Ka Huang’ hnuhnung ber (keima chhuah bik)-ah khan Aizawl khaw hlui awm dan ziakin Zarkawt ka rawn thleng tawh a. Tunah hei ka han chhunzawm leh lawk dawn a nih hi. Kan Diamond Jubilee leh kum hlui leh a tharin min tisukuk deuh a ni. Hmanlai Dawrpui kan tih ber chu Mosolman-ho Mosque leh Dawrpui Biak in inkar hi a ni deuh mai. Saron Veng khi Mirawng veng tih a ni. Mirawng-ho (Kabui Naga), khawlai phiat leh mi lianho ek paih an ni ber. Mizohoin kan thawk duh lo a ni awm e. Chuvangin, Mirawng an chah chhuak a ni an ti. LAWKS- Upa chuan hnam dang kan rama khawsa tura lo awm reng reng kha CHHUAK zuk ti vek a, tunlai hian LUT an ti ta vek a. Kan leipuiah bawng a lut a, sanghal erawh a chhuak thung. Midum (Santhal) Dumka jilah atanga chah chhuah an awm bawk. Anniho kha chuan kawng siam hna a ni ber mai. Tunlai midum hi chu an ngo ta riauin ka hria. Hmanlai midum kha chu dum tak an ni. Durga Puja hian an lâm thin, pawisa khawnin. Hren fual delh dawlh leh kamit var em em mai, a kawr awma wool la sen, hring, dumpawl kutphah pawh chen lo an han kilh par chhak mai a. 20/30 rual vel an han lâm rual dial dial mai chu hmuhnawm tak a ni. Tu emaw berin midum tingtang hrui khat nei a nawt a, a thenin darbenthek, a thenin midum nihliap, mau kuang rual raih mai an keng a, an zai ri kan hriat dan chu: “Thlanga thlanga mau rua tam e, Kurung Kurung chukchu a lut zung zung, HHRRR,” an ti a, rual em emin an let siau siau thin. Babu tlang hnai zawk kan tih mai, tuna Zarkawt basketball khelhna thlen hma deuha Hindu temple atang khian an tan a, mi khawsa thei deuh tura an ngaih kawtah khan an lâm chawt mai a (an carol ve), mi pakhat lâm ve lo, dar thleng tle deuh, a chhunga buhfai tlem, leh pawisa tlem leh midum pangpar (Hibistus) pakhat emaw a keng a, chu chuan pawisa an pek chu a dawng thin. Ka rin danin Zarkawt - Pu R.Buchhawna leh Pu Sainghinga in vel atanga tanin an chhim kal thin ni awm tak a ni. Khanglai midum kan tih kha chu DUM tak an ni. Awmho ta ila kei hi chu NGO VAR tih ka ni ang! Chuti khawpa dumin long cloth puana thui, kamit leh hren (dhoti) pawl raih khawpa ngil dum an han ha chu an kawr na na na chu VAR TAKTE a ni ber mai. Chhim lamah an lo tawlh phei zel a, ni khatin a daih loh chuan a tukah an chhunzawm mai thin. Mission veng Zosapho an kim a (Pi Zaii ina lâm kha nuam an ti, Rs. 10/- te a pek thin avangin). Kan inah an lo chhuk a, Pastor Chhuahkhama inah Dawrkai Vengah Pu Bira kawrah, Pu Nghinga (Sudden Muang Laisaizawka pa) in kha an hmaih ngai lo. Pu Kaphnuna inah - Thakthing veng lamah. Pi Chali (Thakthing veng thlang) in chu tawp nan an hmang a, tinzu (rice beer) an in tawk a, an ruih sual deuh tum chuan khuang tein an inchhu awrh awrh mai thin. Khang hun lai kha chuan pawisa a hlu em em a, siki (25 paise), dere (12 paise) te kha an lâm hlawh tlangpui zu nia. Chhiartu duh tak, siki (25 paise) chu tunah chuan i sit viau mai thei a, mahse chutih hunlai chuan neih harsa tak a ni, kuhva khawr 128 a lei theih tih i hriat chuan a hlu hle ang tih a ngaihtuah theih mahna. Tunah a manna hmunah khawr khat Rs. 1/- a ni a, chutih hun laia siki (25 paise hu) leh tunlai Rs. 128/- a intluk vek a nih chu. Dawrpui veng sawi turin midum lam ka tlir tak nghek chu! Ka sawi ang khan Dawrpui tlar phei khi a ni mai. Hrangchhuana Pharm. atanga chhim lam in khi a awm lo. Mosolman mosque khi a hmasa ber a. Tuna Israel bus stand khi a tawpna a ni mai a - Pu Samthoa dawr nge Pa Ronghaka dawr zawk ka hre ta lo. Zion street kan tihah khian in hnih in thum a awm thla bawk a, a bak chu Sakawrpu lane a ni leh mai. Chung dawr tlar phei ep chuan a kar karah kaihkulh bang nei lo a awm phei thliah a. Thangruma Stationery dawr thlen hma deuha kaihkulh dawr chu fit 12/15 vela sei zela pn dan a ni a, mi pangngaiin, inthlak loin an luah. Ka hriatreng nachhan chu 1941 khan Police Thanaah U te tawiawmin naupang pathum kan riak thin a, Police Havilder (bel thum) Hrangchhunga zu ruiin kan sazu min mansak tumin min um a, kan haw ngam tawh si lo a, U Biakvela (Nawli pasal) dawrteah amah nen kan inhnawh zankhua mai. Kha Hrangchhunga kha em ni ang Kawlha, a nupui zat phel thelhin, “Hrangchhunga kha fimkhur rawh se, fing khatah pa lu ka hlah ngai lo ang,” a tih khum kha ka ti fo thin. An sawi hmangin Hrangchhunga (pulit) chuan Kawlha nupui tlan lai a rimsak thin a, “Min rimsak suh, ka nupui duhlai a nia, thinrim avanga tlan mek lai a ni,” a tih pawhin a rim lui thin an ti. Chuvang chuan Kawlha chuan a nupui tuichawi kal chu der lehlam tla hlawk lo deuh chauhin a sat a ni awm e. A tlan bo a, 1943/44 vel khan an man a, Syhlet jail-ah a zuk thi ta a nih kha. Chu Hrangchhunga chu tuna ka sawi Havilder hial kai ta chu em niang tiin ka suangtuah zawm mai mai a ni. Bungkawn (Dawrpui) atanga chhum lam kawng dungah sikulpui kawn thlengin mi mal (civilian) in a awm lo. Dawrpui chung lah, Jail, Thana, Civil Hospital leh Medical quarters chauh a ni. A sei lutuk dawn.