Kumin Chapchar Kut hian Lammual zawlah 'Mi zawn inchuh' an entir dawn emaw ni, hmanlai Kumin Chapchar Kut hian Lammual zawlah 'Mi zawn inchuh' an entir dawn emaw ni, hmanlai a la ni lo emaw ka tih chhungin 'mi zawn inchuh' hmu pha lo chu sawi loh hre vak lo, kum 60 chuang chuang an/kan lo awm hman der tawh mai! Mi zawn inchuh lo chhuahna chhan ber nia ka rin chu 'TLAWMNGAIHNA' vang a ni ber ang. Inchuh dan hi tih dan hrang hrang a awm. Khawi maw laiah chuan hlang an tah tha sauh sauha, an inbuan vak thin. Aizawla kan tih ve dan chu kan va chuh tura te ramri chhung pel rawka zawn tlang a ni ber awm e. Aizawl chhungah rau rau chuan Aizawl North (Zarkawt, Chanmari, Dawrpui, Babu tlang vel) leh Aizawl South (Mission Veng (Republic Avenue a la piang lo.)Dawrkai, Dam Veng, Venghnuai, Thakthing, Kulikawn, Tlangnuam). Chuti ang deuh chuan kan inthen. Kum 1950 (?) tawp lam khan Lungleng khua, Navy bang U Rina, Durtlang Hospitalah a boral hlauh maia. Chawlhni ka tlai leng tur, ka pheikhawk BSC thar hlak Rs. 26/- man ka bun chhuaka, Sikulkawn ka thlen hmain, VL Roa Durtlang atang lo chhukin , a thih thu chu min hrilh a, Dawrpui lam panin kan tlan nghal a, ruang chu Zarkawtah ka va nang a. Dawrpui tlangval hlir an ni a, ka bet ve mai mai a. Civil Hosptl. hnuai vel atang chuan kan veng lam an lo awm ve ta deuh a, nawr kir ka-n rawt a. Dawrpui Bungkawn atanga Assam Rifles Canteen thleng sawn pen miah loin ka tawlh char char mai. Ka pheikhawk thar hlak pawh sole a kau vek. Canteen kawtah chuan kan thathnem tawh avangin, Dawrpui tlangval khawih kan phal ta lo a. Sapthlenga (Rinthanga) te an lo thleng ta bawk a. "Hmangaih, Aizawl North lam chuan thlah tawh se ti raw," a rawn ti a. Chutah chuan thlah mai an duh loh avangin, kan ding deuh laih a. "Hlangin hei bak hma a sawn tawh lo, Dawrpui tlangval khan thlah tawh rawh u le" kan ti ta bur mai a. Kan tam hneh tawh em avangin A/R Canteen kawt bak chu an khawih ta bik lo. Aizawl South tlangval chu kan pung ve nial zela. Hlimenah zualko kan tir a, kan zawn ta zel a, Kan Val upa chu Kulikawn, U Hminga a ni. Mel thum kan pel a, Hlimen dam deuh laiah sawn kan in tawk ta a. An val upa chu U Rokunga (Welsh Mission Press a thawk, Rozinga pa a ni. Hlimen lam ai chuan kan thahnem deuh awm e. Kan intawh phat atangin kan inchuh nghal a, inchuh tih lemah miruang hlang kha kan inchuh tihna a ni ber. Keini lamin kan chelh tlat a, Hlimen lamin min chhuhsak an tum tihna a nih chu. Hlang chang lam kan nih avangin a zawn ve lo khan hma kan hruaia, min rawn tawn apiang kha theh thlak kan tum a, kan thiam leh kan theih ang angin kan inchai mai a ni. Kei chu le, Hlimen pathlawi (?) puan veng hian min rek thut a, kawng ko ah tan lak theih hlek lohna ah hian min rek bet tlat mai a, tlangnuam tlei-rawlin min rawn hmu a, min rawn chhana, ka'n rek phei ve thung a a petek ve nasa mai. Kan Veng Pu Zuia leh Hlimen tlangval, an chhungte, Challiana pawh chu an lo inrek ve niin, hlimen ho pel rawka kan in reh takah chuan kan va innuih mai mai a. Chutah a lailiah kan zuang lut leh a, kawng thlangah, mahni theih dan danin kan inchai chu kan intheh thla nawk nawk mai a, chak zawk bawhbeh chang te pawh kan nei ta ve ang, mahni hma hma a mi kha kan tum a ni mai si a. Chutah Hlimen Val upa U Rokunga chuan "Kan ngam lo che u a ni e, hlang hi min hlan tha tawh rawh ule," a rawn tia. Chu veleh kan Val upa, U Hminga chuan kan mawng lam atanga rawn nawrin "A tawk tawh e, hlang chu pe tawh rawh u," ti chungin bei zel turin min nawr ru bawk si, kan phur si, kan nuai nasa ve mai maw le. U Rokunga'n min ngen nasat avang chuan kan hlang chu kan hlan ta a, kan kir leh ta a ni. Khawhar ina riak reng mai, mahni ina khum pawh nei lo ka ni a, ka riahna in ka thleng fel chauh tih chuan "Mi zawn a lo let e, tlangval zawng zawng lo chhuak ru" tih chuan min nawr tho a, ammunition boot ka bun a, ka chhuak leh ta a. Tamtak kan ni. Ni danga mizawn/thlanlaiha ka la hmuh ngai loh te pawh an teng nasa mai! Hlimen thlen dawnah Tlangnuam val upa Zakapan roa rel a, Chhuanlianan hmahruaiin fung a thlah miah tur a ni lo a tia, mahse Hlimen tlangval pakhat mah an lo chhuah si loh avangin an khawlaiah kan zawn tlang chho ta a, tlangval hawklak khan tlang lama serthlum, a hmawr hmin deuh tawh kha an rawn sawi thla teh reng a, ka pen apiang hian serthlum rah 3/4 hian ka ke a rawb deng hman. Tin, kung 4/5 lai an sawi phawng lehnghal a lo ni. Hlimen khua kan zawn tlanga, Lungleng tlangval an lo chho a, ruang chu kan hlan ta. Kan kir leh lam chuan Kulikawn kan thlenin khua a var. Tlangval hawklak lai chuan mi zawn inchuh chu a nuam, mahse chaklo lam nih chu a nuam lo ang. Nula rimnaa han sawi leh vel tur a vang ang!