Ngawi teh u, Pawl IV atanga Pawl VI, (1940-42) a kan pawl chanchin sawi tul ka ti tlat, kan kir leh rih ang e. Kum 1940-ah Sikulpuiah pawl IV ka kai ve ta a, Section C-ah monitor ka ni. Kan zirtirtu upa deuh Pu Chawngan grammar min zirtir a, Proper Noun hi. Mihring hming hi proper noun a ni, mahse THANGA hi chu a ni ve lo, khaimah aw- Thang upa, Upa Thanga, Thang hmuihmula, Thang thlasika, Thang sangha vuaa, Thang ka serthlum rua tih pahin ka thian Thanga, Mission Vengthlang chu a’n melh ngei a, Eng dang vang maha sawi a ni lo, a serthlum ruk kan hrat a, Thanga kha a man a ni awm e, chuta tang chuan Thang ka serthlum rua ti ngatin a ko. Tum khat chu Kapchungnunga bul a a vei laiin vawih uih rim a hria a niang- mm, mm, mm a tia Kapchungnunga chu kawk a, Nang hi i ni vawih, engati nge class-ah i vawih, a uih uih nen a tia a hau vak mai nia. Kan zirtirtu pakhat chu Pu Lawma (Rev. Lianhmingthanga pa) a ni a, mi runluih hi a thiam khawp. Siamliana leh Zathuamluaia hi lecture a pek laiin sam an lo inpawhsak a, a zuk man ta hlauh mai a. A chhan a zawt a, Siamliana sam zai khat te te a zai 10 a pawh chuan lehkhapuan phek khat Zathuamluaia chuan hlawh tur a lo ni. Pawl hmaah a dintir a, a pawhtir ta a, zai khat te te a pawh a phalsak lo a, zai 3/4 vel khan a pawt kun lawp lawp mai a, a tawpah Siamlianan phek 10 a chawi leh ta nghal a! Tum khat pawh tlangval uaih tawh, Lalthuama chuan ring deuh maiin YES SIR a ti vak mai a, E, i aw a tha hle mai, sikul kawt kotlangah khuan thlang lam hawiin vawi 50, heta tanga ka hriat phak khawpa ringin zuk au rawh, monitor-in a veng ang che a tia, Monitor ka ni sia, ka zuk veng a, a ‘yes sir’ apiangin lamliana bazar kal leh hawng chuan an rawn chho en thin. 1941-ah pawl 5 ka kai a, Sec B-ah monitor bawk ka ni. Kan zirtirtu Lungmuana, zaidam zet maiin Recurring decimal min zirtir a, 4 hi 3-a insemin 1 a chuanga decimal-a inchantirin 1 piahah dot-in chhu ang a, a chuang 1 bulah 0 inbelh ang a, 3-in insem leh ang a, hmun 3-ah 1 a chuang leh a, 0 inbelh leh ang a, sem chhuak chu 3 bawk a ni zel tawh ang, chu vangin i sem chhuah hnuhnung zawk pathum chunga dot indah ang a tiin min zirtir a, 1 chuang hi a tawp theih tawh loh avangin dot indah khan tawp thei lo a nih a hril mai a ni. chu chu Recurring decimal an ti a, kumkhua pawhin sem ula a tawp thei tawh lo a ni a han tih lai chuan Pu Zuia (Lalzuiliana) chuan “Khawvel jawng jawnga lehkhapuan kan hmanin khawiah a tawp loh ngai..,” tiin a lo sawi chu a hre hlauh mai a, Min ko a, Head room-a a tiang kha va la rawh a ti a, Pu Zuia chu ka ngam teuh mai si lo a, 3rd class ho vuakna tiang ka va la a, U Lungmuana chuan kha chu ka duh lo, 1st Class tiang kha va la rawh a ti a, U Lungmuana thua va la ka nih tak a vang khan kei pawhin velh ka tuar ta bik lo. Kum 1942 chuan pawl 6 ka kai ve leh ta a, Section A monitor-ah bawk ka tang leh a. English kan zir dawn a, kan zirtirtu chu U Liana a ni, nui hmel tilang duh vak lo, A! gentleman tak mai, tarmit vuah a ni. Tichuan kan zirtur chu min keutir theuh a. “Denga, nang han chhiar teh” tiin Lalrodenga (Deng commissiona kan tih kha) chu a ko a. Denga chuan ding chungin “Sir Syed Ahmed was born in .......sangkhat zariat sawm pasarih” a'n tia, U Liana chuan saptawngin maw le a ti a. Denga chuan "One eight one seven" a tia, U Lianan chhiar tha leh turin a ti a. “One thousand and eight hundred and seventeen” a han tih meuh chuan U Liana pawh a nui ve char char mai. World War II (1939-45) lai kha a ni a, Allied Force thlawhtheihna kha Aizawl chungah hian a thlawk fo a. Japan khan Burma (Myanmar) kha a la ta maiin, Mizoram tan pawh khan a hlauhawm ta fu a. Khuangphah tih vel kha a ri reng mai. Chuvangin Air Raid programme te an tia Siren a rik chuan Trench (Lei laih khura bihrukna)-ah luh vek tur a ni. Practice kan nei ve thin a, Monitor ka nih avangin tlar hmasa bera tlar inzui zelin, tlan siin, fel takin trenchah, dan ang thlapin kan awm thin a ni. Tum khat chu leh sawi lawk pawh awm miah loin Siren (warning) a ri phut mai a le...khawi lam indawt te chu, tukverh hnaih hnaih an zuang chhuak hmasa in trench an thleng hmasa a ni mai, kei chu a te pawl na na na, hnung takah ka zuk thu ve ta hram. Bom erawh a tla ta lem lo. Thlawhna kha a thlawk reng mai a, American Flying fortress te, Blenheim te, Spitfire leh Hurricane te kha a hmel kan hriat phah ve hial a ni. Pawl 6 chu naupang 33-in kan pass a, ka position ve chu 30-na, 3rd division-ah maw le. Dik tak chuan naupangte e ti loin kha engti zia ni maw tlangval kan hre riau mai a, hmeichhe hnute dehte kan ching a, inkhawm ban hian nula karah kan inzep a, kan dek zawk a, Awi! an tih hian kan tlanchhe daih a, khang tlanchhiat vel kha nuam kan ti a ni ber awm e- Nu e, Nula e kan sawi chuang lo, a rem rem a ni tawp mai lawi si!! 1942 te kha chuan Japan ral kha kan phek hlauh a ni. Dawrkai hausa te khan an bungrua te kha - khuutah Mission Vengthlang Rev. Lalnguraua te in phei, tuna Tlangdung veng an tih emaw niah khuan ngaw durpui karah an thukru a, chuvang chuan khulai veng khuan Tlanchhe Veng hming a put phah a, in leh lo neia khawsa pakhat mah an awm lo. Bungraw vengin an riak a ni chauh mai. 1943 lam atangin em ni ta- Sikulpui te khi Sap sipaiin an luah a, sikul naupang (Middle school naupang) chu Hmeichhe sikulah khian hmeichhia nen an inkal chhawk ta niin ka hria. Hlauhawm ve deuh a sin khang hun lai kha.