Tum hnih tlawng KA HUANG ka chhuah lo a, thatchhiat leh kum tam lam a nih vang a ni ber. Thatchhiat naka laiin upar lam phei chuan a zual duh khawp a lo nih dawn hi. Engle khawle, ka tum dan chuan kum 90 thleng tal chuan chhuah ila ka ti. 10-3-2019 thleng tal chuan. Pathian thu thu le.

Khawi khawii-ah emaw chhuahin sawi tawh mah ila, kan pi-puten Chawlhni kar ni hming an phuah dan hi ka’n nawn teh ang. Hei hi Mizo & Vai Chanchin Bu 1934 vela chhuah ka chhiar a ni.

Mizo hian ni hming hi kan nei lo a, Nimin, Vawiin, Naktuk, Naktip, Nakthai, Nakkun, Nakdak tiin ni 7 lai sawina chu kan nei ve awm e. Zosap an lo kal takah chuan hapta kar hming an phuah ta a. Zosap ina thukhawmin an phuah ta a ni. Sunday atangin an bei tan a, Pathianni tih an duh em em a; mahse, ‘LALPA i PATHIAN hming a naranin sawi suh’ tih vang khan hapta kar nia an hman chuan a naran ang tih an hlau a, a thenin vai tawng Robibar tih an rawt a, Chawlhni tih ngawt lah chu, Pathian biak ni bera Chawlhni han tih teh tlawng chu hoin an hre si, an sawi rem thei lo a, Chaw fak khama sawi thatah an dah ta a. Sunday atang chuan… Thawhtanni, Thawhlehni, Nilaini, Ningani, Zirtawpni, Inrinni tih chu lungrual takin inhnialna awm lem loin an tifel ta mai niin an sawi.

Thawhtanni: Sunday atangin kan thawk tan a
Thawhlehni: Kan thawk leh a
Nilaini: Ni 3 leh ni 3 karah a laiah a tla
Ningani: Sunday atanga ni 5 ni
Zirtawpni: Kar khat chhunga sikul zir tawp ni
Inrinni: Sunday tana inrinna ni

Chaw fak kham chuan an thukhawm leh ta a, Sunday tih Mizo tawng siam tur chuan. An han tan phat kha Robibar tih rawttu kha, titau deuh hian, “Rawt tur in hre si lo a, ka rawt ve, vaiho neih sa Robibar i ti ve mai ang u ka tih leh in uksak si lo a, in duh leh CHUKCHU te pawh ti mai rawh u,” a ti a ni awm e. Zosap chuan, “Nang kha, i kawr pawh a bal hle a ni, inah hawng la, luiah zuk su la, inbual rawh,” tiin a tir hawng ta a ni. An Pathian thu awih dan kha a la kulmuk si, duh hle mah se ‘Pathian’ tih chawlhni kar hminga dah chuan a naran dawnin an hre bawk si, Pathian biak ni bera Chawlhni han tih teh tlawng kha ho/naran an ti bawk si ni awm a ni. He thu ka ngaihtuah chang hian ‘Chawlhni serh rawh’ tihte kha kei ang rual ngiang pawh hian tet laite khan serh tak tein kan serh a lo ni. Mel 5 aia thui kal chu zin, Sunday-a khaw danga kal chuan lehlan ngei ngei, lehlan loh chuan PHUAR. Tichuan, a tawpa tawpah CHAWLHNI tiin an vuah ta nge nge a ni.

Tunah chuan Chawlhni e, ni lo e, dawrte pawh an hawng uar lo a, luhchilh chuan a lei theih vek tawh mai a nih hi!