Kum dang aia thla khata hmain union budget pharh a ni a, Mizoram budget pawh hi engtikah nge pharh a nih dawn hriat la ni lo mahse finance department lam hian an buaipui tan tawhin a rinawm a, budget chungchangah hian tawngkam hnih khat leh han rawlh ve leh ta ila. Nikum khan March 17-ah Mizoram budget pharh a ni a, kan la hre hlawm anga kha budget kha finance minister hian a chhuang hle a, “Budget tak tak Mizoramin kan neih hmasak ber” a ti hial a nih kha. A chhan nia a sawi chu - “A vawi khat nan kan sum hmuh leh hman dan tur chungchangah zalenna pumhlum deuh thaw kan nei ta a, kan sumhmuh tur zatte fel taka bithliah a nih tak avang hian a hmanna tur lam pawh kan duh angin fel takin kan bithliah thei ta a ni,” a ti. Sorkar laipui, Pu Modi-a sorkar hian kalphung an thlak danglam nasa hle a. Sorkar laipui atanga state hrang hrangten sum an hmuh dan pawh tunhma ang kha a ni tawh lo a, hmuh tur a chiang sa kuar tawh a ni. Finance Commission sawmpalina khan kum nga chhunga kan state (state zawng zawngte) sum hmuh tur, kum tina an dawn tur a bithliah fel vek a, tunhma angin annual plan siam a, planning commission-a zuk dil buai kha a ngai tawh lo bawk a. State sum hmuh tur chiang sa atang hian hmasawnna lam hawia hman tur leh inrelbawlna lama hman tur chin ruahman lawk mai tur a ni. Chumai a ni lo a, sorkar laipui budget kalphung anga plan leh non-plan sum thenhran a ni tawh loh phei chuan sum hman dan leh ruahmanna lamah pawh a felfai zawk dawn a ni. Chuvangin, budget tha tak, kan economy mil tawk nei thei dinhmunah kan ding tihna a nih chu. Nikum budget-ah (tuna kal lai mek) khan hmalakna tur thil thar tarlan zinga langsar tak Lok Ayukta chungchang hi a tak taka hmalakna hmuh tur a la awm lo a, Mizoram Lok Ayukta dinna atan hian tun pawisa kum kal laiah hian Cheng nuai 159.34 dah a ni nghe nghe. Tunlaia kan buaina hrang hrang sorkar sum hman dan felhlel deuh leh eirukna hrang hrangte hi Lok Ayukta kan neih hma chuan chinfel lohin a zuzi zel dawnin a lang. Chuvangin kum khat chhunga hmalakna tura ruahman hi chu tizuzi loin a taka thawh zel ni ta se, chu chu sorkar chak leh rintlak tehna tur pawh a ni. Ram hmasawnna kipui pawimawh tak chu Credit Deposit Ratio (CDR) hi a ni a, chu chu bank-ten loan an pek chhuah dan hi a ni. Kan ramah hian bank hrang hrang a tam hle tawh a, tunhnai kum sawm chhung ringawt pawh hian Aizawlah bank engemaw zat an rawn inbun thar a. Heng bank hrang hrangte hian mipui, sorkar leh pawl hrang hrang pawisa an dawng khawm a, chungte chu an puk chhuahtir leh thin a. Bank-in loan a pek chhuah tam hian hma thar lakna a tam tihna a ni a, eizawnna a pung tihna a ni bawk. India hmarchhak bialah hian CDR hi a hniam hle a, chumi awmzia chu bank (scheduled commercial bank) te hian an pawisa hmuhte hi mipui hnenah loan pek nan an hmang tlem tihna a ni a. RBI hian loan an pek chhuah tur zat hi a bituk sak chiah loh avangin bank hian helai biala an sum hmuhte hi hmun danga a luang chhuak nasa tihna a ni. Kum 2014 March thla a Mizoram a CDR chu 37.85 % chauh a ni. Bank-ten kan rama pawisa an hmuh zawng zawng atanga 38% chauh Mizorama loan pek nan an hmang tihna a ni a, a bak hi hmun dangah an sem kual a ni. Kan rama sum an hmuhte hi hmun dangah a luang chhuak nasa hle tihna a ni a, kan ram hmasawnna atan an thawh tlem hle tihna a ni. Hei hi sorkar hmalakna tur pawimawh tak a ni a, budget tharah pawh hian hmalakna tur lo lang thei se a duhawm khawp ang. Company-ten mipuite tana tangkai tura sum an hman tam lehzual dan tur ‘Corporate social responsibility (CSR)’ te pawh hi sorkar tan chuan ngaihtuah a hun viau bawk. State pachhia keini ang tan hi chuan sum hai luhna tur hi a vang thin a, sorkar lu tihaitu pawh a ni thin. Tun hnai chhoah mipui nawlpui tawrhna thlen zawnga chhiah leh thil dang (tax & non-tax revenue) tihpun a ni thin a, mi harsa zual tan phurrit a tling thin. Sorkar laipuiin chhiah lak dan thar GST a taka a hmang dawn hnai a, chumi atan chuan state sorkar pawh an inpuahchah tan mek a. Tun dinhmunah hi chuan bungrua (goods/commodities) a chhiahte hi sorkar sum hnar a ni ber a, GST hman a nih hunah chuan sumdawnna peng dang atanga lak (service taxes) theih tam takah lak a ni lo rih a, private damdawi in te, restaurant te, law firm te, private institution te, etc., atanga chhiah lak pawh a tam tham tawhin a rinawm. Engpawh nise, chhiah lak dan chungchangah hian kalphung (policy) mumal tak neih a hun ta khawp mai, mi rethei zawkte nghawng na lo zawnga lak te, chhiah petu tana buaithlak lo zawnga khawn te, hlawk zawka lak dan te leh thil dang dangte hi a zir chiangtu tur din a, kalphung mumal zawk neih a tha hle a ni. Vai ramah mipuiin budget an ngaihven chhan chu chhiah chungchang hi a ni ber a, keiniah chuan chhiah tihdanglamte hi budget-ah ber hian a lang ngai lem lo thung. Mizoram sorkar hian kum 2011 atang khan NLUP nasa takin a kalpui a, kan ram dinhmun sawi danglam dawrh tura ngaih a ni na a kum 5 a ral hnuah hian eng nge min thlen tih chu kan hre tlang awm e. NLUP kha mi rethei bakberhte thleng tura duan a ni a, eizawnna nghet leh hlawk an neih theihna tura ruahman a ni bawk. Kum khat hawp khawp ngawr ngawr thar chhuakte leh hlawh chhuak te, eizawnna nghet nei lote (Subsistence sector) chawikanna tur a nih avangin beiseina pawh a sang viau a, ram hruaituten an sawi nasa thin bawk a, a hlawhtlin loh pawh a rinawm loh a nih kha. Chumi hnuah nikum khan sorkarin NLUP dawta hmalakna thar NEDP a kalpui leh ta a. A nihna takah chuan NLUP kha kum 5 chhung atana ruahman a ni a, a hun a liam dawn avangin hmalakna lian tham sorkarin neih a duh vanga NEDP hi buatsaih ta an ni. Sawi tawh angin NLUP kha chu rethei, eizawnna hlawk tham nei loten eizawnna nghet an neih theihna tur a ni a, an tum angin hlawhtling lo mah se mi rethei zawkte khaichhuahna tur bawk project siam leh kha a rem chiah tawh lo a. NLUP hlawhtling tawk lo chungin eizawnna nghet nei leh loneihna lama hlawhtling tan mekte tangkaipui tura hmalakna (NEDP) hi duan a ni ta a ni. Kumin budget-ah pawh hian NEDP hi a langsar viauin a rinawm. Inthlan leh hun (2018?) a party auhla tur a nih hmel bawk a, pawisa kum tharah hi chuan nasa zawka kalpui ngei an tum dawn a ni. Mahse, NEDP hi a duangtute beisei angin kalpui a ni lo tih erawh a lang chiang. Tuna a lan danah hi chuan ministry hian an ngaih pawimawh zawng atana (NEDP pawisa hi) hman theihah an ngai ni berin a lang a, department hrang hranga official-te pawh hian NEDP hi an zir chiang tawk lo nge an hmang tangkai tawk loin a lang bawk. Sum hmanna langsar zingah kawng laihna te, Vanapa Hall cheina te, electric power chei thatna te a tel nawk hlawm. Ministry hian an chiang tawk lo deuh a ni maithei zirchianna pawh an nei ngun ta khawp mai. Engpawh nise, NEDP hian retheite khai chhuahna tur aiin hmasawnna chak zawka kalpui a tum a ni a, NLUP dawt chiah kailawn a ni. NLUP a lo hlawhtling tawk lo hi NEDP hlawhtlin lohna tur chhan a ni thei dawn tihna a nih chu. Mizoramah hian mi rethei ber berte hnena sum sem zawnga hmalakna hi sorkar kal tawhten an ching khawp mai a. Mahse, mi harsa zawkte kuta sum lut hi a liam leh nghal zel lo thei thin lo. Chu chu politician-te pawh hian an hre chiang a, ‘sem policy’ hi hralh a kal em avangin an zuar leh thin. Chutihlaiin, tlema khawsa thei zawkte kutah pawh hian sum hi a tang rei thei tak tak lo a, kan rama sum lo luang lutte hi rei lo teah a luang chhuak leh vek zel a nih hi. Chuvangin, sum luang chhuak tur ven hi thil pawimawh tak a ni a, thil eng eng emawah hian intodelhna kan neih a ngai a, keimahni a sum leng va a tam theihna turin eizawnna (employment) siam chhuah tam a pawimawh bawk. Sorkar hna mai ni lo thil danga eizawnna peng thar siam belh theitu sorkar hi thalaiten an mamawh tak zet a ni. Budget tharah hian chutiang chu beisei leh phawt ang u.