Hmeichhe naupang an pawngsual,’ ‘Bike an hal,’ Ruang an chhar,’ tih vel thu chhuah, chanchinbua tar lan hriat ai chuan, “Ni 3-2-2015 a Bank of India, Upper Republic, ATM Booth-a pawisa lak tumin pawisa a chhuah mai loh avanga a chhia emaw tia a kalsan tak, a hnua kal - Mob No. 9856569628-in a lak taka ZONET-a chu pawisa la ta lo a zawnna,” thu a rawn chhuahte kha chhuahte kha chhiar a ngaihnawm takmeuh a ni. A tha lo lam thu chhiar hi kan chhuah tam hle tak na a, thu rapthlak leh thu lungchhiatthlak a nih avang hian chhiar a hrehawm. A then phei hi chuan Mizo min tithangtlawmin hnam dang hriata zahpuiawm tak tak a ni lehnghal a, a chhuak zing bera chu a la ni ta dahrual si. Tun tum hi chu mi rinawm ka tih leh mi ngilnei ka tihte chanchin ka hriat chhun chhun ka rawn ziak ve pawp mai a ni. Sam 37-na pawhin, “He ramah hian awm la, rinawmna um zel rawh,” a tih kha maw. Kum tawp dawn lama motor cycle-a a ruala chuak vak thin, ‘Thunder Team’ an tih maite hi, motor cycle-a chuan nuam an tih avanga tlanho dur dur mai emawte ka lo ti thla ve rawk a; mahse, an kalnaa mi harsa zual an hmuh chhungkaw eng emaw zat hnena Rs. 7,000/- riha an sem tih thawm han chhiarte hian ngaihsanawm ka lo ti ve ngawih ngawih thin. Thawkkhat lai pawh khan kan kawmchhaka hmeithai pitar hnenah Vantirhkoh (ka ti mai a)-in Khrismas present-ah Rs. 3,000/- chuang leh arsa a rawn pe tawp mai a, khati angte kha a ropui tak meuh a ni. Sawi takah chuan S.L.Sailo Pharmacy neitupa - Sanglura Sailo te angte khi mi rethei khawngaihtu a ni. Kan kawmthlanga mi harsa ve tak bawkte chu damdawi chang pawh ni lo, thil engzat nge, tum engzat nge a pek tih pawh hriat loh khawpin an pe mai. Anni bakah veng dang dang nupa tuaka lo kala tawngtaina nena thil zuk pe ta pawh ka hre nual mai. Heti ang thil tha tiho chanchinte hi hriat a nuam. Hetia ka sawi takah chuan ka thil hriat chhiat hi - min hrilhtute nupa an boral tawh si, ka zawt chhuak zo ta rih lo. Chu chu khawimaw lai khawchhak lam kawngpui dungah khian tu Mohurer/SA/JE emaw a awm a, CRP awm lai kha a ni. A kawngdung hnathawk hawng lam chu a awmna khuaa CRP truck-a chuangho chuan a haw lam ve bawk chu an rawn tlan pel a ni awm a, chuan ve tumin a lo phar a; mahse, an ding duh ta lo a. An hma kawngkawi an tlan liam dawn tep chuan eng emaw groundsheet-a tuam hi a tla chhuak a, kawng thlanga lum hi a va hmu zui a. CRP-ho chuan an hmu lo a ni chek ang, an tlan zel mai a. Chu pa chuan a hmuh avangin a thlen phei takah chuan a zuk chhar a, a han phelh nak chuan note fun khawm tam deuh mai a lo ni a. A ak phei a, inah a dah sauh sauh a, CRP camp-ah chuan an OC hmuh tumin a va kal ta a. CRP-ho kha buai tak tein an lo buai a, gate sentry-te chuan a luh pawh an lo phal i-khaw lo mai a. Ani lah luhlul, kir mai duh loin gate bulah chuan an phal hun nghakin a ding tlat mai a, CRP-ho chu an ri chel chul mai a ni awm e. A tawpa tawpah chuan OC hmuh chu an phalsak ta tawk a ni awm a. A tirah chuan an OC pawh chu a vin deuh to a ni awm e. “Eng nge i duh?” tia a han zawh chuan ani chuan, “Thil tihbo in nei em?” tiin a zawt ve thung ta a. OC chu a meng kawk mai a ni awm a, ‘Nei e, i chhar em ni?” a han tih chuan, “Chhar e, pawisa in thlauh ka chhar alawm.” “Engzat nge i chhar?” Ani chuan, “Ka hre lo, ka chhiar lo, kan inah ka dah tha,” a han tih takah chuan thutna an han pe a, thingpui leh kel thinte an pe leh hnuhnawh a ni awm e. Tichuan, in lamah chuan escort nen an phei a, tangka tel chu an va la a, OC dawhkanah chuan an chhiar ta a, naia khat pawh heu miah loin a lo kim thap mai a ni awm a. Chulai vela CRP-ho thla hlawh chu a ni awm e, nuai eng emaw zat ni awm tak a ni. Chu pa rinawmna avang leh an pawisa bo an hmuh leh thap mai tak avang chuan OC leh CRP dang reng reng chu an lawm em em mai a. An OC chuan pawisa tam tawk tak lawmmanah pek a tum a, “A kim lohna chu kan hlawh theuh atangin kan tikim mai ang, a lawmawm em em mai,” a han ti ngial a ni awm a, ani chuan, “Kei pawh sawrkhar hnathawk ka ni a, ka ei khawp chu ka dawng thla tin ve tho e,” a ti duh lek chauh mai si. “A nih loh leh, in office lamah i promotion chungchangah sawi i duh em? Hotu lianah ka thlen ang e,” a tih pawhin a duh bau lo a ni awm a. A tihngaihna hre lo chuan a tawpah chuan, “Bombay khawchhuak ka ni a, hei ka address tal hi la la, eng emaw tih hunah tanpui i tul phawt chuan min rawn hrilh la, englai pawhin ka inpeih reng ang,” tiin a home address a pe ta a ni awm e. He thu min hrilhtu chu J.Lalduhawma, Jt. Director (Retd.) kha a ni. A nupui, Hmingpuii, Engineer office-a Divisional Accountant lam hnathawk khan a hrilh niin a insawi. Ka hriat dan chuan chu pa chu Chuaukunga a ti mai a, ka lo ngaih ve rawk dan chuan Thakthing Veng, Pu Lianhnuna, BA hmasa pawl fapa turah riak ka lo ruat a. Tun thla tir khan phone-in Kunga chu ka va zawt a, amah a nih loh thu min rawn hrilh a, amah ni lo kawngpui dunga thawk chu Chuaukhuma, sipai bang awm âwmin min hrilh a; mahse, amah zawn chhuah dan kan thiam tawh si lo. “JE bawk Chuaukhuma tho, Kulikawna Pu Chhing khawlchhua fapa a ni ang e,” an ti a, a lo ni bik bawk si lo. Duha te nupa an boral daih tawh bawk si, zawn chhuah dan thiam tawh lo mah ila he mi rinawm em em mai chanchin hriat hi a nuam em maia ka hriat avangin in lo hriat ve-ah ka rawn chhuah reng reng a ni. Duha dam lai khan kan sep dun thin a - “Kei chu ni ila - kawng chhak lamah ka phum ru ang a, leave ka la ang a, Champhai lamah sum ka han dawng ang a, kal pahin nuai hnih emaw ka la chhuak ang a, Champhaia thil eng eng emaw ka han lei hawng ang a. Chutah half pay leave te ka la chhunzawm ang a, nuai 2, nuai 3 zela ka lak ziah chuan ka sumdawnna a HLAWK ngawt tihna a ni mai!” te kan ti vel thin. Chhar ve uk lo khan kan lo hisp ve nasa mai thin nia!! U Rina, Dawrpui (Lalrinliana, Ex-MLA (L) te nupa pawh khan 1966 Zoram buai khan, dawrkai hausa, Chotelal Seth te rangkachak bawm tlansan an chhar a, an kawl tha char char a, an pe kir leh ngat zuk tia. Mi rinawm leh mi tha chanchin hriat hi a nuam ti r’u?