaw ni hlawm ni. Chhuanliana Road Committee te an awm nia! Zahthlakin. Mahse, pahoin phur em emin an buaipui a, tunlai sanah veng (motor kawngkam) lungrual tak niin ka hria. PWD lam an che that phawt chuan kawng tha tak kan nei ngei dawnin a lang. Kan luh thlak hlim (1969) te nena han khaikhin chuan tute emaw dan takah, ‘Lei leh Van’ ang mai a ni ta!