Nowgong Special Jail-a kan buk chanve chu a far nasa em em mai a, ruah a sur hlek chuan puanthuah kan tel a, a far ve lo bulah kan tlan nak nak zel mai. Special Jail tih takah Silchar jail te ai chuan changkang tak a ni. Jail warder-te leh jail staff reng reng kha an fel viauin ka hria. Chaw leh chawhmeh pawh Silchar jail lakah chuan Vanram a ni hawt mai. Silchar atang khan, kawl (hand-cuff)-in min daih si lo a, mi pahnih zelin kawl pakhat kan bun a, pakhat vei lam, pakhat ding lam. Dailen a chhuah pawhin kan kal dun mai a, ka kawl bunpui khan min lo nghak zel mai. A chabi an dahkhawm vek avangin, a mil zawn chhuah chhunga ek cheh a hlauhawm.
Nowgong Special Jail chu jail rau rauah nuam tak a nia, jail staff-te pawhin mihring biakin min bia, an Superintendent kha Mr. Payne an tiin ka hre ta. Jail Jemadar chu thaupui, hmuihmul ki burh mai hi a ni a, vin min ti a ni chek ang, SAKEI min ti! Tui a tha em em a, inbual mai theihna, pawnah hmun thum hmun liah a awm a, khua a lum bawk a, a lun hle reng mai a ni. Kan bukah chuan a tûktâk loho kan awm a, Sampujoya, vai kawr-uk ha tawh chu hlau em em zel mai te (an vuak nasat avangin), Thianghlima, mi anglo, tawng duh reng reng lo, hmaltha deuh, a tin hi a kheuh reng mai a, hleh a ngai miah lo. Thianghlima a nih pawh kan hre hlawm lo a, Saitual khua, pafa an awm ve hlauh a, chuta tanga kan hriat chu a ni. A mantute pawhin ‘Mad man’ tiin an ziak tawp mai. Chu Thianghlima leh Sampujoya chu kan bukah, Mawi-harha te nen kan awm tlang a, tlangvalhote nen kan bualin kan tifai thin. Kan tan chhungin vawi khat chiah ka be tawng, “Thianghlim, eng i ti nge nia i at em em?” ka tia, a bek kawk nawk nawk pahin, “Helai hi alawm,” tiin min chhang. Tum khat a riltam em em vangin a hrawk a khawih nawk nawk a, chaw khawrh lai a hmuh avangin, “Hrawka, i ei em em ang,” a ti hluk bawk. La dam tak maw?

Kan buk far chu Tarpaulin-a khuh turin kan dil a, an ngaihsak lo vei a, chaw ngheiin kan strike ta a, Addl. DC (Mizo) a lo kal a, an rawn khuh vat mai. Chuta tang chuan lungmuangin kan mu ve ta.

Kan nu Shillong-a a lo chhukin parole a rawn dil a, ni 30 parole min pe a, Shillong-ah ka han chho a, Chief Secretary, N.K.Kidwai (?) ka hmu a, kan nu hnenah, “Ka vin chuan min sik mai rawh,” ka tia, min sik zauh zauh. Ka tan chhan chu kan cash box-a pawisa zawng zawng MNF-in an la a, Cashier hnena Receipt pek thlap, Aizawla kan hmuhho ngei kha, a hmu ve ngeituin min hek vanga tang ka ni tih min hrilhtu, kan chhungte, hna pawimawh tak thawkin mi hrilh chuan thin a za zak mai. Chuti chung chuan pawisa ru chhuaktuah, hre reng chunga min puh vanga tang ta ka lo ni tih hriat tirh chuan VELH a chakawm.
Ka hriat tirh chuan phuba lak ka tum nasa mai a, thahruia ka ne pawh ek lo tih ka hre reng mai a. Mihring kan ni ve bawk a, mahni tih hlek loh mai ni loin, min hektu ngei pawhin ka tih a ni lo tih hre chiang em em, MNF, a latute ngeiin kan Cashier an chhuhsak a ni tih lehkha pawh chhiar ngeiin Office cash rua min puh tang ngat mai chu thin ahi a rim vu tuk mai a ni.
Jail-a ka tan mai hi ka tuar a ni lo a, promotion zawng zawngah min tikhawtlai zo vek a, ka nupui fanau thlabarin a siam a. Kha office pawisa kha MNF-in an lak a nih hre loa min rinhlelh vanga min hek ni se, eng pawh a ni. A hre chiang em em a, chu recipt chu kan chhiarho vek ngei sia, min hek chhan hi puh tur dang a awm miah lo. JAIL-AH TANG SE min ti a ni ringawt mai a ni.
Mahse, “Phuba reng reng keiman,” titu Pathianin PHUBA chu a la ta a ni ber ang chu… a thihna a rei tawh em mai. Hei kei chu Pathian khawngaihna azarah kum 90 pumhlum turin ni 13 chauh ka bak ta. Pathian khawngaihna ka dawng thung a nih hi.