Ka Huang

Ka Huang (July 06, 2014)

Chhuanliana BVT - Jul 05, 2014

Ka Huang (July 06, 2014)

Tlangval laia harh, ler ka ni bawk a, ‘Dawn kirin lunglen a zual e’ tih hla hi ka tana phuah em ni tih mai palh awl a ni. Ka tlangval ve lai, ti mai ila, Chawlhni tlai khat chu ka tlai leng zo hi, chaw ka ei mawlh mawlh a, ka mu ta mai a, ka nu ngaih reng reng a tha thei lo. ‘I dam na nge?’ min ti sek mai nia. Hei tunah chuan TAR?la ni mah suh ila, upat khat chu kan thleng ve ta chu a ni mai a. Mosia tawngtai hlaa ‘Chakna avangin kum 80 pawh a ni thei e’ a tih pawh kha kum 5 laiin ka pel ta der chu a ni mai. Khawvela nun hi kham tawh viau awm, kei chu ka ni miah lo, dam hi ka thlahlel. ‘Van khi ka in a ni’ han ti sa teh thin mah ila, hawn hi zuk châl ve miah lo ia. Ban tlang dan awm se, chu dan chu ka zir tang tang ang! Kan han tleirawl chho (15-20) atang reng reng khan kei chu nula rim hi ka kham thei lo a ni ber mai. Tunlai thangthar veleh chhawng hi chuan nula rim ka tih pawh hi an hre tawhin ka ring lo. Hmanlai, ti ve tawh mai ila, kha chuan tlangval rualin mahni ngaihzawngte rim hmaa a fukthlem ang ziazangin len tak tak hmaa len khawmna kan nei thin. Chutah chuan Vaihlo zial leh Kuhva khawr an lo zuar ngei a, Vaihlo zial Pawisa pakhatin zial nga (Re. 1/-in zial 320 tihna), Kuhva khawr pawisa pakhatin khawr 3 (Re. 1/-in khawr 192 tihna) kan han inla muk a, ngaihzawngte in lam kan han pan ve vang vang mai kha chu - lungkham dang awm hek lo, min ngaihzawn ve theih dan tur kan hisap vak vak mai a nih kha. A then, ngaihzawng fumfe nei rih lo leh keini ang duang, tuma ngaihzawn ve duh lohho kha chu chawlhlawknaah khan zan tam tak kan tlingtla satliah ve mai mai thin; mahse, nula an awm ve tho avangin a nuam kan ti em em ve tho. Chuti ang Mission Venglai tlangval buk pakhat chu nula 2 awmna a ni. Hming pawh sawi ila sual ni mawlh hek lo, an huatthu a nih ka ring lo. Tun hnua ka ngaihtuah hian mi an dawl zawh dan em em kha mak ka ti lo thei lo. Chuti ang chawlhbuk zinga pakhat chu Rozami (RIP) te in a ni, a nî a la nula bawk a, kan u-te rual leh keini ang rual hi zan tin mai hi kan tawm hung reng mai a ni. Rozami kha ti leh thin ila, tleirawl chak tak a ni ber a niang chu, inkhawm ban veleh dawrkai thlaah mi karah a relh zar zar a, keinin kan um ru a, inkhawm bang zinga a lang a paua inum vak ngaihna awm hek lo, Pu Hleia te kawmah a’n tlan chu um takte hian kan um a, Ngawivung ruama Pu Vankhuma te kawt kawr te chu a zuan khum lawng lawng zel mai! An kawngkapui kha an lo hawng ngei a, ding hman hlawm hek lo i, kan tlu lut rui zel. A nu leh pa leh a nî te pawh khan thinrim hmel pawh an pu ngai lo, kan thaw hle hle zel mai a ni! Thawsa te a han dai te te a, thlangraah vaihlo cheh dip sa a rawn bun nghek a, lehkha zai sa nen, vaihlo-zial tawnna tur la chhum, a tawk chiaha tan bun sa nen a rawn chhawp a, thlangra chu herhsawpa thuin tleirawl 3/4 nen kan mal chungah kan hung a, kan thu kual a, Rozamin a zial char char a, pakhatin zial tawnna lazai kha a mal te tein a lo chhawp a, 2-in Rozami zial sa chu kan lo tawn thin a, mak tak mai chu mi pahnihin kan tawn hneh mang lo kha a ni. Tichuan, titi pahin kan ri mam mam a, tu emaw kha a lungawi loh vaih chuan thlangra kha a khupin a’n nghawk nghek mai a, thingphel chhuatah vaihlo nawi, zial sa, tawn sa, tawn loh, tih ang kha a baw nuai mai a, hmunphiah a va la a, kan phiat khawm a, kan rut fai a, a ngaite bawkin mahni hna hna kan thawk leh mai thin. In neitute tan khan kan chimawm tehreng nen, nui chung hlirin zuk hmang thin si ia! Rozami Ni, Seii kha kan rual U ten an rim a, Seii pawl leh Rozami pawl te kan siam a, laltin enga zan thing ehah te kan inel vak zel. Zan khat pawh kan inel leh a, vanduaithlak takin Lianchunga (JL) hreipui chek tleuin U Seii ngalrek a fuh palh hlauh mai a, rei fe chu a ngalrek a tuam thin. Tunah chuan chung ka han sawi lante chuan chatuan ram min pansan ta vek mai. A chhe ber ka la dam ta mai mai a, lung a leng em em ringawt mai a nih hi. Dawrkai thlaah kan han chhuk a, Biakhliri leh Lalthianghlimi te unau, a thlangah Lalthuamin Vaihlo zial leh Kuhvakhawr a lo thutpui ngei a, thlang leh deuhah Chhanhimi (Pu Tlangbawiha fanu) a lo awm leh a, laltin chhiin eng eng emaw a lo zuar ngei bawk a, a thlang lehah Lianmawii (J.Lianchunga farnu) chutiang bawk zuar chuan a lo thu a, a thlang lehah Pi Hualhnawlhin chuti bawk. Kan inlei muk tentawn a, ngaihzawng rim tura kan han liam nal nal mai chu ngaihtuah a tam vak lo. Zan khat chu kha October thla vel ni tehreng, Dawrkai thlaa kan awm laiin Perhpawng a’n pung tehreng a, êng an rawn bawm a, kan man khawm a, Dekchi-ah kan chhin hnan zel a, dawr bangah an lo bet chawt chawt zel mai a, kha zan khan - Lalthuami, Chhanhimi leh Lianmawii te pathum an inhawng êng a, Lianmawii te chuan pump khawnvar an chhit avangin a êng bik a, perhpawngin a pan nasa bik, an man tam hlein ka ring. Zan danga a awm leh tak awm reng reng ka hre lo. Kan perhpawng mante pawh kha engtin nge kan tih zui tak pawh ka hre lo, kan man teuh tih ka hre ringawt mai. Khang hun lai engmah chhungkaw khawsakna lam lungkhawm loh lai, ei tawk leh nula rim zan tin ngaihtuah lai kha a lo nuam ber mai. Mi zawn tur a awm a, an rawn au leh nula rim lai ni raw sek sek, kan tlan lawng lawng mai a, mitthi an awm leh tlaivar kha chu TUR a ni tawp mai a, zualko kan tlan a, thlan kan han lai a, tlaivar lah kha ril a tam duh nasa mai, tunlai thangtharte hi chu in changkang tawh khawp a, ar sawhchiarte in pir rawl emaw ni? Kan hun ve lai kha chuan thingpui sen tum khat an sem chuan chu chu a ni mai. Lumen tur awm sia tlaivar loh, mi zawn tur awm sia mi zawn loh, thlan laih tur awm sia thlan laih loh te kha a awm ngai tih pawh kan hre hlawmin ka hre lo, kan hriat phawt chuan tlangval tih tur a nih hriain kan ti vek mai niin ka hria. Tunah hi chuan an vannei ka ti, mobile phone-in an zualko zeih zeih mai a, tlaivar tlaivar eng emaw zat chuan an tlaivar chhuanlamin thlan an lai lo mai a, zahna thil pawh a ni ta lo emaw ni. Kan hun ve lai kha chuan kan nula rim ngei ngei pawhin min zahpui mai ang tih kha kan hlau hlar mai a, a thleng hmasa nih kha kan tum nasa thin. Civil Hospital atanga mithhi ruang hlawmtu nihte kha tlangval tlawmngai inelna a ni thin. Tunah hi zawng Thalaite u, in vannei tak meuh a ni e, kan AT LAI ang kha in duh tawh lo a, in hah lo khawp mai. Mahse kan hun lai chuan NUAM?kan ti ve tho, U Tawkruaia, Zosap chaw chhum te kha - Pu Thangbula damlo kha zan 5 tlawng a tlaivarpui a, chhunah a mu leh hman der si lo, a harh berah a tang thei zan tin tho nia!
Share now